Esger ogluma hat
Körpe, köpden bäri saňa hatam ýazamok. Içiň gysman durýarmy? Gullugyň agramly bölegi ýörişdir. Ir bilen turup, düşegiňi düzedişdirip, ýuwunyp-ardynyp, soňam hatara durýansyňyz. Kakadygym sebäplem bolmagy mümkin, maňa siziň şol hataryňyzdan owadan, janlandyryjy, ruhuňa güýç goşýan gözellik ýok ýaly görünýär. Egin-eşikleriňizde, ýüzüňizde-gözüňizde ýekeje-de artykmaç ýygyrt, salam-sajaklyk, bidüzgünlik – adamy ruhy taýdan çökgün görkezýän ýeke alamatam ýok. Berekella, ýigitler! Çalt hem jebis düzüldiňiz. Araňyzda sähelçe-de – şeýtana sokulara-da ýer ýok. Egin-egine, boýly-boýuna. Her kimiň öz ýeri, öz egindeşi bar. Gurbannazar şahyr durnalaryň hataryna bakyp: „Her ýyl gözlem şu görnüşden doýmaýar” diýip ýazypdyr. Menem siziň hataryňyzy göz öňüme getirip bu setirleri size degişli edip, gaýtalasym geldi. Siziň hataryňyzdan ajaýyp hatar barmy? Her biri öz öýüniň umydy, guwanjy, gerçek ogullar. Her biri iliniň-ýurdunyň goragçysy, geljegi esger ýigitler.
„Kaka, bizi gatyrak öwäýdiňmi?” diýmegin. Ýokardaky setirleri gaýtalap okagyn. Olarda çigit ýalam öwgi ýa-da ösdürme ýokdur. Olaryň manysy ýilikleriňe ornasyn, körpe. Ýaşyl tugy öpüp, Watan öňünde kasam edýärkäň bu duýgy seniň ýüzüňden okalsyn! Bu pursat aýratyn pursatdyr. Öýdekäň sen öýmüziň bezegidiň. Ýet diýen ýerimize ýeterdiň, agalaryňa öýde iş goýmajak bolardyň. „Türkmeniň kiçisi bolandan...” diýip gülüşerdik. Indi sen öýüňde däl. Sana goşuldyň, Watan gullugyna alyndyň. Gulluk ýaşyna ýeten Watan oguly bolduň. „Ogul” sözüne üns berseň „o gul” diýip durandyr. Ogul bäbegi bolan içeride „gul tapdygam” diýilýändir. Çünki ogul – guldur. Öýüniň guly, iliniň-ýurdunyň, Watanynyň guly. Biribaryň guly. „Gul bolmak”, „Gulçulykdan azat bolmak” diýen ýaly düşünjelerem bar. Ýöne bu söze olar ýaly manyda gulçulyk döwründe düşünendirler. Häzir ol wepadarlygy aňladýar. Ömrüňi belli bir maksada – Watanyňa, iliňe-ýurduňa bagyş etmegi, şol maksadyňa gulluk etmegi aňladýar. Watan öňünde gulluk borjuny ýerine ýetirýänler, iň mukaddes wezipäni ýerine ýetirýän ogullardyr.
Ertirlik naharyna barýanam bolsaňyz hataryňyzy bozman, bir adam ýaly ýöräp barýarsyňyz. Size şeýdip ýöremegi ürç edip öwretdiler, sizem öwrendiňiz. Köpçülik bolubam, ýeke-ýekedenem iki-baka kän ýörediňiz. Bu size Watanyňyzyň „ýöremegi” öwredişidir.
Bir ýaşlyja çagakaňyz eneňiz-ataňyz ilkinji ädemleriňize şaýat bolupdy. Ýykylsaňyz galdyryp, ilki iki eliňizden, soň bir eliňizden tutup eslije iş edindiler. Soň siz ýörüp gitdiňiz. Ýykylyp-sürüşenleriňizem, eliňizden tutulyp idekleneniňizem bolmadyk ýaly. Şol günlerden 18 ýyl soň – ýene-de ýöremegi öwrenmek! Aýagyňy ýere dözümli basyp, gysga-da däl, uzynam, ýuwaşam däl, gyssanmajam - ýerlikli, buýsanç bilen, ynamly ýöremek. Ol ýöriş ýodasynyň o çetinden, bu çetine gatnap durmak däldir. Ol seniň süňküňi bekeder. Watan esgeridigiňe bolan buýsanjyňy artdyrar. Özüňe bolan ynamyňy berkider, her ädimiňi töweregiň bilen deň, dürs, batyrgaý, tutanýerli urmagy öwreder.
Durmuşda-da şeýledir, körpe. Ýöne edil siziňki ýaly mese-mälim däldir. Her kim ömür ýoluny başardygyça ynamly, Watan esgeri ýaly buýsanç bilen, töweregine-de aýak bagy bolman ýaşap geçmegiň aladasyndadyr. Siz aýaklaryňyzy ýere batly-batly urýan mahalyňyz özüňizi ine şu ýola, şu ýörişe taýýarlaýansyňyz. Kim bu taýýarlygy gowy geçse, soňam kösenmez...
Bolýar, körpe. Bu zatlary saňa men aýtmamda-da, komandirleriňiz häli-şindi düşündirip durandyr. Ýöne kakaňdan eşitmegiň has başgaça täsir etmegem mümkin diýip aýdaýdym. Meniňki daşyňyzdan guwanmak. Siziň gullugyňyzy edil ýanyňyzda ýaly göz öňüne getirmekden „gözüm doýmansoň” bu haty ýazdym. Ýolda ösüp oturan syrdam derekleri görsemem, dabaralarda hatar-hatar baýdaklary görsemem, hatda durnalar hakynda goşgy okasamam siz ýadyma düşýäňiz...
Kakaň.
Arhiwiň ýagdaýy
● Doly tekst
● 28/28 teswir saklanypdyr
Ýazylan saýty: ertir.com · Çeşme: Web Archive nusgasy — ertir.com, 1 awgust 2012 ý. · Asyl sahypany gör ↗
Teswirler 28
kim azap edip mana ----- goyyaray. Mena azap edip goydum suratlary !
Yhlasly aga shu suratlar size oglunyzy yatladyp buysanjynyzy has yokary goterer diyip umyt etyarin!!!
web brauzynyz suraty achmanyna men gunakar dala, nama monus beryaniz mena dushunemok
SAGJA BOLUN YHLASLY AGA MEN SAHYPA TAZE GELDİM.. DOGRYSY SİZEM KAN BİR TANAMOK... YÖNE GULLUGA GİTMELİ ZAT DİYSELER AY BİR ALAJYNY TAPYP BOLMAZMYKA GİTMEZLİGİN DİYYADİM... KAROÇİ GAÇMAGYN PİKRİNİ EDYADİM... EMMA YAZGYNYZ WATANÇYLYK DUYGYLARYMY OYARYP GİRDİ... NESİP BOLSA OKUW GUTARANSON WAGYT GEÇİRMAN ESGER....👏👍
Gaty gowy ýazylan hat we ogul üçin diýseň oýlandyryjy we täsirlendiriji hat bolsa gerek. Rugsat berseňiz şu temaňyzda men hem öz ýazan hatlarymyň biri bilen paýlaşmakçy. Hat hyýaly oýlanma ýa-da pikir ýöretme.
Esger ýigidime hat.
Salam Esger! Gulluk günleriňe başladyňmy? Seniň gideliň bäri ähli oý-pikirlerim seniň günüň nähili geçýänligi barada. Häli-şindi daň atanyndan başlaýan güniň agşam ýatar wagtyňa çenli nähili geçýänligini gözümiň öňüne getirjek bolup, iň bolmanynda güniň tigirlenip geçişini gözümiň öňünde janlandyrjak bolup dyrjaşýan welin bolaýanokda. Näme üçinka? Soragyň jogaby üçin uzaga gitmegip zerurlygy ýok, sebäbi ýönekeý, biziň maňlaýymyzda gulluk diýen borjuň ýoklugy sebäpli. Gözümiň öňünde janlansa-da gulluk döwürlerine bagyşlanyp düşürilen kinolardan janlanýan ýaly, hamala sen irdenden agşama çenli iki ýana ýöräp serhedi goraýan ýaly ýa bolmasa eliň ýaragly duşmanlardan Watanyňy goramak üçin çöl ýerlerini söküp ýoren ýaly..
Ýadyňdamy ýaňy tanyş bolan wagtlarymyz? Özüň bilen tanyşdyrmagyň ilkinji tapgyrlarynda buýsanç bilen <<Men basym gulluga gitmeli>> diýeniň ýadymdan çykanok. Wagtyň geçmegi bilen we gulluk wagtyň golaýlamagy bilen seniň buýsanç bilen aýdan sözleriňi täzeden aýtmak kynlaşar öýtdüm, Allaha şükür, seniň şol öňkije garaýşyňdy gulluk etmeli borjuňa. Käbir ýaşlaryň aňynda boluşy ýaly <<iki ýylymy biderek gidirmek islämok>> pikiriň asla sende döränini görmedim. Gaýta tersine, men seniň 2 ýyl öz durmuşyňdan aýry bir durmuşda ýaşamalydygyňa hopugyberýärdim. Senem meni alada goýmazlyga derek has hem gorkuzýardyň..
Gulluk wagtyň ýakynlaşdygyça bizi aýra saljak iki ýyl seni-de alada goýup başlady, ýöne sen mert oglan, maňa hiç syr bildirmezdiň. Ertiri gitmeli diýilen güni seni aljyratdymy nämemi, meniň saňa diýmeli sözlerimi aljyraňlykdan ýaňa özüň diýdiň oturyberdiň-ä! <<Sen maňa garaşarmyň?>> diýen soraga derek <<Men saňa garaşaryn, seni göresimä geler>> diýdiň. Maňa ol diýenleriňe ýylgyryp, kellämi ýaýkaýmak galdy. Kellämi egip <<hawa>> diýen jogaby sessiz bermeginä berdim welin, aljyraňlykdan ýaňa <<soragyma jogaby hem bermedi diýip öýkeläýenä dälsiň-dä?>> Ertesi ir bilen gidenligiňi bilýärdim, emma uzak ýoluňa ugramazdan öň ýene bir gezek <<saglykda görüşeli>> diýip habar tutupsyň, onda-da sessiz galanym üçin bagyşla..Sebäbi ol gün ähli zat seniň gidenligiňe we seni uzak wagt görmejekligime gynanyp duran ýaly, içimdäki howsalany basmak üçin işlerim bilen gümrä boluberipdim. Gideniňden soň bir aýa golaý habar bolmady. Habar bolmasa-da günde daň bilen oýanýanyňy bilýärdim. Gullukdan öň hem hiç haçan irden sagat 6-dan soňa galmaňsoň, gullugyň ir turmak aladasy saňa hiç ýük bolmadygyny bilýärdim. Ir bilen irdenlikden soň nämelere gümrä bolunýarka diýip bir başdan göz öňünde janlandyrjak bolýardym: şu wagt ylgaýarmykaň? Ýa eliň ýaragly bir yerleriň goragyndamykaň? Ýa bolmasa bu zatlaryň ählisiniň dogry ýerine ýetirilişini öwrenip ýörmükäň? Bir gün jigimden gyzyklandym, <<jigim, gullukda irä turulýandyr, agşamlaryna-da giç ýatylýarmyka?>> diýip, giç däl eken. Giç däldigini bilip şeýle bir begendim, çünki sen ýöne wagtlary gullukdaky ýaly ukyny alaňokdyň. <<Gulluk wagty häzirden gowudyr, ine görersiň, men ol ýerde <<dynç alyp gelerin>> diýýänleriň ýadyma düşüp gitdi.
Wagt diýeniňem geçip dur. Hawa, gulluk 2 gün ýa 2 aý däl, gulluk tegelek 1 ýyl. Gullugy başlanyň ýaňy ýalydy, ine hä diýmän dolanyp gelmelisiň. Bu aýralyk döwüriň her sagady bir ýyl kimin geçdi diýsem ýalançy bolaryn. Özüň diýmezdiňmi <<Gyz mert bolmaly!>> diýip?! Şonuň üçin bu aýralyga ajy ýa agyr diýip zeýrenip oturmana özüme rugsat bermedim! Mert geçirdim. Meniň bar aladam seniň üçin şu döwüriň agyr geçmezligidi, ýöne sendenem arkaýyndym, sebabi seniň mert oglandygyňy bilýärdim. Seniň dolanyp gelmeli wagtyňa çenli sanalgyja gün galdy. Bilýärmiň meniň iň uly arzuwymy? Ýadyňa düşýärmi seniň gulluga gitmeziňden öň saňa sowgat eden tahýam? Sen şonda <<men dolanyp gelýänçäm sende dursun, maňa seniň sowgadyňy saklap ber>> diýipdiň? Ana şol tahýany gulluk borjuňy tamamlap gelen güniň, begenjiňi buşlamana geleniňde öz ellerim bilen başyňa geýdirmek. Sen Watany goraýan döwüriň menem seniň maňa ynanyp giden sowgadyňy goradym. Seniň dolanyp gelmegiňe indi diňe aý däl, gün we sagat sanap garaşýaryn...
Buýsanç bilen <<Watan gullugyny berjaý etdim!>> diýip buşlygyňa garaşýan tahýa goragçyň.
Manyly hat ekendao 🙂 biza gullukda hat gelse begenerdik.,hat gelse birhili özumi ur$da Watanym ucin ur$up ýören ýaly duýgulanardymdayt. @Aslymarlyn aydy$y ýaly: dogrysy sheyle hat yazyan kaka hem gaty az...
Salamälik yhlasly aga,bu hat mende gaty uly täsir galdyrdy.Diñe bu däl,beýleki döredijiligiñiz hem ýüregimde yz goýýar.Aperin size,körpäñizem sag-amanja dolanyp gelsin.Sagja boluñ ýetireniñiz üçin