Esger ogluma hat

Körpe, köpden bäri saňa hatam ýazamok. Içiň gysman durýarmy? Gullugyň agramly bölegi ýörişdir. Ir bilen turup, düşegiňi düzedişdirip, ýuwunyp-ardynyp, soňam hatara durýansyňyz. Kakadygym sebäplem bolmagy mümkin, maňa siziň şol hataryňyzdan owadan, janlandyryjy, ruhuňa güýç goşýan gözellik ýok ýaly görünýär. Egin-eşikleriňizde, ýüzüňizde-gözüňizde ýekeje-de artykmaç ýygyrt, salam-sajaklyk, bidüzgünlik – adamy ruhy taýdan çökgün görkezýän ýeke alamatam ýok. Berekella, ýigitler! Çalt hem jebis düzüldiňiz. Araňyzda sähelçe-de – şeýtana sokulara-da ýer ýok. Egin-egine, boýly-boýuna. Her kimiň öz ýeri, öz egindeşi bar. Gurbannazar şahyr durnalaryň hataryna bakyp: „Her ýyl gözlem şu görnüşden doýmaýar” diýip ýazypdyr. Menem siziň hataryňyzy göz öňüme getirip bu setirleri size degişli edip, gaýtalasym geldi. Siziň hataryňyzdan ajaýyp hatar barmy? Her biri öz öýüniň umydy, guwanjy, gerçek ogullar. Her biri iliniň-ýurdunyň goragçysy, geljegi esger ýigitler.
„Kaka, bizi gatyrak öwäýdiňmi?” diýmegin. Ýokardaky setirleri gaýtalap okagyn. Olarda çigit ýalam öwgi ýa-da ösdürme ýokdur. Olaryň manysy ýilikleriňe ornasyn, körpe. Ýaşyl tugy öpüp, Watan öňünde kasam edýärkäň bu duýgy seniň ýüzüňden okalsyn! Bu pursat aýratyn pursatdyr. Öýdekäň sen öýmüziň bezegidiň. Ýet diýen ýerimize ýeterdiň, agalaryňa öýde iş goýmajak bolardyň. „Türkmeniň kiçisi bolandan...” diýip gülüşerdik. Indi sen öýüňde däl. Sana goşuldyň, Watan gullugyna alyndyň. Gulluk ýaşyna ýeten Watan oguly bolduň. „Ogul” sözüne üns berseň „o gul” diýip durandyr. Ogul bäbegi bolan içeride „gul tapdygam” diýilýändir. Çünki ogul – guldur. Öýüniň guly, iliniň-ýurdunyň, Watanynyň guly. Biribaryň guly. „Gul bolmak”, „Gulçulykdan azat bolmak” diýen ýaly düşünjelerem bar. Ýöne bu söze olar ýaly manyda gulçulyk döwründe düşünendirler. Häzir ol wepadarlygy aňladýar. Ömrüňi belli bir maksada – Watanyňa, iliňe-ýurduňa bagyş etmegi, şol maksadyňa gulluk etmegi aňladýar. Watan öňünde gulluk borjuny ýerine ýetirýänler, iň mukaddes wezipäni ýerine ýetirýän ogullardyr.
Ertirlik naharyna barýanam bolsaňyz hataryňyzy bozman, bir adam ýaly ýöräp barýarsyňyz. Size şeýdip ýöremegi ürç edip öwretdiler, sizem öwrendiňiz. Köpçülik bolubam, ýeke-ýekedenem iki-baka kän ýörediňiz. Bu size Watanyňyzyň „ýöremegi” öwredişidir.
Bir ýaşlyja çagakaňyz eneňiz-ataňyz ilkinji ädemleriňize şaýat bolupdy. Ýykylsaňyz galdyryp, ilki iki eliňizden, soň bir eliňizden tutup eslije iş edindiler. Soň siz ýörüp gitdiňiz. Ýykylyp-sürüşenleriňizem, eliňizden tutulyp idekleneniňizem bolmadyk ýaly. Şol günlerden 18 ýyl soň – ýene-de ýöremegi öwrenmek! Aýagyňy ýere dözümli basyp, gysga-da däl, uzynam, ýuwaşam däl, gyssanmajam - ýerlikli, buýsanç bilen, ynamly ýöremek. Ol ýöriş ýodasynyň o çetinden, bu çetine gatnap durmak däldir. Ol seniň süňküňi bekeder. Watan esgeridigiňe bolan buýsanjyňy artdyrar. Özüňe bolan ynamyňy berkider, her ädimiňi töweregiň bilen deň, dürs, batyrgaý, tutanýerli urmagy öwreder.
Durmuşda-da şeýledir, körpe. Ýöne edil siziňki ýaly mese-mälim däldir. Her kim ömür ýoluny başardygyça ynamly, Watan esgeri ýaly buýsanç bilen, töweregine-de aýak bagy bolman ýaşap geçmegiň aladasyndadyr. Siz aýaklaryňyzy ýere batly-batly urýan mahalyňyz özüňizi ine şu ýola, şu ýörişe taýýarlaýansyňyz. Kim bu taýýarlygy gowy geçse, soňam kösenmez...
Bolýar, körpe. Bu zatlary saňa men aýtmamda-da, komandirleriňiz häli-şindi düşündirip durandyr. Ýöne kakaňdan eşitmegiň has başgaça täsir etmegem mümkin diýip aýdaýdym. Meniňki daşyňyzdan guwanmak. Siziň gullugyňyzy edil ýanyňyzda ýaly göz öňüne getirmekden „gözüm doýmansoň” bu haty ýazdym. Ýolda ösüp oturan syrdam derekleri görsemem, dabaralarda hatar-hatar baýdaklary görsemem, hatda durnalar hakynda goşgy okasamam siz ýadyma düşýäňiz...

Kakaň.