Syrly ýylgyryşlar (tymsal)

Gadym zamanlarda bir dana talyplara sapak berer eken. Çuňňur pähim-paýhasy bilen il-günüň arasynda uly hormatdan peýdalanýan dana şol bir wagtyň özünde söwda bilen hem meşgullanýan eken.
Bir gün sapak gidip durka, bir kişi onuň ýanyna gelip, erbet habary ýetirmeli bolýandygy üçin ötünç sorapdyr we dananyň söwda üçin ugradan gämisiniň gark bolandygyny, ähli mallarynyň hem deňze çümendigini habar beripdir.
Ähli talyplaryň gözi mugallymdamyş. Olary bu gynançly habary mugallymynyň nähili kabul etjekdigi gyzyklandyrypdyr. Ýöne, haýran galýmaly, az salym içini hümledip durandan soň, dana syrly ýylgyrypdyr...
Bu wakadan birnäçe gün geçensoň, ýene sapak wagty dana bir habar gelipdir. Bu gezek oňa batan gäminiň onuň gämisi däldigini buşlapdyrlar. Dana ýene ýylgyrypdyr. Iki ýagdaýa-da ýylgyrmak bilen jogap beren ussadynyň bu bolşuna halys haýran galan talyplaryň biriondan bu ýylgyrmalaryň sebäbini sorapdyr. Ine, şonda dana şeýle diýipdir:
-Gäminiň batandygy baradaky habar gelende, böwrümi diňledim. Meniň dünýe-malym şol gämi bilen deňze çümdi. Eýsem, maňa ahyrky günümde ýoldaş bolup bilmejek baýlygymyň elimden gidenine gynanýanmy? Men munuň üçin jinnek ýaly-da gynanmaýandygymy duýup ýylgyrdym. Gämimiň gark bolmandygyny aýdanlarynda-da ýene böwrümiň sesini diňledim. Eýsem, men dünýe malyna gaýtadan eýe bolanym üçin begendimmi? Ýok, bu gezegem baýlyk kalbymda orun tapyp bilmedi. Şu-da meniň ikinji ýylgyrmama sebäp boldy.