"Zamana"

Zamana

Aňmak kyn däl, adamlaryň azanyn,

Gün geldikçe dargap barýan zamana.

Barha çogýar kezzaplygyň gazany,

Ýagşylara gargap barýan zamana.

Aýaly är boldy, äri hem aýal,

Çaga üwräp otyr, kalby ham-hyýal.

Asla eýigeňok, bu bolşuňa däl,

Minut saýyn eňräp barýan zamana.

Suhangöý misli lal, çykmaýar sesi,

Dogra ýol ýok-gedaý, ogry-pul mesi.

Dolýar deýus-binamyslaň kisesi,

Loly diller saýrap barýan zamana.

Ýalan gurşap alýar sag bilen soly,

Akmak dana boldy, danalar däli.

Memleketler gowşak ýörmelen ýaly,

Serhetleri paýrap barýan zamana.

Çyn galyp bilemok aýagy maýyp,

Şir gonup bilenok asmanda gaýyp.

Hürrini akyldar, patyşa saýyp,

Ýuw-ýalaňaç samrap barýan zamana.

Sütemkärlik ösýär, ömür ötýär haýp,

Çynyňy sözleseň görýärler aýyp.

Ezraýla gol bulap, men bärde diýip,

Öljek bolup yňrap barýan zamana.

Seýidaly Babaýew.

1986ý.