Gelin-gyzlar we eneler hakdaky nakyllar

Akylly gelin öý diker, akmak gelin
öý ýykar.

Akylly ogul hümmetli, akylly gyz
gym­matly.

Alty aga birigip, ata bolmaz, ýedi
ýeňňe birigip — ene.

Alynjak gyz Aý görner.

Aşy
ajygana ber, gyzy — aşygyna.

At keselini sakyz açar, gyz
keselini — gopuz.

At ýaly bilen owadan, zenan – saçy
bilen.

Atadan nesihat alan ogul kethuda bolar, eneden nesihat
alan gyz keýwany bolar.

Atadan ogla miras, eneden — gyza.

Ata-enäniň göwni ogulda-gyzda, ogul-gyzyň göwni dag bilen
düzde.

Ataň bile eneň Mekge bile Medinäň.

Atasy bolmadyk bir gün aglar, enesi bolmadyk — her gün.

Atasyz oglan — ýetim, enesiz oglan — ýesir.

Aý ýanynyň ýyldyzy, gelin ýanynyň
bal­dyzy.

Baý gyzy bezegi bilen, garyp gyzy edebi
bilen.

Bidöwlet — oglumdan, döwletli — gyzym.

Bidöwletiň ogul-gyzy baş-da bolsa,
ýaş ýaly, döwletliniň ogul-gyzy ýaş-da bolsa, baş ýaly.

Çykan gyz — çygdan daş.

Düýe
«düz» diýip geçer, ýigit — «gyz» di­ýip.

Duz bilen gyza gytlyk düşmez.

Eneçe gyz dogmaz, ataça — ogul.

Enesini gör-de gyzyny al, gyrasyny
gör-de — biýzini.

Gapaksyz gazan gaýnamaz, enesiz
oglan oý­na­maz.

Garga gagyldap gaz bolmaz, kempir
bezenip ― gyz.

Gatyksyzdan duzly ýagşy,
ogulsyzdan — gyz­ly.

Gelen gelin däl, düşen ýeri gelin.

Gelin düşse yrakdan — gatnaşygy
düz bolar, gelin düşse ýakyndan — gatbar-gatbar söz geler.

Gelin ojaga çeker.

Gelinden gyz bolmaz, giýewden — ogul.

Gelniň ýaman bolsa ogluňdan gör,
giýewiň ýaman bolsa — gyzyňdan.

Gelniňe gargasaň ogluňa deger,
giýewä gar­ga­saň — gyzyňa.

Gerdişli sözi gelin aýdar.

Gezegen gyzdan gelin bolmaz.

Giýewim ýagşy – gyzymyň aýdany
bilen, og­lum ýaman –gelnimiň aýdany
bilen.

Goňşyň gowy bolsa, kel gyzyň äre
gider, goňşyň ýaman bolsa, gül gyzyň göre gider.

Görklüdigiň bilerin, bir oglanyň bolan­soň, işlidigiň bilerin, gaýyn eneň
ölensoň.

Gözel ― hulky bilen gözel.

Gözeli görseň gözüň ga:nar.

Gözeli kemis öldir, ýigidi — namys.

Guda gudalaşandaky dek bolsun,
gelin gele­nin­däki dek.

Gül össe ýer görki, gyz össe — il.

Gün bakar — ýer ýumşar, gelin
bakar — är ýumşar.

Gündeş göreniň gyzyny alma, işigi ýamanyň öýüne barma.

Guma sepeniň bilinmez, gyza
bereniň gö­rün­mez.

Gylygyndan söýdüren gyz — gyzyldan.

Gyz – gurjak oýnar, oglan – gulan
gözlär.

Gyz – gylygy bilen, ogul – edebi
bilen.

Gyz — gyrnak, ogul — gul.

Gyz — hoz agajy, her ötegçi bir
daş atar.

Gyz — özge öýüň çyrasy.

Gyz bar – nep getir, gyz bar – gep getir.

Gyz çykaran baýamaz, gelin edinen
dagamaz.

Gyz edebi — il edebi.

Gyz eneden görüm görmese, öwüt
almaz.

Gyz galyňy — garyň suwy.

Gyz galyňy ― gyrawça.

Gyz galyňy gysymyňda galmaz.

Gyz göwni gyzan gazan.

Gyz gylygyndan söýdürer.

Gyz kepbeden çykar, tüsse — omçadan.

Gyz meniňki, bagty özgäniňki.

Gyz öýüň torbasy, ene — unuň
urbasy.

Gyz syryny hossary biler.

Gyza altyn tagt dileme, barmak boýy bagt dile.

Gyza erk berilse, ýa dowulça barar, ýa surnaýça.

Gyza geler kyrk kişi, alar gider bir kişi.

Gyzda — haýa, gelinde — şerim.

Gyzly gapy dynuw bilmez.

Gyzly kişi gyr aşar.

Gyzly öý — gyzyldan halka.

Gyzly öý soltanly öý, ýüzi geler,
biri äkider.

Gyzly öýe kyrk at baglanar.

Gyzly öýe rehnet ýagar.

Gyzly öýüň iti dynmaz.

Gyzy baryň näzi bar, ogly baryň —
döw­leti.

Gyzy kyrk ýerden gys.

Gyzy saklap bilmeseň, güň bolar,
ýüpegi saklap bilmeseň, ýüň bolar.

Gyzyl dili gyssaň, maza berer, gysmasaň — yza.

Gyzyl ýüzli ýigidiň gyz uýasy
bolmasyn, gyz uýasy bolsa-da, gyzyl ýüzi solmasyn.

Gyzyla gaplasaň hem gyz atasy
öýünde galmaz.

Gyzym — öýde, gylygy — daşarda.

Gyzyň görki ýedi ýetmeziniň üstüni
ýapar.

Gyzyň gözelligi göz bile gaşda,
ýigdiň gözelligi akylda — huşda.

Gyzyň ysy — gülüň ysy.

Her gülüň bir ysy bar, her gyzyň — bir näzi.

Her zadyň öz wagty bar, her gyzyň — öz bagty.

Howlugan gyz äre baryp ýalçymaz.

Köňül söýen gözeliň agy-da bolmaz,
garasy-da.

Ogluň ýetişse, gyzy ýagşy bile
obadaş bol.

Oglum gowy bolandan, gelnim ýakymly
bolsun.

Ogul düzde ýagşy, gyz — öýde.

Ogul dogsa sagdak al, gyz dogsa — sandyk al.

Ogul edebi bilen arzyly, gyz —
gylygy bilen.

Ogul ýanynyň ody bar, gyz ýanynyň —ýady bar.

Oguldyr döwletiň başy, gyz-da
bolsa göwün hoşy.

Ojak başy ogulsyz bolmsyn, saçak
başy gelinsiz.

Owadan gelin toýy bezär, akylly
gelin — öýi.

Öý görki — gamyş, gyz görki —
kümüş.

Öýlenmedik ýigit il giýewi,
çykmadyk gyz il gelni.

Sary donlym sag bolsa, sallanyp geler sary gyz.

Suw seslener gamyş bilen, gyz
beslener kümüş bilen.

Suwuň siňňin akanyndan gork, gyzyň
— ýere bakanyndan.

Togsan dolman ýaz çykmaz, dokuzy dolman — gyz.

Üç gyzlynyň halyny günde bir sora.

Ümä gelen usul gyz, sapak ujuny
düwmän ötürer.

Uruşmaz ogul bolmaz, tersleşmez —
ge­lin.

Uýatsyz ogul ýaman, gylyksyz — gyz.

Ýagşy gelin — gelin, ýaman gelin — ýalyn.

Ýagşy gyz irden turup darak dilär,
ýaman gyz irden turup çörek dilär.

Ýagşy gyz ýady ýakyn eder, ýaman
gyz — kyýa­maty.

Ýagşy ogul il abraýy, ýagşy gyz — öý.

Ýetim gyzyň ýeňňesi köp.

Ýigit aýbyn gyz açar, ädik aýbyn —
suw.

Ýigit ulalsa, jeň başlar, gyz
ulalsa — heň.