Döwrümiz iman döwrüdir

Geçen asyrda
ýaşap geçen bir alym, döwrümiz iman döwrüdir diýpdir. Imanyň hem döwrü bolýan
ekenmi? Hemme wagt iman döwrü dälmi? Emma alym diýýän bolsa munyň bir manysy
bardyr diýp pikir etdim. Bu soraglar bilen ýaşadym, aradan ençeme wagt geçdi.
Hiç garaşmadyk bir wagtymda, belki de o soraglary ýatdan çykarypdymam, bir
gazetadaky ýazgy ünsimi çekdi.

“Ýürekleriň sarsan döwründe, duýgylaryň musulman bolsada
zehinleriň kapyr ýaly pikir edýän döwründe, imanyň durmuşy gönükdirmeýän döwründe
imana dört eliň bilen ýapyşmalydyr.”

Alymyň döwrümize iman
döwrü diýmeginiň manysyny düşindim.Iman
alty direkli bir galadyr, onyň goraýjy dewary namazdyr, ybadatlardyr. Dewar
ýykyldy, duşman göniden göni galanyň içinde, galanyň direklerine hujum edip
başlady, beýle bir döwürde adamzat bu iň ähmiýetli işini taşlap daşardaky
meseleler bilen meşgul bolmaly däldir. Zamana imanyňy goramak zamanasydyr.

Musulmanlyk diňe
men musulman diýmek däldir. Ilki bilen ýürekden tassyk etmek, iman etmek
zerurdyr. Ondan soň iman eden adam zehnine, aklyna hem imana görä şekil
bermelidir. Hereketlerini ýaşaýşyny hem bu imana esaslandyrmalydyr.

Adamyny adam
edýän 3 hususyýeti bardyr:1. Ýürek 2. Zehin 3. Erada

Iman bu
hususyýetleriň ählisinde de ýerine ýetirilmedikçe doly bolmaz.

1. Ilki bilen
ýürekden iman edip, ýüregi iman bilen nurlandyrymaly. Ýüregimizi wagtlaýynça
ýaşalýan şu dünýä durmuşynyň hödürleýän ýalançy owadanlyklaryndan
arassalamaly.Asrymyzyň iň erbet ýürek
keselligi bolan ulumsylykdan halas etmeli. Allaha baglanmaly.

Hz.Möwlananyň
diýşi ýaly: “Bir adam Allahdan başga hiç
zada mätäç däldigine ynansa, Allah bu adamy başga hiç zada mätäç etmez.”

2.Zehnimizi hem
kapyr pikirlerden, şirklerden arassalamaly. Ähli kanunlar, sebäpler Allahyň
gudraty bilen işleýär, Allah ýaradýar. Her bir atom, her bir zerre Allahyň
çäksiz gudraty we çäksiz ylmy bilen bardyr we hereketdedir. Allahyň rugsatysyz
bir zerre hem hereket edip bilmez, bar bolup bilmez. Esasanam döwrümizde materializm, deizm, ateizm
ýaly düşinjeler musulmanlaryň hem aklyny meşgul edýär. Günbataryň
ylym-tehnikadaky üstinligi hem muňa goşulan soň, akylda nokaut bolan
musulmanlar günbatardan gelýän dürli dürli pikirleriň, ynançlaryň täsirinde
ýaşaýar. Internetiň hem rowaçlanmagy, globalizmiň hem täsiri bilen zehin
dünýämiz taryhdaky daş döwründäkinden has beter garma gatym bir ýagdaýa geldi.
Adamlarda “kimliksizlik” sendromy taryhda bu dänli derejelere ýeten däldir.
Zehinler yslam adyna dogry maglumata we düşinjä eýe bolmansoň özlerine musulman
diýýän duýgy musulmanlary, azajyk sözde duýgylanyp, sagdyn aklyň hereketine
meňzemeýän mankurt ýaly hereketler edýär. Hakyky musulmanlyk üçin sagdyn akyl
gerek. Hatda akly sagdyn bolmadyklary Yslam jogapkär tutanok. Diňe akylda
musulman bolmak hem ýeterli däldir. Meselem Geothe bir goşgusynda Allah barada
ýazýar, öýünde gapysynyň ýokarsynda arapça Allah ýazgysyny asýar. Bismark
pygamberimize düýpli bir hormat duýýardy, Michael Hart “Taryhdaky iň täsirli
100 şahsyýet” kitabynda spisogyň başyna ilkinjisi Hz.Muhammedi (s.a.w.) goýýar.
Tolstoý, “ogullarym musulman bolýar näme etjegimi bilemok, kömek ediň.” diýp
hat ýazan Azerbaýjanly hristiýan bir aýala “Men ähli dinleri öwrendim, içlerinde
iň dogrusynyň Yslam dini ekenine göz ýetirdim, ogullaryň iň gowy dini
saýlapdyrlar” diýp jogap ýazýar. Bu sanalan adamlar musulman däldi. Ýöne rasional aklyň hakykat garşysyndaky
ýagdaýyny görkezmek babatda manylydyr.

3. Eradamyzy bu imanymyzy
ýaşatmak üçin ulanmaly. Ybadatlarymyzy ýerine ýetirmeli. Ybadatlar imanymyzyň
goraýjysydyr we imanymyzyň güýçlenmeginde hem kömekçimizdir. Allaha ýakynlaşmak
üçin ybadat şertdir. Rasional akyl bilen ýagny diňeje akyl bilen Allaha
ýakynlaşyp bolmaz. Allaha ýakynlaşmagyň, Ony razy etmegiň ýoluny Allah bize
esasy Gurhan we Hz.Muhammediň (s.a.w.) durmuşy bolan Yslam dini bilen görkezdi.
Munyň daşynda bir ýol gözleýän adam zyýandadyr. Hz. Pygamberimiz (s.a.w)
“nähili ýaşasaňyz şeýle ölersiňiz, nähili ölseňiz şeýle direldilersiňiz”
diýýär. Imansyz ýaşaýan adam imansyz öler. Ölmäkaň ýaşap ýören wagtyň iman
etmek we imanyňy praktikada eradaň bilen görkezmek şertdir. Adama berlen her
bir husuýetiň hakkyny bermelidir.

Hz.Omaryň (r.a.)
sözi:
“Biz Allahyň bizi bu din bilen eziz eden milletidiris. Bu diniň daşynda bir
ezizlik gözläp başlasak Allah bizi zelil eder.”

Imanyň 6 rükni
bardyr: 1.Allaha iman 2.Pygamberlere iman 3.Kitaplara iman 4.Perişdelere iman
5.Takdyra iman 6.Ahyrete iman

Nesip edeninden
bu iman rüknlerinden başlap yslamyň esaslaryny siz bilen paýlaşmakçy.

Doly doly iman
etmek, we bu iman bilen Allaha göçmek hemmämize nesip etsin.