Marat Ataýewiç Niýazow - beýik adam, beýik sportsmen!

•SSSR-iň sport ussady;
•TSSR-iň ussat tälimçisi;
•1960ý - Rim Olimpiadasynyň kümüş medalynyň eýesi;
•7 gezek dünýäň çempiony;
•10 gezek dünýä 2-njisi;
•3 gezek dünýä 3-njisi;
•3 gezek ýewropaň çempiony;
•1 gezek ýewropa 2-njisi;
•1 gezek ýewropa 3-njisi;
•14 gezek SSSR-iň çempiony;
•9 gezek dünýäň rekordyny täzelän;
•11 gezek ýewropaň rekordyny täzelän;
•13 gezek SSSR-iň rekordyny täzelän;
...
...
...
Ussat, adyny dünýä tanadan, dünýä ýaryşlarda edil häzirki Türkmenistanyň ýaşyl baýdagynyň astynda çykyş etmese-de, "Türkmen" diýen belent adyň astynda çykyş eden, Türkmenistanly sportsmen Marat Ataýewiç Niýazow barada köpümiziň habarymyz ýokdur. Şu ýokarda sanalan zatlaryň ählijesi hem Marat Niýazowa degişli.

Marat Ataýewiç 1933-nji ýylyň 28-nji sentýabrynda Aşgabat şäherinde (TSSR) dünýä indi. Ol sportyň nyşana ok atmak görnüşi boýunça öz döwründe dünýäde öňüne adam geçirmedik sportsmendir. Niýazowyň şöhratly sport karýerasy onuň entek çagajyk wagtlary Aşgabadyň "Zähmetçi" sport mekdebine gatnap başlamagy bilen başlandy.

Ol 1960-njy ýylda Rim Olimpiadasynda kümüş medal almagyň hötdesinden gelýär. Anyk bilemok welin, şu medaldan başga-da Olimpiýa oýunlarynda türkmen sportsmenleri ýene 1-2 sany medal alan bolmaly. Ol medallaryň birinä 1952ý - Helsinki Olimpiýadasynda Iosif Berdiýew alypdyr, ýöne şu ýaşulynyň anyk türkmendigini ýa-da türkmen däldigini bilemok-da. Doglan ýer-ä Aşgabat welin.. Aý bor muny soňky temalara goýaýyn. Olimpiýadadan ýene bir medal atçylyk sport görnüşleriniň birinden gelipdir öýdýän, bu barada anyk bilemok, bir ýerde gulagyma degipdi.

Marat Niýazow Moskwanyň Gubkin adyndaky nebit we gaz inistitutynyň uçurymy (1953ý-1957ý). Marat Ataýewiçiň arhiwinde 200-den gowrak sport baýraklary bar. Marat aga "SSSR-de sportyň ok atyjylyk görnüşiniň legendasy" diýlip sylanyldy.

Ol tälimçi hökmünde hem uly abraý gazanan adamdyr. Onuň şägirtleri Mikitenko, Boguşewiskiý, Sidorenko dagylar birnäçe uly ýaryşlarda abraýly orunlary eýelän ok atyjylardyr. Marat Niýazow tälimçi hökmünde birnäçe döwletlerde (Rumyniýa, Bolgariýa, Müsür, Mýanma, Flippinler, Kuweýt) işledi. Ýöne nirede işlese-de öz dogduk diýaryny, ata watany Türkmenistany hiç wagt ýadyndan çykarmady. Marat pahyr ýaşan ömründe Türkmenistanly nyşana ok atyjylar bilen hem uly aragatnaşyk saklady.

Maşgalasy: Aýaly - Aleksandra (?), gyzlary - Aýna, Maýsa, ogly - Ata.

Marat aga 2009-njy ýylyň 8-nji aprelinde 76 ýaşynyň içinde Aşgabat şäherinde dünýäden ötdi. Şol ýaşan ömrüni sportyň nyşana ok atmak görnüşine baglan Marat Niýazow, öz adyny türkmen sportynyň taryhyna altyn harplar bilen ýazdyrmagy başardy.

Bu temany açmagymyň sebäbem Marat Ataýewiç barada internet sahypalarynda türkmençe maglumat ýok diýen ýaly. Netije-de temany açmak bilen maksadym: türkmen internedini türkmençe maglumatlara azda-kände baýlaşdyrmak, Marat agany tanamaýanlaryňyz bar bolsa, onuň kimdigini tanatmak, hem-de bu barada Siziň hem bilýän zatlaryňyz bar bolsa bir zatlar öwrenmek..

Marat agaň bu dünýäde özi ýok hem bolsa, onuň abraýy, onuň bitiren işleri ýaşulyň ýoklugyny bildirenok. Ol beýik adam, beýik sportsmen!

Ýatan ýeriň ýagty bolsun, Marat aga!