YŠYKSYZ PENJIRE...

Yşyksyz penjire...

Il içinden gözläp tapyp bilmedigiňi käte ýekelik, ýeke galmak peşgeş berilýär. Öňe näçe togtaman ilerläýin diýseňem, şol bir soraglaryň deňinde säginmeli bolýarsyň. Durup bir, gidip barýan ýoluňa göz aylaýaň, birem gelýän ýeriňe...

Şuwagt sen geçmişde arzuw eden ýeriňdemi?
Ýasama şekilleriň nikabyny syryp, özüň bolup ýaşamagy başarýaňmy?
— Onda neçün käte gijeler seni saňa gürrüň berýän aýdymlary diňläp dümtünip oturýarsyň, hamala, özüňi ýat ýerde duýýan ýaly. Sebäpsiz ýere ýüregiň gysýar, sebäpsiz küýseýärsiň, özgeler bilen paýlaşyp bilmedik sözleriň gözleriňden syrygýar?! Näme sebäpden?...

Şuwagt sen geçmişde arzuw eden ýeriňdemi?!

***

"Men adammy, men asylly adammy?!"
Ata Atajanow

Mahirli söze, ýylgyryşa, hoş garaýşa mätäç, göwnündäki boşluklary doldurmak üçin çyrpynýan ynsan ogly!
Kalbyň elmydama hoş söze ýer aýyrýar.
Eger sen isleseň, bagyşlap bilýärsiň, ýyllarboýy damja-damja artan kinäňi. Eger islemeseň kiçijik hadysany ulaldyp, ýyllar bilen göwnüñde göterýän. Olam wagt geçdikçe ulalýar, ulalýar, ulalýar...Onuň başyny-da tapyp bilmeýäň ahyryny-da...
Onsoň nädip kalbyň hoş söze, ýylgyryşa teşne bolmasyn?!

***

GÖZLEGIM
Gijelerne göge bakyp pyşyrdan
Meniň jahyl arzuwlarma diň salan,
“Belkilerden” şikes alan islegme
Jan beriji söýgiň bilen dem salan
Sen ekeniň.

Sen ekeniň aýap goýan sazlarym –
Böwet bolan teň bolmagna halymyň.
Sen ekeniň sebäpkäri ozaldan
Bir üytgeşik eşdilmegne adymyň.

Şowly günlerimde zemine çeken,
Şowsuz günlerimde göteren arşa
Sen ekeniň, sen ekeniň, ýakynym,
Mynasyp görmedik gamgyn garaýşa...

Meredow Gurbanmyrat