AÝRALYK

Aýralyk

Biziň şu günümiz ertä aýralyk,
Ýaşlyk gidýär, soň gelmeýär aýlanyp.
Dünýede ýeňilmez iki güýç bardyr,
Birisi söýgüdir, biri aýralyk.

Söýgi - gör, nähili ajaýyp duýgy,
Sarpa goýýas, ol ýaşaýşyň özeni.
Aýdan, Günden, Ýerden arşa göterip,
Hudaýa çen beýgeldýäris biz ony.

Emma aýralygy halamasagam,
Ol bizden soraşman edýär etjegin.
Ýogsa adamlarda şeýle ukyp bar,
Öňden görüp sowup bilýär emgegin.

Ynsanlarda akyl bar, aklyň çägi ýok,
Bu gün adam akly gezýär älemi.
Bu beýik şahsyýet döräp dünýede,
Şatlyga öwürýär ýowuz täleýi.

Durmuşda ýaşaýşyň tapyp kanunyň, 
Bir maksada gönükdirýär hemmäni.
Döredýär ol suwsyz ýatan çöllerde,
Tolkun atyp akyp duran derýany.

Ýer ýüzünde näçe kesel bar bolsa,
Onuňam dermanyn tapyp dur oýlap.
Gör-ä, tümligiňem gelýär eminden,
Ýagty gijelerde gezýäris ýaýnap.

Gulmurat Rahmanow