Täze döwür—täze çykdajylar

Eger üns berýän bolsaňyz, hususy firmalaryň önümleriniň etiketkalarynda "Galkynyş zamanasynyň önümi" diýen ýazgy bardyr. Bu sanepidinstansiýa hem-de salgyt gullugynyň hususy telekeçilerden edýän talaby. Alty ýyl mundan ozal şol harytlaryň ýüzünde Altyn asyryň önümi diýlen ýazgylar bardy. Soň Altyn asyrymyz gutaryp, Galkynyş zamanasy başlansoň, önümleriň ýüzüne Galkynyş zamanasynyň önümi diýip ýazmak buýruldy. Harytlaryň etiketkalary üçin ummasyz pullar çykarylýar. Ýöne muňa garamazdan, salgyt gullugy bilen sanepidinstansiýanyň buýrugyny telekeçilere ýerine ýetirmekden başga alaç ýok. Altyn asyryň önümi diýlen etiketkalaryny zibile zyňyp, Galkynyş eýýamynyň önümi diýen täze etiketkalary zakaz etmeli boldular. 5 ýyl mundan öňki kellagyry telekeçileriň başyndan ýene-de indi. Salgyt gullugyndan pereregistrasiýa boljak bolýan telekeçiler önüm öndürýän etiketkalarynyň ýüzüne Berkarar döwletiň Bagtyýarlyk döwrüniň önümi diýlen ýaly zatlary ýazmaly edildi. Entäk bu problemalar bilen telekeçileriň az-owlak bölegi ýüzbe-ýüz. Ýöne ýylyň ahyryna çenli beýleki telekeçilkeriň hem pereregistrasiýasy bolar. Belki oňa çenli beýlekileriňkiň etiketkalary tamamlansynda. Ýogsa artykmaç çykdajy ýene halkyň jübüsine urjak. Etiketkaň bahasy haryda müner.