ÝÜREK

Ýürek

Ýürek syzýar, şoň üçinem adamzat
Begense-de, gynansa-da aglaýar.
Ýöne kalby sowuk käbir ynsanlar
Şeýle täsin pursatlary aňmaýar.

Tolgunmakda gözelligiň keşbi bar, 
Adam beýik, duýga baýlygy üçin.
Şatlykdan, gussadan, söýgüden doly
Seniň ynsan kalbyň barlygy üçin.

Sessiz akan gözýaşyňdan uýalma, 
Aglaýan ýürekler ýagýan bulutdyr.
Şol bulutlar ýagyp-ýagyp dünýämiz,
Şeýle mährem, şeýle gözel bolupdyr.

Diýseň täsin bolýar kalbyň bahary,
Duýgulaň pyntygyn ýarýar şol pursat.
Pikirleriň gözýaşyňa ýuwulýar,
Meger, şonda nurdan dolýandyr gursak.

Ýürek bormy özgäň derdin duýmasa,
Ýylgyrmasa iliň gülýän mahaly.
Aglaýan ýüregiň gussaňy egser
Hem söýgüsi bilen gorar jahany.

Gulmyrat Rahmanow