Özen Bilim Merkezi

Salawmaleýkim hormatly agzalar.

Geçen gezek "Taslama bäsleşigi" diýip bir suratly blog açypdym. Bu gün Özen Bilim Merkeziniň gurnan dabarasyna gatnaşdym. Üns berýän welin, soňky günlerde dabaradan dabara, çäreden-çäre gitmek nesip ediberýär. Köpüsi hem bilim ulgamynda. Ýönekeý aýdym-sazly çäre dälde, hakykatdan hem gatnaşmagyň bilen azajygam bolsa bir peýda berýän, belli bir netije berýän dabaralaryň biri.

Şu gün ýokarda belleýşim ýaly Özen Bilim Merkeziniň gurnan dabarasy boldy. Iňlis dili we kompýuter kurslarynyň täze tapgyrynyň başlamagy we geçenki tapgyry tamamlanlara bagyşlanyp.

Ilki başynda, kurs bilen tanyşdyrýan wideo görkezildi. Wideolardan alan käbir maglumatlarymy paýlaşmakçy. Özen 2007-nji ýylda diňe Aşgabatda başlap, häzirki wagtda Aşgabadyň daşynda köp şäherlerde bar. Esasy bilim berýän ugurlary iňlis dili, rus dili we kompýuter (Office, Windows, CorelDraw, Photoshop, AutoCAD, 3ds MAX) ugurlarynda. Çykyşda hem rus dili mugallymy, iňlis dili, kompýuter mugallymlary çykyş etdiler. Hersi öz ugrundan käbir ýerlerini düşündirdiler. Okadylýan kitaplar, gazanyljak netijeler, öwreniljek bilim bilen haýsy kärlerde işläp boljakdygy, has ösdürmek üçin nämeler etmelidigini garaz gysgaça aýdanymyzda häzirki döwürde ýaşaýan herbir adamyň tehnologiýadan başy çykmagy hem-de iňlis ýa rus dilini bilmegi möhüm birzatdygyny.

Soňra, ene-atalaryň çagalaryny kursa bermekleri, olardan nähili netijä garaşmalydygyny we gowy okamaklary üçin näme zatlary edip biljekdikleri hakynda gürrüň edildi. Käbir ene-atalar çagasyny iňlis dili kursuna berip, 1 aý geçenden soň BBC kanaly açyp, krespondentiň gürleýän zatlaryny terjime et diýmekleri, ýa-da iňlisçe aýdym aýdyp duran bolsa şony terjime etdirjek bolmaklarynyň, çaga hem muny başarmasa çagasynyň okuwyndan närazy bolmaklarynyň ýalňyşdygyny aýdyp geçdiler. Ýagny näçe wagtdan soň netijä garaşmalydygyny, 1 aýyň içinde nähili netije berip biljekdigini, iňlis dilini öwrenmek üçin basgançaklaryň bardygyny gowy we herkime düşnükli şekilde aýdyp geçildi.

Soňunda hem şu tapgyry gowy tamamlan okuwçylara hormat hat gowşuryldy, degişmeler diňlenildi, aýdym aýdyldy, çagalaryň çykyşyna seredildi, garaz hezillik iň soňuna goýuldy…

Bu blogda kän bir üýtgeşik maglumat bardyr hem öýdemok, ýöne şular ýaly birýere gatnaşsam köplenç surata düşürýän. Düşüren suratlarymy hem hemmeler bilen paýlaşsam kem göremok, ýagny Türkmenistanda bolup geçýän wakalaryň ýene-de birinden habarly bolmagymyzda zyýan bardyr öýdemok.

Bu saýtda, Özen Bilim Merkezinde bilim alanlar/alýanlar, käbir mugallymlary hem bar. Olary hem bu geçiren dabaralary bilen gutlaýan. Işiňizde mundan beýläk hem üstünlikler dileýärin!