Şyholowjandyr.

Agalar öwliýaň waspyn aýdaýyn,
Allaň bir şehidi Şyholowjandyr.
Ärler-pirler mundan geçdi diýeýin,
Gerçekleriň piri Şyholowjandyr.

Mukaddes – keramat ýurtda dogulan,
Hezreti Alynyň suwun gyzdyran,
Allanyň Rasuly patany beren,
Taryhda at goýan Şyholowjandyr.

Mekgeden ugradyň Medinä geldiň,
Alty aýlap ýol söküp rowana boldyň,
Her demde Alynyň alkyşyn aldyň,
Gudratly öwliýa Şyholowjandyr.

Bir enäniň garyp ýeke balasy,
Şahymerdan seni diläp alasy,
Ol ýetim enäge beren wadasy,
Kysmatyna boýun Şyholowjandyr.

Şyholowjan ölmez diýip gaýdypdyr,
Garry enä wada berip aýdypdyr,
Her kimiň alnyna Allam ýazypdyr,
Ýazygyny kaýyl Şyholowjandyr.

Menzil, menzil ýollarsöküp geldiler,
Gaýry dini Yslam ýola saldylar,
Namaz wagty geldi, suwa ugratdylar,
Şehit bolup galan Şyholowjandyr.

Çeşmeden suw alyp yza dolanan,
Şol mahal duşmanlar öňüni baglan,
Kellesini kesip janyny alan,
Şehit bolup ölen Şyholowjandyr.

Şahymerdan bu habary eşitdi,
Ah urup ylgaýyp bir demde ýetdi,
Gujaklap aglaýyp dat-perýat etdi,
Enäň ýeke ogly Şyholowjandyr.

Halk üýşürip, jenaza okap jaýlady,
Enä wada berdim diýip aglady,
..................................................
..................................................

Lapy keçlik bilen gaýytdy yzyna,
Enäniň öňünde çökdi dyzyna,
Gan aglady wada beren sözüne,
Çöl ýerde jaýlanan Şyholowjandyr.

Ene aglap gitdi Rasul ýanyna
Diýdi: Ýa Muhammet, sen ýet dadyma,
Ýitirdim balamy, äkit ýanyna,
Şehit balam meniň Şyholowjandyr.

Rasul berdi Hezret Ala permany,
Äkitgin enäni görsün balany,
Bize buýruk boldy Allaň halany,
Allanyň şehidi Şyholowjandyr.

Hezret Aly getirdi ol enäni,
Gujaklap aglady bala mazary,
Owaz geldi, diýdi berme azary,
Enä hoş söz beren Şyholowjandyr.

Diýdi: balam seň odyňa çydaman,
Gursagyňy açgyn menem giremen,
Rahat ýerde bolsaň, balam galaman,
Enäni garşy alan Şyholowjandyr.

Açdy Şyholowjan aýak ujyny,
Ene girip gitdi bakman yzyny,
Ýykmady Ýaradan bulaň sözüni,
Enesi ýanynda Şyholowjandyr.

Jesediň jaýlanan türkmen ýurdynda,
Aýatlar okalýar arap dilinde,
Öwliýalaň başy Bagyr ilinde,
Munda şehit ýatan Şyholowjandyr.

Türkmen topragynda ärleriň biri,
Jeset jaýlansada ruhlary diri,
Meriz ýatanlaryň zyýarat ýeri,
Derde derman dilän Şyholowjandyr.

Saňa gelen hassa şypasyn tapar,
Derdinden saýlanyp kyrk günläp ýatar,
.........................................................
..........................................................

Sadaka berýärler seniň başyňda,
Üç mertebe aýlanýarlar daşyňda,
Aýatlar okalýar göni garşyňda,
Dileglere ýardam Şyholowjandyr.

Saňa gelen tapýarlar jana şypalar,
Hudaýdan dileýip, berip wepalar,
Eşidenler gelýär, size sapalar,
Wepaly, sapaly Şyholowjandyr.

Howlyňda ir-iýmiş, bagly bakjaň bar,
Erik, alma, üzüm, armydy hem nar,
Göge boýy ýetýän saýaly çynar,
Alladan rysk dilän Şyholowjandyr.

Niçe asyr bolupdyr, mundan geçmesi,
Derdiňe şypaly, akýan çeşmesi,
Zyýarat edenleň ganyp içmesi,
Suwy derman bolan Şyholowjandyr.

Boz meýdanyň ala ýaşyl öwüsýär,
Sadaka mallaryň bökýär towusýar,
Görmedikler görsem diýip intizar,
Gök maýsaly, bagly Şyholowjandyr.

Köpetdag etegi boldy mekanyň,
Howlyň mydam doly seniň myhmanyň,
Ýüzüň kybla bakýar, nazar mährabyň,
Asly Mekge ýurtly Şyholowjandyr.

Saňa goňşy boldy Nusaý galasy,
Ýykylyp geleniň, galmaz belasy,
Ömür boýy borsyň, dilimiň senasy,
Dilleriň senasy Şyholowjandyr.

Halym şahyr ýazdy taryhyň seniň,
Owal Alla, dadyma ýetişdiň meniň,
Dilegin edewer her bir bendäniň,
Allanyň bir nury Şyholowjandyr.