Ýagyşyň sesi

Ýagyşyň sesi

Ýene rähmet ýagýar gökden şabyrdap,
Köpüň aýdylmadyk aýdym diýýäni.
Meniň bu ýüregim misli bir girdap,
Ýa ýagyşy ýuwudýar ýa-da dünýäni.

Ýagyş deý bakyşlaň meni ezerdi,
Şol ýagyşlar bilen gidipdiň senem.
Öňümde durmuşyň täzeçe derdi,
Käte agyr gelýär öwrenişseňem.

Ýöräp barýan bakyşlaryň astynda,
Guran dodaklama gonýar damjalar.
Saçlarymdan syzýan suwlar aslynda,
Ýatlamaň notasyz sazyny çalar.

Şonda bulutlara dikýärin gözlem,
Giden ýagşyň bilen gel ahyr indi.
Nurly damjalaňa düşünýär sözlem,
Kämilleşendirin öňküden şindi?!

Agyň tutsa eger, bir ýagyşly gün
Goşul oňa, arkaýyn bol, çekinme!
Gowşasyn kalbyňda üznüksiz düwün
Ýylgyr soňam, gamdan köýnek tikinme!

Käte gözýaşyňa sebäp bor ýagyş,
Ýüregiňde galan bolsa yrgyldy.
Her adam agyrýan ýerin tutarmyş
Meň agyrym bolsa, ruhumda galdy.