Gara Seýitliýew
Adam we alada
Güýz ýapragy kimin saralyp-solup,
Ol örän köp ýatdy keselbent bolup.
Sen ony ölýänçä bir soramadyň,
Oň bolsa hemişe dilinde adyň.
Hemmelerden artyk saňa garaşdy,
Kim barsa ýanyna seni soraşdy.
Bir gün däl, bir ýyl däl, uzak garaşdy...
Emma sen bäş minut wagt tapmadyň,
Soramaga eziz dostuň halyny.
“Öljek...” diýseler-de, sen tiz gopmadyň
Soramaga görgüliň ahwalyny,
Her gezekde diýdiň: “Iş köp, wagtym ýok...”
Ol görgüli üýtgäniňi bilenok.
“Hiç kim bu dünýede işsiz gezenok”
Diýip ýatdy pahyr, senden habar ýok;
Hiç kim bu dünýäge iki gelenok”
Diýip ötdi pahyr ýoluňa garap...
Ölenden soň onuň öýüni sorap,
Gelmek nämä gerek ýalandan aglap.
Sen indi oturda bir aýla seriň,
Ol hakda gazete ýazan sözleriň,
Entek ol ölmänkä aýdan bolsadyň,
Halyny bir sorap gaýdan bolsadyň,
Belki, ol ölmezdi, ýaşardy, belki,
Adamyň gadryny bilmeli ilki...
Arhiwiň ýagdaýy
● Doly tekst
● 4/4 teswir saklanypdyr
Ýazylan saýty: ertir.com · Çeşme: Web Archive nusgasy — ertir.com, 2 awgust 2012 ý. · Asyl sahypany gör ↗
Teswirler 4
Adam we ýürek
Bu dünýä gelenleň bary ölmeli,
Gynansak-da, oňa garşy çäre ýok.
Ýöne adam ýürek ýaly bolmaly,
Ýürek hiç wagt ölüm bardyr öýdenok.
Ýürekden çykmasa söz-de bolanok,
Ýürekden çykmasa saz-da bolanok.
Ebedi ýaşamak ýürege bagly,
‘Ata, neneň?’ diýip sorasa ogly,
Ýüz ýaşlam aýdar: ‘Göwnüm ýaş meniň’.
‘Göwnüm’ diýýäni-de ýürek türkmeniň.
Bu dünýä gelenleň bary ölmeli,
Gynansak-da, oňa garşy çäre ýok.
Ýone adam ýürek ýaly bolmaly,
Ýürek hiç wagt ölüm bardyr öýdenok.
Adam we wepadarlyk
Arça ýaly ar-namyssyz bolsadym,
Saçda agarmazdy, ýüzde solmazdy.
Her gülenje göze aşyk bolsadym,
Gözlerim ömürlik gözde galmazdy.
Men yşkymda bir wepasyz bolsadym,
Kalbym diňe seniň sazyň çalmazdy.
Her gülen gunçany gülüp ýolsadym,
Bir läle kalbymda baky galmazdy.
Meni başga hiç bir ataş ýakmady,
Hijranyň oduna ýanyp agardym.
Meni başga hiç bir saky ýakmady,
Hijranyň meýinden ganyp agardym.
‘Agarypdyr aşyk Garanyň saçy’,
Diýip gamlanmasyn lälämiň ýüzi.
Ýene-de garalar Garanyň saçy,
Bir gülüp garasa lälämiň özi.
haý sagja bola 👍
Arça ýaly ar-namyssyz bolsadym,
Saçda agarmazdy, ýüzde solmazdy.
Her gülenje göze aşyk bolsadym,
Gözlerim ömürlik gözde galmazdy.
👍 sözum ýok şahyra.....