Tazeleniş

Goçmyrat Orazberdiyew awtory

Seni söýüp, ömri goýdum girewne,
Ýaşap ýörün arzuwlardan daşda men.
Öwürdim men seni dünýäň diregne,
Indi dünýä başga, menem başga men.

Seni söýüp, ýaşadym has başgaça,
Durmuşymy pikirlem deý tertipläp.
Indi köwşüm boýap, reňk berip saça,
Eşiklermem geýýän saýlap, pitikläp.

Geýimlem deý özgerdi haý-höwesim,
Göz öňümde bagtly geljek ýaýyldy.
Bagtam onsoň ýüz bermese bermesin,
Seniň üçin ähli zada taýyndym.

Ýüzüm ýakdy söýgiň ýalyny, howry,
Sen menden täzeçe adam döretdiň.
Maňa sowgat etdiň täze bir ömri
Hemem nädip ýaşamagy öwretdiň