MYHMAN EGLENÝÄN DÄLDIR

Iki sany goňşy ýer üstünde dawa edýär diýýär.

- Goňşy, meň ýerime süýşäýipsiň öýdýän.

- Aý, ýok, göwnüňedir.

- Göwnüme borm-aý. Süýşüpsiň-ä.

- Süýşen däldirin. Öz ýerim.

- Ýok, edil şu ýer-ä meňki.

- Ýalňyşýaň, goňşy, bu ýer meňki.

Bular şeýdip, "ýer meňki-de, ýer meňki" boluşyp durkalar, Ýer öz ýanyndan: "Ikiňizem meňki - diýýärmiş. - Dawa etmäň. Sizden has edenli, has dogumly, dünýäň üçden iki bölegini basyp alanlary, ýedi yklyma hökmüni ýöredenleri, baryny öz goýnuma ýygnadym. Perman bolan güni sizem ýygnaryn."

Ýer dawasyny edýänler, muny eşidýän däldir. Eger eşitseler, ähtimal, ýer dawasyny etmezdiler. Bir daban ýer kimlerden galmandyr.

Ýalana ýakyn çyn rowaýatda bir kişi gonamçylyga baryp:

- Rüstem! - diýip gygyrypdyr.

Ýeriň aşagyndan üç ýüz sany ses:

- How! - diýip jogap beripdir.

Ýaňky kişi:

- Siz gaty köplük ýaly-la. Maňa bir Rüstem gerek - diýipdir welin, sorapdyrlar:

-Haýsy Rüstem?

- Men Zalyň ogly Rüstemi gözleýän.

Onsoň ýeriň aşagyndan Zal ogly Rüstemiň pessaý sesi eşidilipdir:

- Men bärde.

Rowaýatyň diýjek bolýany, bu dünýä gelip geçeniň hetdi bar-da, hasaby ýok. Has anygy, hasaby ýöredilýär-de, biz üçin hasapsyz. Çig süýt emenligimizden bolsa-da ahmal, Şeýtan bulaşdyrýan bolsa-da kim bilýär, burnumyza sähelçe ýel düşse, gaňňamyzy garnymyza alyberýäs. Özümizden öňküleri unudýas, soňumyzy alada edemzok. Sözüň ähli manysynda nireden gelip, nirä barýanymyzy, bu ýerdäki maksadymyzy dürs seljerip bilemzok. 

Käte bir ýere ýolagçy bolup, ugraýaň. Gidip barýaň. Şonda ýol ugrunda "Hoja Abdylla baba" gonamçylygy, "Molla Töre Ahun" gonamçylygy, "Parsa Pir" gonamçylygy ýa-da "Talhatan baba" gonamçylygy diýen ýaly ýazgylar ýygy duş gelýär. Onsoň kelläme bir pikir gelýär: Gonamçylyklaryň gabadynda, ýoluň ugrunda uly harplar bilen: 

"Men-men diýen ärler ýatyr gum bolup",

Ömre ygtybar ýok, jana durum ýok",

"Şirin jan aýrylsa tenden,Gum guwanar läşimize",

"Ahyr boljagyň şudur - teniň ýer bilen ýatsa" - 

diýen ýaly setirleri ýazyp goýaýsaň! Mysal alan setirlerim, häki bir ýadyma düşenleri. Magtymgulyda setir kän, has laýygyny saýlap alybermeli. Esasy zat, gonamçylyklaryň ýöne bir gum üýşmekleri däldigini ýatlatsa! Biziňem bu dünýä myhmandygymyzy, ýa-da ötegçidigimizi, göçegçidigimizi duýdursa! Tekepbirlikden, men-menlikden, gedemlikden... azajygam bolsa goramazmy? Ýa netije bermezmi? Gelşiksiz bolarmy?