Paulo Koelýo “Alhimik”

Paulo Koelýo “Alhimik” kitabyndan bir hekaýa.
Bir täjir öz ogluny bagtly bolmagyň syryny öwrener ýaly danalaryň danasynyň ýanyna ugradypdyr. Dagyň gerşinde salnan ajaýyp bir gala gözi düşýänçä oglan 40 günläp çölüň içi bilen ýöräpdir. Gözleýän danasy şok galada ýaşaýar eken. Gala oglanyň çak edişi ýaly ýagşyzadanyň çola mekanyna asla meňzemeýärdi. Daş töwerek märekeden ýaňa hyň berip durdy. Täjirler harytlaryny güjeňleşip alaňçap ýördüler. Bir gyra çekilip gürrüňleşip duranlar hem göze ilýärdi. Sazandalaryň kiçeňräk topary gulaga ýakymly bir saz ýaňlandyrýardy. Giň jaýyň ortasynda bu ülkede tapyp bolaýjak nazy-nygmatlardan ýaňa yraň atyp duran stol bardy. Dana öz myhmanlary bilen salamlaşmaga başlady. Ýetginjegiň salamlaşmak gezegi diňe iki sagatdan soňra gelip ýetdi. Dana oň özüni idäp gelmeginiň sebäbini sorap anyklanyndan soňra, edil şu wagt bagtly bolmagyň syryny düşündirmäge wagtynyň ýokdugyny, galanyň içinde aýlaň-çaýlaň edip, iki sagatdan soňra şu jaýa gelse gowy boljakdygyny aýtdy. „Meň saňa ýene-de bir haýyşym bar“ diýip, dana düýbünde iki damja ýag bulduraýan çaý çemçäni oňa uzatdy. „Şujagaz çemçänem eliňe al we içindäki ýagy dökäýme!“
Ýetginjek elindäki çemçeden gözüni aýyrman, köşgüň basganjaklaryndan kä ýokary galyp, kä aşak düşüp ýörşüne iki sagady geçirip, dana kişiniň öňünde gögerdi. „Ýeri?“ diýip, ol ýetginjege ýüzlendi. „Şu uly jaýyň naharhanasyny bezeýän pars halylaryna, iň bir ökde bagbanlaryň on ýyllap, iş edinip ösdürip ýetişdiren bagyna, kitaphanamdaky gadymýete degişli küti kitaplara we ham kagyzlaryň ýüzüne ýazylan golýazmalara göwnüň ýetdimi?“ Biraz utanjak ýaly eden ýetginjek hiç bir zady synlap bilmänligini, bar gaýgysynyň oň özüne ynanan ýagyny dökmezlik bolandygyny boýnuna aldy. „Oň ýaly bolsa git-de öýümdäki täsinlikleriň hemmesini gowja synla. Bir kişiniň nirede we nädip ýaşaýandygyny bilmän oňa janyňy ynanyp bolmaz.“
Ýetginjek gaýtadan çemçäni eline aldy-da ýene galaň geçelgelerini yzarlap ugrady. Bu gezek ol birneme batyrgaý hereket edýärdi we töwerekdäki geň-taňlyklary, otaglaryň görküne görk goşýan sungat eserlerini synlamagyň ugruny tapýardy. Ol baglary, galaň daşyny galdap duran daglary synlady. Gülleriň şeýle gözelliklerini, suratlaryň we heýkelleriň bolsa tüýs hakyky durmaly ýerlerini tapandyklaryny ykrar etmän durup bilmedi. Ol dananyň ýanyna gaýdyp gelip, gören zatlary barada oňa jikme-jik gürrüň berdi. „Dökmän getirmegiňi tabşyran iki damja ýagym nirede?“ diýip, dana oň ýüzüne dikanlady. Ýetginjek diňe şo wagt ýagy dökendigini bilip galdy. Saňa berip biljek ýeketäk maslahatym şudur diýip, danalaryň danasy seslendi „Bagtly bolmagyň syry, dünýäniň geň taňlyklaryny we gözellikleriniň hemmesini synlamagy başarmakdan we şol bir wagtyň özünde-de çaý çemçedäki iki damja ýagy unutmazlykdan ybaratdyr“
Bu iki damja ýagyň birinjisi saglygymyzdyr. Eger özümize seretmesek, saglygymyz erbetleşip ugrasa başga zatlary asla görüp bilmeris. Agyrylar içinde ýatan adam, dünýäniň iň owadan ýerinde bolsa-da gözi hiç bir zady görüp bilmez. Guşuň süýdi bilen bakylýan bolsa-da, onuň üçin ýatýan ýerinde iňňe gögeren ýalydyr.
Ikinji damja bolsa, hakyky dostlarydyr. Dostlary bolmaýan adam üçin, bu dünýäniň zyndandan tapawutly ýeri ýokdur. Söýmek hem-de söýülmek bu adamy durmuşa baglaýan, bütin dertlerini unutdyrýan iň ajaýyp dermandyr.