ÝALŇYZLYK

Ol maşgalanyň ýeke perzendidi. Bir ýaşyny dolduranynda gürlemäge başlapdy. İlkinji öwrenen sözi bolsa, oňa dün ýäde iň eziz bolan mähribanynyň ady bolupdy: “Eje”....
  Balajyk ejesiniň garnynda eýlenendigini bilmese-de, ejesini özünden aýrylmaz bir parça hasaplap, onsuz durmuşy asla göz öňüne getirip bilmeýärdi. Ylaýta-da ejesiniň süýdini emip, onuň gyzgyn gujagynda uklamak we oýlananynda ýene-de onuň başujunda oturandygyny görmek bolsa, özboluşly bir bagtdy.
  Balajygyň bu şatlygy uzaga çekmedi. Ejesi “Gyzym bir eşretde ýaşasyn” diýip, işe ýerleşdi. Indi balajyk mundan baýläk her gezek ertir bilen oýananynda, ony telim gezekler ogşap, kalbyna röwşenlik çaýýan ejesine derek, gurjaklary hem-de enekesini görýärdi. Bu ýagdaýda gyzjagazyň edip biläýjek ýekeje zady aglamakdy.
  Balajyk bir aýyň içinde aglamazlygada öwrenişipdi. Ol demsaýyn ejesini ýatlap, ol gelýänçä telewizoryň başynda wagtyny geçirýärdi.
  Kakasy hem oňa sowuk garaýardy. Asla ýüz berenokdy. Şonuň üçin hem, onuň ýaraly kalbynyň ýeke-täk tejellisi ejesidi. Emma indi ejesi hem gelip-gelmänkä nahar taýarlamak bilen bolýardy. Howul-hara iýdirip-içirip, ony otagyna ugradýardy. Balajyk bolsa ýane-de aglamazlyga çalyşýardy. Bir wagtlar ejesinden eşiden hüwdülerine hiňlenip, ýekeje özi otagynda uklap galýardy.
  Iki ýaşa aýak basanynda, ejesi oňa bir guş satyn alyp beripdi. Kapasadaky guşjagaz oňa güýmanje bolýardy. Ýüzünden gar ýagýan enekesine derek, indi ol şol guşjagaz bilen gürleşýärdi.
- Ejem işe gitdi, ejem işe gitdi.... – diýip, hergiz guşjagazy bilen derdinişýärdi. Ejesi bilen kakasy bolsa iş bilen garabaşynagaýdy. Bir gün kapasa açyk galypdyr. Şonda guşjagaz hem ony taşlap, uzak diýarlara uçup gidiberdi. Guşjagazyň uçup barýanyny gören gyzjagazyň didesinden iki damja ýaş togalanyp gaýtdy. Gözden ýitip barýan guşuň yzyndan garap durşuna:
- Guşjagaz hem işe gitdi, guşjagaz hem-diýip aglady.  
  Zaman1/Nowruz 6. 2004