DÜZ DABAN

Çagalygyndan bäri bütün arzuwlary harby gullukda general bolmakdy. Akylly we başarjaňdy, onuň häsiýetleri general bolmaga-da ukyplydy. Munuň üçin her gün Alladan dilg edip Oňa şükrederdi.
  Bir gün mekdebi tamamlap milli goşuna girmek üçin ýüz tutdy. Yüz tutmasy yzyna gaýtaryldy. Sebäbi onuň dabany düzdi. Näçe jan etse-de hyýallaryndan ýüz öwürmeli boldy.
  Örän gynanypdy. Durmuşdan we durmuşyndan öýkeleýärdi. Özüni ýalňyz hasaplaýardy. Öňki dileg eden Ýaradanyndan-da öýkelemäge başlady. Ýyllarja dileg edipdi. Ýöne Ýaradan oňuň dilegini kabul etmändir. Kabul edilmejek bolsa onda dileg edip oturmagyň näme geregi bar diýip düşündi. Şol günden soňra Ýaradanyna dilegem etmedi. 
  Generallyk arzuwy başa barmansoň uniwersitede girip doktor boldy. Ýyllar geçdi, örän başarjaň bir hirigurg bolup ýetişdi. Iň kyn operasiýalarda ilkinji onuň ady agzalýardy. Ömürlerinden umydy üzülen hassalar onuň elinden şipa tapyp, ömürlerine dowam edýärdiler. Ýyllar geçdigiçe müňlerje ömür halas edýärdi. Eneleri, atalary, çagajyklary ölümden halas edýärdi. 
  Ýyllar geçip doktor kyrk ýaşlaryna geldi. Bir gün gözlerini ýumup, ýary uýkuda, ýary oýa halda şol öňki öýkelän Ýaradanyna dileglerini näme üçin kabul etmedigini sorady. Edil şol wagt hem ruhundan bir ses ony çagalyk ýyllaryna äkitdi. Kinonyň lentasyndan geçýän ýaly ähli wakalar göz öňünden geçmäge başlady. 
  Ilki general bolmak üçin Ýaradanyna dileg edip oturyşyny görýär. Soňra ol ofisser bolýar. Mert we batyrgaýlykda taýy ýokdy. Esgerleri-de özi ýaly ýüreklidi. Ilkinji söweşine girýärdi. Aldym-berdimli söweş gidýärdi. Birden edil ýanjagazynda bir bomba ýarylýar we ol bölek bölek bolýar. Soňra gap-garaňkylyk... Tabyt bilen öýüne getirýärler. Maşgalasy onuň üçin aglaşyp durkalar ruhundan gelen ses oňa şeýle seslendi:
  - Indi hem sen islemeseň-de ylahy planyň nädip bolýanlygyna seret.  
  Gözlerini täzeden ýumdy. Ýene bir kino lentasy göz öňünden geçip başlady. Indi öz hakky durmuşyny görýärdi. Doktor boluşy, hasalary halas edişi, olaryň şatlygyny görüp şatlanyşy lentadan geçýärdi. Bu şatlykly pursatlar onuň doktor bolmagy bilen amala aşdy. Birden hassalaryň arasynda bir çagajyk gördi. Onuň hem ofisser bolmak arzuwy bardy, ýöne keseli muňa ýol berenokdy. Çaganyň arzuwlaryndan bihabardy, onuň keselini bejerip ony halas etdi. Şol halas edilen çagajyk soňra ulalyp general boldy. 
  Edil şol wagt gözlerini hakykata açdy. Indi düşündi welin Ýaradany ony hiç wagt unutmandyr ekeni. Dilegleri jogapsyz galmandyr. Kabul edilmedik ýaly bolup görünse-de has peýdaly iş bolup kabul edilipdir. Bu zatlara doly düşünip ýyllardyr öýkeläp ýören Ýaradanyna ýüzlenip dileg etmäge başlady. Dileg edende-de kabul bolsun diýip däl-de, Ýaradany bilen aralarynda lezzetli we syrly dostluk bagy bolany üçin.