Jorj Kleýson DÖRDÜNJI MELHEM Puluňyzy ýitgiden goraň

Dördünji güni Arkad okuwçylarynyň öňünde:
— Betbagtlyk altynyň lowurdysyna gelýär. Gapjykdaky altyny ýitgiden goramak üçinem juda hatyrjem bolmaly. Şonuň üçin akylly adam özüne Hudaýyň uly pul toplamagyna kömek eder ýaly, ilki azrak pul süýşürip, ýygnap başlaýar – diýip gürrüňe başlady.
Altyny bolan adam göwnüne geňeşip, wagtal-wagtal bar puluny bir ynamdar adamyna berip, maýa goýum edesi gelýär. Ol, köplenç, ynamdar kişini dostlarynyň, garyndaşlarynyň arasyndan gözleýär.
Maýa goýum etmegiň birinji hem esasy ýörelgesi — bu esasy kapitalyň goraglylygyny üpjün etmek. Eger jemlän puluň ýitmek howpy bar bolsa, köp girdeji aljak bolup, töwekgellik etmek gerekmikä?
Men gerek däl diýýärin. Töwekgellik ähli zadyňy elden gidirmegi ähtimal. Ýygnan puluňyzy aýlanyşyga goýbermek üçin, ilki, onuň yzyna dolanyp geljegine doly göz ýetiriň. Çalt baýap bolar diýen ýaly romantiki pikirleriňize maýyl bolaýmaň.
Azap bilen gazanan, ýygnan puluňyzy bir adama ynanyp bermänkäňiz, eger birdenkä işi ugruna bolmasa, soň öwezini dolup, siz bilen hasaplaşyp biljegine we il içinde abraýynyň nähilidigine göz ýetiriň.
Bir işe pul goýmankaňyz, şol işde bolup biläýjek howp-hatarlar hakda ýagşyja pikirleniň.
Meniň birinji goýan maýa goýumym oňuna bolmady, bar pulum köýdi. Azmur atly kerpiççi deňziň alys kenarlaryny etekläp oturan Finikiýadaky Tir söwda merkezinden gymmatbaha daş getirjek diýip, ýygnanjamy alyp gitdi. Haryt getirensoň, söwdadan alan girdejimizi ikä paýlaşmalydyk. Finikiýaly söwdagärler kezzap eken, gymmatbaha daşyň deregine birgiden gyýçak berip goýberipdirler. Bar pulum ýitdi. Men kerpiççä gymmatbaha zat satyn almagy ynanmaly däldigine indi gowy düşünýärin.
Şonuň üçin men size öz tejribäm boýunça maslahat berýärin: öz aklyňyza ynanyp, altyna töwekgellik etmäň. Pul bilen mydama iş salşyp ýören adamlara geňeşiň. Olaryň maslahaty mugtdur, ýöne aljak maslahatyňyz aýlanyşyga goýýan altynyňyza barabardyr. Şeýle maslahat bilen puluňyzy ýitgiden gorap biläýseňiz, ol maslahat, hakykatdanam, altyna barabardyr.
Ine, size igli gapjyk üçin dördünji melhem: puluňyzy ýitgiden goraň, yzyna girdejisi bilen aljakdygyňyza gözüňiz ýetýän işe maýa goýuň. Akylly adamlar bilen maslahatlaşyň. Bilýän adamyň maslahaty altyna deňdir. Goý, olaryň pähim-paýhasy siziň gapjygyňyzy gorasyn.

BÄŞINJI MELHEM
Puluňyzy jaýa goýuň

Bäşilenji güni Arkad okuwçylarynyň öňünde:
— Eger bir adam gazanjynyň ondan dokuz bölegini ýaşaýyş-durmuş harajatlaryna sarp edýän bolsa, eger esasy ýygnaýan puluna degmän, şol dokuz bölegiň ujundanam haýyrly işe maýa goýup bilse, ol adam örän tiz baýar – diýip, söze başlady.
Wawilonda köp adamlaryň maşgalasy hor-homsy günde ýaşaýar. Olaryň kireýine ýaşaýan jaýlarynda aýallarynyň göwnüni açaýjak gül eker ýaly ýeri ýok, çagalaryna-da palçykly köçeden başga oýnara ýer ýokduram welin, hütdük ýaly jaý üçin öý eýelerine ep-esli pul töläp ýörler.
Çagalarynyň arassa ýerde oýnap ulalmaga şerti bolmadyk, aýallarynyň diňe gül ekmäge däl, eýsem, hojalyga gerek gök-bakja ekere ýeri bolmadyk maşgalalaryň hiç biri-de durmuşyň eşretini görüp bilmez.
Öz mellegindäki bagdan injir iýen, öz telärinden üzüm ýolup iýen erkek kişiniň ýüregi suwlydyr. Öz öýi bolsa erkek adam has ynamly hereket edýär, başlan işine dogumly ýapyşýar. Şonuň üçin her bir adamyň üstünde özüni, maşgalasyny gorap duran üçegi — öz öýi bolmalydyr. Eger özi islese, islendik adam jaý edinip bilýär. Patyşamyz şäherimiziň diwaryny allowarra çenli giňeltdi weli, indi mellek ýeri amatly bahalardan alybam bolýar.
Hawa, okuwçylarym, men size ýene aýdýaryn, maşgalasy üçin ýer almak, jaý salmak isleýän adamlary üsseçiler güler ýüz bilen garşylaýarlar. Eger öz hasabyňyza gurluşyga başlamaga ýagdaýyňyz bolmasa, olar size höwes bilen pul bererler.
Jaý gurup bolanyňyzdan soň, öň kireýine ýaşaýan jaýyňyza pul töleýşiňiz ýaly, wagtly-wagtyna üsseçä töläp ugrarsyňyz. Her tölän puluňyz bergiňizi azaldyp, birnäçe ýyldan bergiden çykarsyňyz.
Hususy emlägiňiziň eýesi bolanyňyzdan soň ruhuňyz belent bolar, patyşa töleýän salgydyňyzdan başga hiç zada pul tölemersiňiz.
Onsoň aýalyňyzam derýa kir ýuwmaga ýygyrak gidip, gaýdyşynam ekinlere bermäge çelekli suw alyp gaýdar.
Öz öýi bolan adamyň köp artykmaçlygy bolýandyr. Iň esasysy bolsa ol adam ýaşaýyş-durmuş harajatlaryny azaldyp, gyzyklanýan zatlaryna ýa-da başga hajatlara köpräk pul sowup biler. Ine, şu-da igli gapjyk üçin bäşinji melhem: öz öýüň bolsun.

(Dowamy bar)
Terjime eden: Arslan Alaýew.

Biznes we motiwasiýa