TDU-nyn fakultetleri!

TÜRKMEN DILI WE EDEBIÝATY FAKULTETI
Türkmen dili we edebiýaty fakulteti iň ilkinji döredilen fakultetleriň biridir. Fakultetde türkmen dili, türkmen edebiýaty we žurnalistika kafedralary bar. Olar türkmen diliniň we edebiýatynyň meselelerine degişli ylmy-amaly işleri döwrüň talaplaryna laýyklykda alyp barýarlar. Dil we edebiýat ylymlarynyň doktorlary,professorlar J.Allakow, E.Aşyrowa ýaly öz işiniň ussatlary fakultetiň talyplaryna we ýaş mugallymlaryna halypalyk edýärler.
Fakultetiň talyplary türkmen dili we edebiýaty, žurnalistika hünärleri boýunça okadylyp, türkmen dili we edebiýaty mugallymy, žurnalist kärlerini ele alýarlar, şeýle hem olar jemgyýetçilik ugrukmaly dersleri, tebigaty goramak, Türkmenistanyň kanunçylygy, türkmen jemgyýetiniň ösüşinde tehnologiýanyň orny, Türkmenistanyň taryhy we beýleki dersler öwrenýärler.
Fakultetiň uçurymlary bilim, ylym ojaklarynda, habar beriş serişdelerinde hem-de beýleki edara-kärhanalarda zähmet çekýärler.

DAŞARY ÝURT DILLERI FAKULTETI
Fakultetde 4 kafedra: iňlis dili, roman-german dilleri, gündogar dilleri, daşary ýurt edebiýaty kafedralary bar.
Fakultetde iňlis dili we edebiýaty, nemes dili we edebiýaty, fransuz dili we edebiýaty, italýan dili we edebiýaty, hytaý dili we edebiýaty, arap dili we edebiýaty, pars dili we edebiýaty, türk dili we edebiýaty boýunça hünärmenler taýýarlanylýar. Olara dilçi we edebiýatçy, mugallym käri berilýär. Professor M.Begliýew, dosentler K.Agaýew, R.Mustakow, A.Almämmedow, A.Arrykow ýaly diňe bir diýarymyzda däl, eýsem daşary ýurtlarda hem tanalýan halypalar fakultetiň talyplaryna ders berýärler.
Kafedralarda dil gatnaşyklarynyň taryhy we ösüşi boýunça ylmy-barlag işleri alnyp barylýar, sözlükler, okuw kitaplary, okuw-usuly gollanmalar taýýarlanylýar.
Fakultetiň uçurymlary ylym-bilim, medeniýet ulgamynda, köpçülikleýin habar beriş serişdelerinde we beýleki döwlet edaralarynda hem-de jemgyýetçilik guramalarynda işleýärler.

HUKUK FAKULTETI
Fakultetde 5 kafedra: raýat hukugy kafedrasy, jenaýat hukugy kafedrasy, konstitusiýa hukugy, daşary ýurt dilleri kafedrasy, rus dili kafedrasy.
Fakultetde talyplara hukuk işi ugry boýunça bilim berilýär. Olara esasy hünär ugurlaryna degişli derslerden başga-da Türkmenistanyň taryhy, türkmen jemgyýetiniň ösüşinde tehnologiýanyň orny ýaly we beýleki dersler öwredilýär. Fakultetiň uçurymlaryna hukuk öwreniş hünäri boýunça hukukçy käri berilýär.
Fakultetde ýörite dersler boýnça sapak berýän dosentler I.Bekiýewiň, B.Marjykowyň M.Tyllaýewiň,G.Myradowanyň, A.Hezretowyň, T.Diwanowanyň alyp barýan işleri bellemäge mynasypdyr.
Fakultetde Türkmenistanyň döwlet we hukuk gurluşy, Türkmenistanyň halkara jemgyýetçiliginde tutýan orny, jenaýat we raýat kanunçylygyny, maşgala kanunçylygyny, zähmet kanunçylygyny, jenaýat we raýat prosessual kanunçylygyny kämilleşdirmek ýaly ugurlar boýunça ylmy-barlag işleri alnyp barylýar.
Daşary ýurt dilleri we rus dili kafedralarynda hünär ugrundan dil taýýarlygyny kämilleşdirmegiň meseleleri, esasan hem, iňlis we rus dillerini öwretmegiň usulyýet aýratynlyklary boýunça okuw gollanmasynyň üstünde işlenilýär.
Fakultetde ýörite hukuk kitaphanasy bar.
Fakultetiň uçurymlary Türkmenistanyň döwlet edaralarynda, Daşary işler, Adalat ministrliklerinde, hukuk goraýjy edaralarda we beýleki guramalarda zähmet çekýärler.

TARYH FAKULTETI
Fakultetde 3 kafedra: Türkmenistanyň taryhy, dünýä taryhy, arheologiýa we etnologiýa kafedralary bar.
Fakultetde Türkmenistanyň taryhy, arheologiýa, etnologiýa, syýasaty öwreniş, Gündogary öwreniş, ylahyýet ugry boýunça hünärmenler taýýarlanylýar.
Dünýä arheologlarynyň arasynda hormatdan peýdalanýan, taryh ylymlarynyň doktory, professor A.Gubaýew fakultetiň ýaşlarynyň halypasydyr. Talyplar hem, ýaş mugallymlar hem alyp barýan ylmy işlerinde onuň goldawyndan peýdalanýarlar.
Fakultetiň talyplarynyň hünärini çuňlaşdyrmak maksady bilen, esasy hünär ugrundan geçilýän derslerden başga-da olara hytaý, pars, arap,türk, rus we iňlis dilleri öwredilýär.
Türkmenistanyň taryhy kafedrasynda Türkmenistanyň taryhynyň dürli döwürlerine degişli ylmy-barlag işleri alnyp barylýar.
Dünýä taryhy kafedrasynda dünýä türkmenleriniň taryhy, türkmenleriň dünýä ýaýraýşy boýunça ylmy-amaly işler ýerine ýetirilýär.
Arheologiýa we etnologiýa kafedrasynda türkmen medeniýetiniň we sungatynyň dünýä siwilizasiýasyna goşan goşandy: Jeýtun, Änew, Marguş, Oguzboý, Parfiýa, türkmen-seljuk medeniýeti barada ylmy-barlag, gazuw-agtaryş işleri amala aşyrylýar.

Fakultetiň uçurymlaryna taryhçy mugallym, ylahyýetçi-mugallym, syýasaty öwreniji, gündogary öwreniji, mugallym käri berilýär. Olar ýurdumyzyň ylym-bilim ulgamynda, döwlet edaralarynda we jemgyýetçilik guramalarynda işläp bilýärler.

HIMIÝA-BIOLOGIÝA FAKULTETI
Fakultet ýokary okuw mekdebimiziň iň irki (1931-nji ýylda esaslandyrylan) fakultetleriniň biri hasaplanýar.
Fakultetde 5 kafedra: botanika kafedrasy, zoologiýa kafedrasy, organiki we fizkolloid himiýa kafedrasy, organiki däl we analitiki himiýa kafedrasy we psihologiýa kafedrasy bar.
Fakultetde jemi 3 hünär boýunça: biologiýa, himiýa, psihologiýa boýunça hünärmenler taýýarlanylýar.
Himiýa-biologiýa fakultetinde öz işiniň ussady hökmünde diýarymyzda hem beýleki ýurtlaryň ylmy jemgyýetçiligi tarapyndan ykrar edilen alymlar, biologiýa ylymlarynyň doktory, professor M.Amanowa, biologiýa ylymlarynyň doktory, psihologiýa ylymlarynyň doktory, professor B.Basarow, professor I.Rustamow, himiýa ylymlarynyň doktory, dosent N.Gullyýew dagy zähmet çekýärler.
Biologiýa hünäri boýunça okaýan talyplar botanikadan we zoologiýadan ýöriteleşýärler hem-de ýurdumyzyň halk hojalygynyň dürli pudaklarynda (Tebigaty goramak, Oba hojalyk, Saglygy goraýyş we derman senagaty ministrliklerinde), ylmy edaralarda, ýokary, orta hünärment we umumy bilim berýän orta mekdeplerde işlemäge taýýarlanýar.
Himiýa hünäri boýunça okaýan talyplar organiki däl we organiki himiýadan ýöriteleşýärler. Olara himik, himiýa mugallymy käri berilýär. Uçurymlar “Türkmendökünhimiýa” döwlet konserniniñ edara-kärhanalarynda, Saglygy goraýyş we derman senagaty ministrliginde, ylmy edaralarda, ýurdumyzyň ýokary, orta hünärment we umumybilim berýän orta mekdeplerinde mugallym wezipesinde işleýärler.
Psihologiýa hünäri boýunça okaýan talyplar umumy we durmuş psihologiýasy boýunça ýöriteleşýärler. Olar okuwy tamamlanlaryndan soňra ýurdumyzyň ýokary okuw mekdeplerine, psihologiýa gulluklaryna, ylmy edaralara işe iberilýär.

GEOGRAFIÝA FAKULTETI
Geografiýa hünäri boýunça okaýan talyplar fiziki we ykdysady geografiýa ugurlary boýunça ýöriteleşýärler. Olar Türkmenistanyň Tebigaty goramak, Oba hojalygy, Suw hojalygy ministrlikleriniň dürli pudaklarynda, “Türkmenmillihasabat” institutynda, beýleki ylmy edaralarda, ýokary okuw mekdeplerde, umumy bilim berýän orta mekdeplerde işleýärler.
Kartografiýa hünäri boýunça okaýan talyplar topografiýa we geodeziýa ugurlary boýunça ýöriteleşýärler. Olar okuwyny tamamlanlaryndan soňra Türkmenistanyň Ministrler Kabinetiniň ýanyndaky Kartografiýa, geodeziýa we kadastr baradaky döwlet komitetine, häkimlikleriň degişli bölümlerine, Türkmenistanyň Goranmak ministrliginiň degişli gulluklaryna, ýokary okuw mekdeplerine, umumy bilim berýän orta mekdeplere işe iberilýär.
Daşky gurşawy öwreniş hünäri boýunça okaýan talyplar umumy we amaly ekologiýa ugurlary boýunça ýöriteleşýärler. Uçurymlar TürkmenistanyňTebigaty goramak ministrliginde, döwlet goraghanalarynda, ylmy we önümçilik edaralarda işleýärler.
Meteorologiýa hünäri boýunça okaýan talyplar sinoptik, awiasiýa meteorologiýasy, gidrologiýa boýunça ýöriteleşýärler. Hünäri tamamlanlar Türkmenistanyň Ministrler Kabinetiniň ýanyndaky Gidrometeorologiýa baradaky döwlet komitetiniň gulluklarynda işleýärler.

FIZIKA FAKULTETI
Fakultetde 3 kafedra: radiofizika we elektronika, umumy fizika, nazary we eksperimental fizika kafedralary bar. Kafedralarda fizikanyň dürli ugurlary boýunça ylmy-barlag işleri alnyp barylýar.
Fizika fakulteti ylmy mümkinçiligi boýunça uniwersitetde iň kuwwatly fakultetleriň biridir. Bu fakultetde öz käriniň ussatlary professorlar G. Toýlyýew, S.Ýazlyýew, T.Ýusupow, M.Serginow, M.Gurbannyýazow ýaşlara bilim we terbiýe bermekde janyny aýaman zähmet çekýärler.
Fakultetiň uçurymlaryna fizika, radiofizika we elektronika boýunça hünärler berilýär. Olar bilim ulgamynda, ylmy-barlag institutlarynda, aragatnaşyk ulgamynyň edaralarynda dürli hünärlerde işläp bilýärler.

MATEMATIKA FAKULTETI
Matematika fakultetinde 4 sany kafedra işleýär. Olar: umumy matematika, matematiki analiz, algebra we ähtimallyklar nazaryýeti, amaly matematika we informatika kafedralary.
Fakultetde talyplara matematikanyň dürli ugurlaryndan çuňňur bilim berilýär.
Şeýle hem talyplara hünäriniň esasy derslerinden başga Türkmenistanyň taryhy, türkmen jemgyýetiniň ösüşinde tehnologiýanyň orny, rus dili, iňlis dili we başga-da birnäçe wajyp dersler öwredilýär.
Uçurymlar orta we ýokary okuw mekdeplerinde matematika, informatika mugallymlary, ylmy-barlag institutlarynda, ylmy we kompýuter merkezlerinde ylmy işgär, önümçilikde, habar beriş we dolandyryş edaralarynda, banklarda kompýuter usullaryny düzýän hünärmenler hökmünde işläp bilerler.