KERIM GURBANNEPESOW
MAŞGALA BASAN ŞAHYRYŇ ELEGIÝASY
Häzirki zamanmy, öten zamanmy!
Ýa geljek zamanmy - bermezdim ünsem.
Bu gün öten zaman işligne bakyp,
Ulydan dem alyp,
Oturýan ümsüm…
Indi ençe ýyldyr,
Söýgi hakynda
Öten zaman bilen ýazýaryn şygyr.
Eý, Taňrym! “Söýýärin” diýmegiň ýerne
“Söýüpdim…” diýmeklik niçiksi agyr.
“Söýýärin sen gyzy, söýýärin!” diýip,
Goşgy ýazýan günlem düýndi-le weli,
Indi goşgy ýazsam “Söýýärin!” diýip,
Çykyp dur her ýandan her kimiň dili.
Goňşylarym diýýär: “Alty çagaň bar…”
Redaktor diýýär: “Saçyňam çap-çal.
“Söýýän! Söýýän!” diýip, gaýtalap ýörmek
Indi bu ýaşdan soň – gelşikli gep däl.
Özüňe-de nep däl,
Bize-de nep däl.
Dogry, dogry, entek ýaşyňam köp däl.
Bary-ýogy ýaňy ätläpsiň kyrkdan.
Şonda-da on sekiz ýaşly gyz bilen
Ýeri, aýt, nämişiň barmyşyn parkda?”
“A-haw, parka barýan meniň özüm däl,
Liriki gahryman! Liriki geroý!
Ynanmasaň ynha Mollanepesem,
Hanha Şipaçewem oka-da göräý-
Biri ýetmişinde, biri altmyşda,
Ikisem hemişe parkyň içinde.
Ýeri, näme, meni jyn urupmyşmy
Aýny ýaşda, ýaňy kyrkyň içinde?”
Diýip, her niçikdir olaň deminden
Müň bahana tapyp sypýaňam welin,
Öýe gelseň çagajyklaň öňüňden
Gaçmaga gapy ýok,
Sypmaga delil.
Körpe ogluň diýýär: “Kaka, aý, kaka,
Goşgyňy gazetden okadyk ýaňy.
Bir gyzy söýýärin diýipsiň weli,
Kaka, söýýän diýýän şol gyzyň hany?”
Ýüzüňe seredip has tokar ogluň,
Gaýta has beterin üstüne goşýa:
“Söýýän, söýýän!” diýip ýörsüňle, kaka
Kaka-da gyzlary söýer oguşýa?!..”
Ýene-de bir çagaň, has lälik çagaň
Gerşiňe atlanyp, saçyňdan çekip,
Diýýär: “Indikide parka gideňde
Kaka, şol gyz bilen meni hem äkit!”
Ýeri enesine näme gerekmiş!
Olam hezil edip gülmäge derek,
Gaýta siltenjiräp, ýüzüni sallap,
Ne-hä çaý getirýär, ne-de bir çörek.
Gaýta hüňürdeýär: “Çaý-suw isleseň!
Şol gyzlaň ýanyna ötäýtmek gerek!”
Garaz bir tarapdan –
Çagaň, goňşylaň,
Beýleki tarapdan –
Redaktoryň,
Keýwanyň hem – üçülenji tarapdan,
Şolara baglyrak seniň takdyryň.
Biri siltenjiräp,
Biri öýkeläp,
Biri akyl berip ýuwaş-ýuwaşdan
“Söýýän” diýen sözden mahrum etjekler…
Mundanam bir mydar bormy, ýoldaşlar!
DUTAR BILEN AJAL
Ölüm ýassygynda ýatyrdy Ene.
Gapynyň agzynda otyrdy ajal.
Ene balasyna ýüzlendi ýene:
» Getir dutaryňy,
Çal, köşegim çal!
Gözlem ýümulsa-da çalyber oglym,
Belki, ol ýumulan gözlerimi açar«
Çaldy ogly, çaldy, ýene-de çaldy,
Bir aýlap yzyna serpikdi ajal,
Ýene erbetleşdi enäniň haly.
Ene ýene diýdy: çal, köşegim çal!
Çaldy ogly, çaldy, ýene-de çaldy.
Ýene-de bir aýlap serpikdi ajal
Ýene agyrlaşdy enäniň haly.
Ýene Gaýtalady:» çal, batlyrak çal! «
Çaldy ogly, hasam batlyrak çaldy.
Bu gezek üç aýlap serpikdi ajal.
Ýokmyşyn diýärler gudrat diýen zat,
Bu gudraty görse gudratam gaçar.
Dünýäde hemmeler saz çalýan bolsa,
Meger, başyn alyp gaçardy ajal.
Ýene-de hayýalap başlady Ene.
Ene diýdi: demim bolmanka tamam,
Kyrk ýyllap içimde berç tutup giden
Bir syrymy saňa açayýn, balam.
Saza senden beter aşykdym menem.
Çalýana-da aşyk, saza-da aşyk.
Bir gezek on alty ýaşlyja gyzkam,
On alty depäniň üstünden aşyp,
Gitdim goňşy oba saz diňlemäge,
Çalýardy dutary bir gerçek ýigit.
Palçykdan adamyň şeklin ýasasaň,
Şoňa-da saz bilen jan berjek ýigit
Ýetende küküräp iň belent perdä,
Näme bolanyna özümem haỳran
Ýigdiň gujagyna okladym özüm,
Şol ýigit hem seniň ataňdy balam
Dünýäden bimyrat ötüpdi ataň.
Indi şol myrada sen ýetdiň balam
Tä ömrüň ötýänçä ýöret bu käri,
Ýedi kowmuňa-da öwretgin balam...
Gürrüňini zordan tamamlan Ene,
Diýdi balasyna» çal, ýene bir, çal...«
Çaldy ogly, çaldy, ýöne bu sapar
Gaty çyny bilen gelipdy ajal.
Şonda-da tamasin üzmedi Ene.
Ýene pyşyrdady: çal, ýene bir çal!...
Ýöne doňup galdy oglunyň eli
Dutar ýere gaçdy... ýogsam-da weli
Şu gezek baş alyp gitjekdi ajal.
BÄGÜLLI ÝIGIT
Bazardan gelýärin. Elimde sebet,
Sebedimiň içi – pamidor, kelem,
Kartoşka, badamjan.. Duralga çenli
Gurady aýaklam
Guruşdy ellem.
Şonda-da dyrjaşyp bar güýjim bilen
Bazardan çykýan-da duralga ýetýän.
Duralgaň öň ýanda – kijijik dukan,
Kiçijigem bolsa – içinde et kän.
Ondanam bir budy sebede atýan…
Awtobusa münýän. Sagynýan sakga.
Keýwany “bir düzüm gyzyl burç getir!”
Diýipdi ahbetin. – Haý, şofýor, sakla!
Awtobusy sakla! – Näme, ýaşuly?
- Aý, neme… gyzyl burç çykypdyr ýatdan…
Näme diýýänimi aňşyrmasa-da,
Gowy ýigit eken. Geçdi-de ýapdan,
Maşyny togtatdy. Açyldy işik,
Menem derrew bökdüm. Aslyşdy sebet.
Bir aýal yzymdan gygyryp galdy:
“Bu şlýapaň bolup ýörşüne seret!
Bir gün unaşyňy burçsyz içeňde
Geçmez öýtdüňmi sen bokurdagyňdan?!”
Awtobusyň içi sarsdy-da gitdi
Burç söýmez adamlaň pykyrdysyndan.
Menem hüňürdedim: “Gülüpler geçiň,
Öýe gyzyl burçsyz barmajagym hak.
Keýwanyň buýrugy – meň üçin kanun:
Burç getir diýdimi – burç alyp barjak,
Zäk getir diýdimi – zäk alyp barjak,
Ol meniň öz işim. Size bagly däl.
Onsoňam men siziň äriňiz ýaly,
Ýa oglyňyz ýaly ejemogly däl!…”
Şeýdip öz-özüme teselli berip,
Bazaryň çetinden ätledim ýene.
Şeýle bir burçlar bar, köz ýaly burçlar!
- Essalawmaleýkim, burç satýan ene!
Burçuňyz ajymy?
- Datdajyk göräý.
Edil zirk ýalydyr.
- Sagja bol, mama.
Ozalam ot ýaly agzymyň içi.
Keýwanyňkam ýetik. Wah, seňki näme!
… Kelemli, käşirli, soganly, burçly
Bir putluk sebede kertdirip elim,
Bazardan saýlandym, giň köçä çykdym.
Köçe durşy bile gyz bilen gelin.
Garşymdan gyssanyp bir ýigit gelýär
Garagyýçak ýigit, dogumly ýigit.
Bir maralyň ýanna howlygyp barýar
Gujagy bir harman bägülli ýigit.
Şeýe bir, şeýe bir gyssanýar ýigit,
Onda-da şeýlebir gyssanyp gelýär.
Göýä bägülüne bakýanlardanam
Bägülüniň ysyn gysganyp gelýär.
Wah, nämä gyssanýaň, bägülli ýigit?
Wah, beýle gyssanmak nämäňe gerek?
Ýa-da eliňdäki bägüle derek
Sebediňi kartoşkadan dolduryp,
Gyzyl burçdan (we başgadan) dolduryp
Gitmeli günüňe gyssanýarmyň sen?
Wah, nämä gyssanýaň,
Bägülli ýigit?
DEHLEWINIŇ 700 ÝYLLYGYNA DEHLEWIÇE DÖRÄN SETIRLER
Seniň gözleriňden ganyp bilemok
Megerem, bu dertden eräp giderin
Gijeler gözüme uky gelenok,
Göz ýaşym gutaryp gurap giderin
Öwlýa sen. Daşyňdan pyrlanyp ýörün.
Kowsaň-da, maslygmy süýräp giderin
Ähdi-peýman diýmek – iman diýmekdir,
Ähdiňden dänäýseň niräk giderin?
Adyň dilde bolsa – bahylyň-da köp,
Dilde men, niçiksi gaýrak giderin?
Ýok, ýok, maňa ýatdyr gaýra diýen zat
Gitse-de ilerik köräp giderin.
Seni iki dünýä çalyşmaryn men,
Egnimi egniňe diräp giderin.
Birden öläýsem-de, Seň ysyň alsam –
Ýene-de direlip, ýöräp giderin.
Adam iki gezek inermiş dünýä.
Çynmyka? Jogabyn durlap giderin.
Ýeke gezek bolsa, menem boş gitsem –
Dünýäden çaga dek çyrlap giderin.
Sen ähdiňde dursaň şahyram durar.
Seni müň beladan gorap giderin.
Bürgüde duşduňmy – bürgüt hem bolgun!
Serçä dönäýdigiň – pyrlap giderin!
Arşivin durumu
● Tam metin
● 21/21 yorum korunmuş
Yayımlandığı site: teswirler.com · Kaynak: Web Archive kopyası — ertir.com, 15 Mayıs 2012 · Orijinal sayfayı gör ↗
Yorumlar 21
Oran gowy goshgylar. Minnetdar! Adyn dilde bolsa bahylyn kop bolar setiri unsimi cekdi. Gowy yazgylary, goshgylary nace okasanam az. Her gezeginde oya batyrjak bir ysh tapylyar.
Kab aga, goshgulary barde yazanynyz uchin tanryyalkasyn. Sizden bir hayyshdym, Kerim aganyn bir goshgusy bardy. Ady yadyma dushenok, umumy manysy yone sheylerak bolmaly: Yazyjy duralgada gabat gelen iki gyzy synlap, olaryn yzyna dushup gityar. Watan kinoteatrynyn(yalnyshmayan bolsam) onunde awtobusdan dushya gyzlar, yazyjam dushya. Olaryn gozelligini synlap durka yanlaryna iki sany yigit gelyar, shol yigitlerin biri yazyjynyn ogly bolup chykyar. Shol goshgyny bilyan bolsanyz, barde goyaysanyz? 🙂
Bibijanyň islegi boýunça!
KERIM GURBANNEPESOW
DURALGADA
Ekiz taýy ýaly jorasy bilen,
Jümjüme gülleriň arasy bilen
Jümjüme ýaglykly bir gözel gelýär
Jümjüme köýnekli jorasy bilen.
Gyzlaň ikisi-de gyzyl çabytly,
Çabytlaň gapdaly keşde sowutly.
“Gyzym, uýam” diýip, lak ataýmasaň,
Lak atmagam indi bize howuply.
Gyzlaryň birisi – duran bir keýik
Köwşüniň ökjesi ne pes, ne beýik
Megerem, dünýäde iň bagtly oglan-
Şol keýik gözlere ýar boljak ýigit.
Menem synlap durun çekilip gyra.
Gyzlar meňzäp gelýär swetofor-çyra.
Çabytlary gyzyl, ýaglyklary gök –
Ýol ýapyk hem açyk – bagtyňa görä.
Gyzlaň biri – çynar, birisi – derek.
Görmäge göz gerek, söýmäge ýürek.
Wah, gözem, ýüregem ýeterlik weli,
On sekiz gerek, wah, on sekiz gerek!
Ikisem uz basyp duralga geldi
Birisi pyňkyryp, bir zada güldi.
Saňa güldümikä? (Aý, ýa-ha saňa,
Ýa-da bir seň ýala güleni belli!)
Asmana seretdim. Gün eýýäm peýşin.
Onýança gaýradan göründi maşyn.
Duralga ýetäýmän, gyzlaň gaşynda
Togtady, baş egip gözellik üçin.
Mündüler. Gyzlardan galmadym menem.
Aý, näme, dynç günüm, gezjek bir sellem.
Aý, onsoňam, şeýle gözeller bilen
Garşy däl uçmaga kosmosa çenlem…
Awtobus togtady. Açyldy işik.
Reňbe-reň müň gözel, müň ýigit üýşüp,
“Watan” teatrnyň öňünde durlar,
Deň ýarysy magşuk, deň ýary aşyk.
Ýüregimi alyp özleri bilen,
Kereşmesi bilen, näzleri bilen,
Gyzlaryň ikisem maşyndan düşdi –
Menem böküp düşdüm yzlary bilen.
Gyzlaň ikisi-de gyzyl çabytly,
Çabytlaň gapdaly keşde sowutly.
Birden iki gözel dörde öwrüldi –
Hersiniň gapdaly gerçek ýigitli.
Tanapdyr ýigitler gyzlaryň gowsun.
Göreçler göreje atyşdy owsun.
Bir ýigid-ä hasam ýeserje eken –
Kemputdan doldurdy bir çabdyň jübsün.
Onýança-da açdy gapysyn “Watan”…
Kemput iýýän gyzyň golundan tutan
Bir görsem öz oglum, öz Nazar oglum…
Guwan, şahyr, guwan,
Utan şahyr,
UTAN!
Tanyryalkasyn Kab aga! Okap hezil etdim 🙂
Men Kerim aganyn ahli goshgusuny halayan.
Men Kerim aganyn ahli goshgusuny halayan.
Kab aga tanry yalkasyn.
Men sizden '' yazmasy has agyr düşen goşgy ''-ny yazmagynyzy yahhyş etjek weli gaty uzyn. Wagtynyz bolsa gayrat edip yazayyn-da. Yazmasy agyr düşen goşgy - daldir. Has agyr düşeni.
Ýus-Marylyň islegi boýunça!
KERIM GURBANNEPESOW
ÝAZMASY AGYR DÜŞEN GOŞGY
Bütin oba garaşyp dur.
Ýola bakýar hemmeler.
Atasy pyşyrdaýar:
“Geler. Geler. Geler”.
Gelnejesi pyşyrdaýar:
“Gelermikä? Kim biler...”
Atasy göwünlik berýär:
“Geler-le... hökman geler”.
Gök toraňňyň saýasynda
Ýüzläp adam dymyp dur.
Çekizeli ak haltadan
Turşy damja damyp dur.
Ýygnanyşdy babadaşlar,
Içginler hem daşgynlar.
Ne signal bar, ne şowhun-
Dymyşyp dur maşynlar.
Geldi dürli maşynlar -
Gyzyl, sary, ýaşyl, ak.
Geldi garaşylmaýanlar.
Garaşylýan gelenok.
Göýä pikir hem etmän
Bu gürrüňler babatda.
Ak guş kimin irkilip,
Ene ýatyr tabytda.
Göterlerne garaşyp dur
Köpi gören agaç at.
Ene ýatyr üstünde
Giň maňlaýly, agajet.
Şol enäniň ogluna
Garaşyp dur hemmeler.
Geldi tanyş, nätanyş -
Geldi şondan öňňeler.
...Ol henizem gelenok.
Meger, häzir ýoldadyr.
Iň söýgüli ulagy
Samolýot däl, “Wolgadyr”.
Ýöne weli uçurýandyr
Samolýota deňeçer.
Şondan yza-ha galmaz,
Oňarsa öňe geçer.
Ol henizem gelenok...
Meger, häzir ýoldadyr.
Ýa-da iki eli hem
Ullakan stoldadyr.
Tüweleme, uly adam
Bolup gitdi indi ol.
Ýaňy bolsa has ullakan
Bir stula mündi ol.
“Sypaýmasyn birden!” diýip,
Oturandyr ýapyşyp.
Owadanja gelinler
Çaý çekýändir çapyşyp.
Üýtgeşikdir öňündäki
Kişmiş, kemput, şokolad.
Ýa gök çaýyň humaryna
Ýazýandyr bir doklad.
Ýok, ýok, özi doklad ýazmaz,
Ýazýandyrlar başgalar.
Ýaranjaňlar her sözüne
Ellerin çarpyşarlar.
Ol bolsa özi ýazýan dek
Gülümsirär, ýylgyrar.
Ýazanlar onuň deregne
Utanjyrar, ýygrylar.
...Ýigrimi ýyl mundan ozal
Gutarypdy bir WUZ-y.
Ony oňa gutardan hem
Tabytdaky ezizi.
Güýzde pagta ýygypdy.
Gyşda körek çöpläpdi.
“Oglum ullakan okuwda!”
Buýsanç bilen gepläpdi.
Howdan gurdy, gazy gazdy
Laýa batyp dyzyndan.
Ýygnanjasyn lükgeläp
Ibererdi yzyndan.
Ogly üçin ak mütgelden
Bir haltajyk tikindi.
Üçlügini, manadyny,
Şaýysyny, köpügni-
Artdyranja puljagazyn
Atdy şonuň içine.
Şeýde-şeýde kyrk ýaşynda
Ak çozupdy saçyna.
Ogly okuwyn gutardy.
Ene dertläp ýykyldy.
Ol şonda sypap otyrdy
Bir gözeliň çokulny.
Dakýardy enäň pulundan
Her barmagna bir ýüzük,
Gulagyna teneçir,
Bilegine bilezik.
Söýüşdi, gujaklaşdy.
Paýtagtdan jaý tutundy.
...Enesinden utanmady,
Ene ondan utandy.
Ene käte paýtagta
Gezmäge gelen wagty,
Gelni diýdi: “Ýok etsene
Bu porsy garabagty!”
Ogly diýdi: “Ýakymsyz
Ysyň bar-la, jan eje.
Bu eýýamda arassa
Bolmaly myhman, eje!”
Ene diýdi: “Wah, jan ogul,
Her niçe porsasak-da,
Ulalansyň, ýetişensiň
Şu porsuja gujakda...”
Soňra bolsa uzak gije
Ýorganynda aglardy.
Daňyň atarna mähetdel,
Otla tarap ylgardy.
...Şeýde-şeýde günler ötdi,
Aýlar ötdi nobatly.
Edeni şowuna boldy.
Durmuş ony aýnatdy.
Her sözünde bir oýun,
Her elde bir desmaly-
Bir ýyl bäri saklap otyr
Has uly bir stoly.
Bu gün bolsa enesi
Amanadyn tabşyrdy...
Gelen telegrammany
Stolunda ýygşyrdy.
Ony aýalyndan başga
Görkezmedi hiç kime.
Är-heleý karara geldi:
“Barsak bor-la üçüne!”
...Bütin obaň gözi ýolda.
Garaşyp dur hemmeler.
Atasy pyşyrdaýar:
“Geler, geler, geler”.
Onýança-da
“Gelýär!” diýip,
Ardyndy bir ýaşuly.
Göründi ýaşyl meýdanda
“Wolgalaryň” ýaşyly.
“Geler diýdim ähbeti!”
Bir daýandy atasy.
Gara-köýük ýüzüniň
Artyp gitdi ýagtysy.
Onýança-da ýaşyl “Wolga”
Aşak indi ýapydan.
Geljek adamyň deregne
Şofýor çykdy gapydan.
“Şu gün gelip biljek däl.
Gyssagly bir iş çykdy...”
Birden ataň gözlerinden
Iki çogdam ýaş çykdy.
Ýetmiş ýaşyň içinde
Aglamadyk ol goja,
Gözýaşyny süpürdi-de,
Bir ýylgyrdy çalaja.
Ol ýylgyryş ömürbaky
Çykmaz meniň ýadymdan.
Beýle aýylganç ýylgyrşy
Görmändim men adamda.
...Göterdiler enäniň
Ak guş ýaly tabydyn.
Ýaz şemaly ykjatdy
Üstündäki mawudyn.
Salladylar çukura
Ak saçly bir dünýäni.
Içki öýüň gapysyna
Eltilende enäni -
Iki omzuny diräp
Çukuryň erňegine,
Hiç giresi gelmedi
Öz girmeli öýüne.
Iň soňkuja pursatda-da
Öz ogluna garaşdy.
...Ýazsamam ýazdym weli,
Agyr düşdi bu goşgy.
ALLA ýalkasyn KAB aga hezil etdim okap.
Sag bol kab aga! Meniñ gowy görýän goshgymy ýazypsyñ Ýazmasy agyr düshen goshgy ömrüñ bolsyn!
Ýöne men bu goshgy diýmändim, Ýazmasy has agyr düshen goshgy ine shuny diýipdim. Dogrysy men bu goshgyny Juma Ýazmyradyñ okamagynda ses ýazgysyny diñläpdim, 5-6 topbagyny barda yzy ýok, yzyny okamak üçin size ýazypdym.
Goshgyñ birinji bendi sheýleräk:
Ak süýt beren ene gadyrdan gaçýar diýdiler.
Sadagañ bolaýyn ene, sen hakda ýüz gezek ýazypdym öñem, ýüzbirinji gezek ýazaýyn ýene.
kab kaka,
kerim agaçylary razy etmegihä başardyň. :-)
Kab aga, Allah razy bolsun sizden!
Yazmasy HAS agyr dushen goshgyne men hem okasym gelyar. Bilyanler yazaysa!
G. Ezizcimi ya siz, gara pishik agam:-)
Oñam gowy goshgulary bar.
Sizde-de K.Gurbannepesden goshgular bardyr. Paylashayyñ sizem!
Kab aga, Allah razy bolsun sizden!
Yazmasy HAS agyr dushen goshgyne men hem okasym gelyar. Bilyanler yazaysa!
G. Ezizcimi ya siz, gara pishik agam:-)
Oñam gowy goshgulary bar.
Sizde-de K.Gurbannepesden goshgular bardyr. Paylashayyñ sizem!
sagbolun ellerinize guller bitsin.Hezil edip okadym.
Men-ä Ýazmasy has agyr düşen goşgyny tapyp bilmedim. Bilýänler goýmazmyka?
kerim agachy we ezizowcylar
gowy zat aslynda.
emma ezizow bashga.
kerim aga sozler bilen tans eden sozun ustune pierre cardinde lybas geydirip kocha chykaran adam.
ezizow sozlere ganat yasap konul dowletine wizasyz uchuran beyiklerden.
OLAR DURMUSH DIYMEK
Kab ahyry tapdyň ýoluny. Kerim aga hem edil seniň aýdyşyň ýaly däldir-le. Men hem Kerim aganyň şygyrlarynyň aşygy.
Salam, ildeşler!
Men tötänleýin girdim bu saýta, siziň Kerim
aganyň goşgularyny ýazanyňyzy görüp begendim. Bu goşgulary ýazanlaryň ählisine
sagbolsun aýdýaryn. Mende Ýazmasy has agyr düşen goşgynyň audio
warianty bardy, ýagny Juma Ýazmyrat aganyň okamagynda ýazga geçirilen görnüşi. Onsoň
bu ýerde şol goşgynyň gözlenýändigini görüp, tekste geçirmegi makul bildim.
<B style=mso-bidi-font-weight:
normal>Ýazmasy has agyr düşen goşgy
<B style=mso-bidi-font-weight:
normal>
Ýene-de ene hakynda.
Ak süýt beren ene gadyrdan gaçýar diýdiler,
Sadagaň bolaýyn, ene.
Sen hakda ýüz gezek ýazypdym öňem,
Ýüz birinji gezek ýazaýyn ýene.
Ýene-de galamy almaga ele,
Mejbur etdi meni bir elhenç gürrüň.
Diýdiler, üç ogul, üç gyzly ene
Bir ýerlerde haram ölüpdir şu gün.
Bu waka bolupdyr uzak bir ýerde,
Ýöne parhy näme, ýakynmy-uzak
Perzentleriň enäni terk edenligi,
Enäň bolsa haram ölenligi hak.
Men muny ýazmadym belli bir ýerde,
Ýazdym dürli ýerde, bölekme-bölek.
Öýde, ýolda, düýşde, mazarystanda
Indi bolsa başyn jemlemek gerek.
Alty sany çaga dem beren ýürek,
Görmändir olardan bir demlik wepa.
On aýlap ýatypdyr keselhanada
Kä penjirä bakyp, käte-de gapa.
On aýda üç gezek görnüpdir üç gyz
Erkek göbekliden gelmändir hiç kim.
Aýaga galypdyr, äkitmändirler
Ýygnaň diýip suddan gelipdir höküm.
Bir gyzy ýygnapdyr, olam äkidip,
Oglunyň işigne geçipdir taşlap.
Ne ene etaža çykyp bilipdir,
Ne ogly ýokardan düşüpdir aşak
Şol ýerde sowukdan gatapdyr ene.
Niçiksi derejä düşdüň sen, ahlak?
Bu waka nä mahal, nirede boldy?
Diýip maňa sorap berýärsiň ýene
Nirede, nä mahal – näme parhy bar,
Ene hemme ýerde dälmidir ene?
Ene ynsanýetiň tutuş geljegi,
Hem şu güni, hemem ähli geçeni.
Depäňden müň bela inermiş agşam
Irden birje agladaýsaň ejeňi.
Terjime edipdim Resul şahyry,
Matam büräninde daglaň içini.
Meşhur ata soňky demde aýdypdyr
Resul oglum, agyrtmagyn ejeňi!
Meşhur bolmasa-da meniňem atam
Goşgy ýazman çalartsa-da saçyny.
Şol sözdi onuňam iň soňky sözi,
Ýalňyz köşek, agyrtmagyn ejeňi!
Soň-soňlaram baryp mazarystana,
Bagrymy oýkap, gowzudamda içimi,
Ses çykýan ýalydy köne mazardan
Agyrtmagyn, agyrtmagyn ejeňi!
Ýowuz günde aýlanypdyk bileje,
Atgyrany, Gaňňalyny, Tejeni.
Belki özüm duýman agyrdandyryn,
Ýöne duýup agyrtmandym ejemi.
Elimden gidende ilkinji söýgim,
Gürrüň berenimde başdan geçeni,
Enem bir aglapdy..
Diňe men şonda birje gezek
Agladypdym ejemi.
Şondan başga bilip agyrdan bolsam,
Ýa agardan bolsam birje saçyny,
Olam meniň günämi ötmedik bolsa,
Gaýdyp beriň, razy etjek ejemi.
Ýok, ýok, ol Müň kerem razy!
diýipdi.
Soňam gitdi, boşap galdy içeri.
Indi özüm wesýet edýän ogluma,
Agyrtmagyn, aglatmagyn ejeňi!
Bu wesýet wesýetden wesýede geçip,
Gowşup bütin dünýäň ogullaryna,
Agtyklaryň dilinden çowluga ýetip,
Siňsin ýuwluklaryň bagyrlaryna.
Hawa, üç ogully, üç gyzly ene,
Göwsünde bitirip alty ýapragy,
Olary saraltman özi saraldy
Şu günem girmeli ene topraga.
Bu waka nä mahal, nirede boldy?
Diýip maňa sorap berýärsiň ýene
Daşdamy, ýakyndamy – näme parhy bar,
Ene hemme ýerde dälmidir ene?!
Kaspi kenarymy, Wolga ýakasy
Murgap jülgesimi – ýokdur tapawut.
Alty balasyna uzak ýaş diläp
Gabrystana barýar eneli tabyt.
Tabydy özgeler göterip barýar,
Diňe burny çapyk ortanjy ogul,
Bir minut göterdi..
Onda derrew Götermekçi bolsaň täzeden
dogul!
Diýýän dek bir goja yzyna itdi
Tabyp dowam etdi ýoluny ýene,
Alty köşegine uzak ýaş diläp.
Söňky öýüne barýar ak saçly ene,
Biz nälet okaýarys, ol ýaş dileýär.
Bir ýol bilen barýar iki contrast
Oýlandym, ölçerdim – çykmady başym
Köpüňki rastmy, enäňki rast?
Enäni baýdak dek göterip barýas,
Näçe belentlige galdyrdygmyzça,
Göýä daşlaşýan dek balalaryndan
Agram atyp ýere çökýärdi şonda.
Tabydyň yzynda ýüzlerçe kelle,
Göýä akyp barýan gara derýady.
Ene bolsa şol kelleleň üstünden
Balalaryna ömür diläp barýardy.
Ol ömür dileýär, biz nalyş edýäs,
Biziň düşünjämiz ters gelýär enä.
Ýeri aýt, perzentler bigünä bolsa,
Onda kimiň günäsikä bu günä?
Belki, hol barýanyň günäsidir ol,
Ol ene hakynda damagyn ýyrtyp
Goşgular okaýar. Enesi bolsa
Gedaý gezip öldi, kaloşy ýyrtyk.
Belki, hemmämiziň günämizdir ol,
Megerem, märekäň içinden dartyp
Özümi süýrekläp çykarmalydyr,
Megerem, mendirin hatarda artyk.
Birdenem märekäň hataryn kertip,
Wazlap geçip gitdi 02 maşyn.
Görnüp gitdi gara tumşukly adam
Süýnüp gitdi limon reňkli maşyn.
Megerem, şol tumşugy ýazgarmalydyr,
Ykbalyň ak tumşuk bermäni üçin däl-de
On ýyl ozal jaýlanan enäň
Mazaryn bir gezek görmäni üçin.
Şol enäň mazaryn gördük biz bir gün,
Ortasy çöküpdir, gapdaly hin-hin,
Goňşular düzedip geldiler şu gün
Beýik ogly işden goýmazlyk
üçin.
Aýlanyp ýörmäge mazarlaň için
Wagtym ýok diýenmiş çinownik ogul.
Eý ynsap, nähili sergide ýetdiň?
Şeýle nadanlary bog ya-da bogul!
Bir başly, ýüz işli, müň dertli Lenin
Ene guburyna edip zyýarat,
Hepde-de bir gezek sežde eden bolsa,
Indiki haýyşym şundan ybarat.
Şeýle hyýanata uly jenaýat
Hökmünde seredip ýokary sowet,
Jeza kodeksine bir madda goşsa
Meger ynsan ogly bolmazdy böwet,
Hem-ä ene Watan dynjyn alardy,
Hemem has döwletli bolardy döwlet.
Tabydy göterip barýardy millet,
Şäheriň kiçijek köçesi bilen.
Goşulan goşulýar, goşulmadygam
Hoşlaşyp galýardy ejesi bilen.
Köçäniň ugrunda çal saçly adam
Import pežamaly, import köwüşli,
Göýä ýüzi-gözi-de imporda meňzäp
Märekä bakyp dur dürli röwüşli.
Ýaşyl derwezäniň bäri ýüzünden,
Güjeňläp haýbatly derejesini,
Tüweleme, tüf-tüf! bir garny
bilen,
Bekläp dur şäheriň bir köçesini.
Özi bolsa mundan ýedi ýyl ozal
Berip ýorganlaryň könejesini,
Ýer ýok diýip on otagly jaýyndan
Ketege göçürdi öz ejesini.
Şondan bäri onuň habary bardy
Ne-hä şol ketekden ne ejesinden,
Ýygnan puly bolsa harammy, halal
Agypdy amanat depderçesinden.
Megerem şolardyr – ýagny, bizdiris
Adamkärçiligiň serhedin bozup,
Nebis küşdün oýnap, kellämiz gyzyp,
Kasparowdan ozup, Karpowy pyzyp,
Ynsaby basgylap, wyždany çyzyp,
Ogul-gyza nusga bolmaga derek
Olaň bozulmadyk ahlagyn bozup,
Ne-hä enemiziň ahwalyn sorap,
Ne-de ikibarmak essalam ýazyp,
Hawa, hut bizdiris, diňe bizdiris
Hasrat getirýänler müňlerçe enä
Biz ilkinji nusga, perzentler bolsa
Kopirkadan geçen ikinji nusga – ikinji
günä.
Megerem şeýledir, şonuň üçindir
Alty balasynyň ötüp günäsin,
Müňleriň günäsin ötmeýänligi,
Şübhelenme parasatly enä sen.
Megerem şeýledir, uşak günäden
Halas däl bolsa-da bu juwan nesil,
Senden gören zadyn öwrendi çaga
Öwreden zadyňa jogapkär sensiň!
Atadan hannaslyk öwrenen ogul
Bolup atadan-da beterräk hannas,
Enesin ketege göçürer ertir,
Özüňem ketekden bolmarsyň halas.
Hawa, bu şeýledir, belanyň körügi –
bizdedir.
Çagany näletleme, bes!
Günämiziň asyl nusgasy hakda
Oýlanaryn diýseň enä gulak as.
Ýazypdym nesilleň günäsi hakda,
Özümiz ýadymdan çykan eken tas.
Biahlak gullaryň günäsi hakda
Oýlanaryn diýseň enä gulak as.
Enä gulak asdym, şu goşgyny-da
Men dälde eneleriň paýhasy goşdy,
Şeýdibem döredi ene pähminden
<SPAN lang=EN-US style='font-size:10.5pt;mso-bidi-font-size:12.0pt;font-family:
Times New Roman;mso-fareast-font-family:宋体;mso-font-kerning:1.0pt;mso-ansi-language:
EN-US;mso-fareast-language:ZH-CN;mso-bidi-language:AR-SA'>Ýazmasy kyn düşen
ýene bir goşgy.
sagjabol dost ellerin dert görmesin.gaty gow gogy ekeni..
KERİM AGAN YATAN YERİ YAGTY BOLSUN !