Eý, zir-zibiller, baryň, öýňüze dargaň!
-
Aýyr eliñi,
Eliñi aýyr!
Aýyr eliñi,
Eliñi aýyr!
Gysymlama bu dünýäni,
Gysymña sygmaz barybir!
Gapyl adam, gel unutma,
Togalak ahyr bu Ýer!
Aýyr eliñ, gysymlama,
Sypar eliñden barybir!
Ýer sermeme, tur, ýapyşma,
Tur sen ör boýuña, dik dur!
Öz boýuñy boýnuña al.
Öz sesiñi boýnuña al.
Mys-mys gülme,
Gül jak-jaklap!
Gysymlama bu dünýäni,
Ýaşa
Dünýäni
Gujaklap! - Erkek kişi diýmek,
Bu diñe,
Aýal göreñde,
Gaty begenmek
Däldir bu.
Däldir ol,
Agyr ýüki gerdenñe
Alyp, bazardan
Öýüñe gaýtmak.
Erkek kişi diýip,
Añmañ siz jynsy,
Erkek kişi diýmek –
Erkiñ eýesi.
Erkek kişi diýmek –
Söweş werzişi.
Geljegine tarap
Omzadyp döşi,
Ömür pursatynda
Taryha garap,
Maksady ugrunda
Goýar bu başy.
Erkek kişi diýmek –
Bir aşyk oglan.
Magşugy – azatlyk,
Ugrunda girýan.
Ol öz magşugyna
Uzadyp goly,
Ýetmese-de, dymyp utar ykbaly.
Namartlara geñdir merdiñ ölüşi.
Onsoñ hem
Erkek kişi
Tutup hak işi,
Ölmez-ýitmezdir.
Jeñde wepat bolmak
Däldir ýeñilmek.
Gerek ýene bize
Hut şuny bilmek.
Erkek kişi diýmek,
Köpüñ biridir,
Özi wepat bolsa,
Maksat diridir.
Al ýene sen şuny üns merkeze,
Erkek kişi diýmek –
Geçmişiñ ogly,
Geljegiñ atasy,
Kesgitläp ýoly,
Öz nesline goýup gider ykbaly.
Bu ýol ýürek bilen akyl ýoludyr,
Bu ýol adalat hem hakyñ ýoludyr.
Onuñ her ädimi jeñden doludyr,
Bu ýoluñ hasratdan buýsanjy kändir,
Onuñ barjak ýeri adyl dünýädir.
Erkek kişi diýmek,
Dymmaklyk däldir.
Erkek kişi diýmek,
Tijäp akyl-huşy,
Galkynyp hem silkip
Buýsançly başy,
Dowam etmek miras galan söweşi.
Arlap, ýoldaşlaryn öñe äkider,
Ýaldyrap görnende maksadyñ başy,
Oña parlap duran baýdagyn diker.
Erkek kişi diýmek – Adalat diýmek.
Adalat onuñ – jany-jigeri,
Adalat onuñ – emer-damary,
Ýüregi, kellesi, sesi, duýgusy.
Adalat onuñ tutuş hemmesi.
Adalat onuñ,
Maýmynlykdan bäri
Ýeten pellesi.
Adalat Gündür,
Gözün açana
Düşer şöhlesi,
Güne ýaranlaryñ – kişi hemmesi.
Adalat – bu adamzadyñ namysy,
Adalat bu – adamzadyñ manysy,
Muña gurbanlaryñ – kişi hemmesi.
Erkek kişi diýmek – Dünýäñ atasy.
Sanasañ sogapsyz – kän aladasy.
Bir aýagy otda, biri buzdadyr.
Goja dünýä, juwan dünýä uzdadyr.
Dünýä güle meñzär,
Oñ emri bilen,
Ol muny gazanar
Öz ömri bilen.
Erkek kişi diýmek –
Aýdymçy diýmek.
Aýdym bilen basar dünýäñ gohuny.
Erkek kişi diýmek –
Bir ýolagçydyr,
Aýaklaryñ özi çykar ýollara.
Erkek kişi syrdyr
Erkek dällere. - Göze çakyrym ýagty,
Bar sen, bilýäñmi nirä!
Sen eý, orramsyñ bagty,
Bar sen, bilýäñmi nirä!
Elin owkalap duran,
Bar sen, bilýäñmi nirä!
Eý, takal okap duran,
Bar sen, bilýäñmi nirä!
Sen eý, iki göwünli,
Bar sen, bilýäñmi nirä!
Araçy gyzda-gyzda,
Bar sen, bilýäñmi nirä!
Messepsiz wenezzyna,
Bar sen, bilýäñmi nirä!
Hapalap geçelgäni,
Aýaga ilip durmañ,
Eý, zir-zibiller, hany,
Baryñ, öýñüze dargañ!
Awtory Bapba Gökleň.
Arhiwiň ýagdaýy
● Doly tekst
● 37/37 teswir saklanypdyr
Ýazylan saýty: teswirler.com · Çeşme: Web Archive nusgasy — ertir.com, 14 noýabr 2011 ý. · Asyl sahypany gör ↗
Teswirler 37
Ah, men bir peltek bolsam,
«Nadan» diýip bilmesem.
Men bir şowa kör bolsam,
Nadanlary görmesem.
Gulaklarym ker bolsa,
Eşitmezdim, bilmezdim.
– Nadanjan, bir dymsana,
Nagt bereýin muzduñ!
Gitsem ýolsuz-ýodasyz,
Nadana duşmaz ýaly.
Ah, ýa-da siz, ýa-da siz,
Sizem menden bizarmy?
Nadanlyk – ýurda kesel,
Il ýüzi solmasady.
Ilim-günüm, ildeşler,
Nadanlar bolmasady.
BAPBA GÖKLEŇ
NADANLAR – GORP!
Nadandan gork!
Nadandan gork!
Nadanlyk – gorp.
Nadanlyk – gorp.
Batga golaý
Barma, ýuwdar
– Horp!
Bir nadandan
Gorkman bolar.
Köpelseler,
Gorkman bolmaz.
Nadandan gork!
Nadandan gork!
Nadanlyk – gorp.
Nadanlyk – gorp.
Batga golaý
Barma, ýuwdar
– Horp!
BAPBA GÖKLEŇ
Şatlykda geçir döwri,
Diñleme ynjyk böwri.
Bu dünýäniñ, dünýäniñ
Ýatarmy gohy-gowry.
Gel, başyñ silkip tans et,
Ýanyñam näzeninli.
Gardaş, göwnüñi giñ tut,
Il bolsa näzeýilli.
Ogra ogry diýmegin,
Aýbygadymdyr dünýä.
Aýbyn aýtsañ jelebiñ
Sensiñ masgara ýene.
Düzetmersiñ dünýäni
Ýanyp-bişip, zeýrenip.
Halal zähmet çekdäni
Hem ýaşagyn beg bolup...
Gör bu sazyñ mazasyn,
Ur aýagñy aýda-aý.
Ýöne meniñ bu sazym
Keýpe garyp, gama baý.
BAPBA GÖKLEŇ
Ogurlyk eden uýalmaz,
Ogurlyk eden ulalar.
Ulalansoñ ogurlamaz,
Onsoñ ol ogurlyk bolmaz.
Ogurlyk etmez ulular,
Ogurlyk eden ulalar.
Onsoñ olar ogry bolmaz,
Eger ogurlasalar,
Onsoñ ol ogurlyk bolmaz.
Ulular ogurlasa.
Eger üstüne barsalar,
Üstüne baran uýalar.
Ogurlyk eden uýalmaz.
Ogurlyk eden ulalar.
Ogurlyk eden uýalmaz,
Uýalan ogurlyk etmez.
Uýalandan ogry bolmaz.
Ogurlamasa ulalmaz.
Ogurlyk eden ulalar.
Ogurlyk etmez ulular.
BAPBA GÖKLEŇ
Men bir – derýa, sen – deñiz.
Gomlaryñdyr – gollaryñ.
Nowgülüm, goýma ýalñyz,
Billeriñdir – sallarym.
Men bir jahyl, sen – jahan,
Zülpleriñdir – tümleriñ.
Gabak galdyr kä mahal,
Emleriñdir – ümleriñ.
Hem mähek sen, hem melek,
Ýazlaryñdyr – näzleriñ.
Sensiz dünýe nä gerek?!
Meniñ dünýäm – gözleriñ.
BAPBA GÖKLEŇ
Gapyny gaty ýapmaň!
Ýapmaň gapyny gaty.
Gaty göreris hökman,
Göreris gaty.
Gapyda näme günä,
Gapyny gaty ýapmaň.
Yzyňdan sögerler hökman,
Gapyny gaty ýapmaň.
Gaty gapyda galmaz,
Seň bilen gider gaty:
Bir çeti seniň bilen,
Bärde galar bir çeti.
Gapyny gaty ýapmaň,
Ýapmaň gapyny gaty.
Nähak janyňy ýakýaň,
Galmaz gatyň bir çeti.
Gatyny gapa ýapmaň,
Gaty ýapmaň gapyny,
Gowsy gapyny ýapmaň,
Gap ýapyny!
BAPBA GÖKLEŇ
Görer gözleriň görmese,
«Göreýin» diýip, görüp bolmaz,
Içiňde janyň bolmasa,
«Jan bereýin» diýip bolmaz.
Aýaksyz alys menzile
Arzuw bilen ýetip bolmaz.
Sen nagt bagt gözleme,
Bagt guş däl, tutup bolmaz.
Ýürekde uçgun bolmasa,
«Ýanaýyn» diýip, ýanyp bolmaz.
Jana il derdi ýoluksa,
Bu dertden dynyp bolmaz.
BAPBA GÖKLEŇ
👍
sag bolun Kab aga we Nayza! Iytgeshik usul ulanyar ekeni.
goşgy goýan agzalara + goýup çykdym.aslynda bu plýuslar BAPBA bolsun.
gideniň yzyndanam + iberip bolýar.bu + -lar onuň ýatan ýerini ýagtalsyn.
Sony gaty pessimistik gutaranokmay!?
Sag bolun kab aga.Manyly go$gy.
Erkek kishi diýibem blog achyljak eken bugünler...
Tema gytyndan bolupdyr. Kab aga paylasanynyz u.n kop kop sag bolun
Tema gytyndan bolupdyr. Kab aga paylasanynyz u.n kop kop sag bolun
name diymek ?
türkçedäki
bolup bilermi?
tuweleme hezil edip okadym gowy goshgular,,Bapby Gokleni on tanamayadymam indi bilip galdym 🙂)