Agzybirligiň we jebisligiň baýramy

Esasynda döredijilik kuwwaty we agzybirlik bolan ajaýyp Nowruz baýramçylygy dünýä ýüzünde giňden bellenilýär. Dünýäniň dürli halklary bilen dostluk gatnaşyklarynyň ösdürilmegini we medeniýetleriň özara baýlaşdyrylmagyny alamatlandyrýan baýramçylygy döreden türkmen halky Nowruz baýramyny müňýyllyklardan bäri belleýär. Türkmenistan häzirki döwürde öz pederleriniň beýik ruhy ýörelgelerine ygrarlydygyny aýdyň beýan edýär. Biziň ýurdumyzyň sungat ussatlarynyň Russiýanyň demirgazyk paýtagtynda Nowruz baýramçylygy mynasybetli guralan dabaralara gatnaşmagy munuň aýdyň subutnamasydyr. 

Sankt-Peterburgyň Rimski-Korsakow adyndaky döwlet konserwatoriýasynyň uly zalynda geçirilen dostlugyň we döredijiligiň baýramçylygyna öwrülen gala-konserte dünýäniň köp ýurtlarynyň, şol sanda Owganystanyň, Azerbaýjanyň, Gazagystanyň, Siriýanyň, Täjigistanyň, Özbegistanyň, Gruziýanyň we Russiýa Federasiýasynyň birnäçe sebitleriniň medeniýet we sungat ulgamlarynyň wekilleri ýygnandylar. Oňa türkmen yekiliýetiniň gatnaşmagyny Türkmenistanyň Medeniýet we teleradiýoýaýlymlar ministrligi Sankt-Peterburgdaky “Mekan” Türkmen medeniýet jemgyýetiniň goldaw bermeginde gurady. “Köp milletli Peterburg Nowruzy garşylaýar” ady bilen geçirilen çäräni şäheriň Milletler öýi we şäheriň häkimligi bilelikde gurady. 

Bu ýerde geçirilen baýramçylyk çäresine Sankt-Peterburgyň hökümetiniň agzalary, munisipal ýygnagyň baştutanlary, giň jemgyetçilik we döredijilik intelligensiýasynyň wekilleri, Russiýanyň demirgazyk paýtagtynyň köp sanly kowçum bolup ýaşaýan milletleriniň, habar beriş serişdeleriniň wkilleri,Peterburgyň ýokary okuw mekdeplerinde okaýan türkmen talyplary gatnaşdylar. Nowruz baýramy mynasybetli guralan medeni çärä gatnaşyjylar bu baýramyň parahatçylyk, dostluk we özara düşünişmek gatnaşyklaryny pugtalandyrmakdaky, gumanitar gatnaşyklary we dünýäniň dürli halklarynyň baý medeni mirasyny wagyz etmekdäki aýratyn ähmiýetini bellediler. 

Baýramçylyk çäresiniň maksatnamasyna dünýäniň nusgawy saz gaznasyndan eserler, şöhratly türkmen kompozitorlarynyň döreden mukamlary, şeýle hem häzirki zaman türkmen estrada aýdym-sazlary girizildi. Türkmen skripkaçysy A. Atdaýewanyň çalan sazy we Türkmenistanyň at gazanan artisti P. Halmyradowyň ýerine ýetiren aýdymy tomaşaçylar tarapyndan gyzgyn garşylanyldy. 

Halkara baýramçylygy derejesine mynasyp bolan Nowruz ynsan kalbynda ajaýyp duýgulary oýarýar, ýürekleriň jümmüşinde ýagşy niýetleriň we zehiniň açylmagyna ýardam berýär. Bu ýerde geçirilen aýdym-sazly çykyşlar Türkmenistanyň Newa derýasynyň boýundaky şäher bilen köp ugurly gatnaşyklarynyň üstünlikli ösdürilýändiginiň we tutuşlygyna alnanda türkmen-russiýa gatnaşyklarynyň netijeliliginiň aýdyň subutnamasydyr. Häzirki döwürde biziň ýurtlarymyzyň arasyndaky dostluk hem-de hoşniýetli goňşuçylyk we işewür gatnaşyklaryň üsti täze hil bilen ýetirildi. Ylym, bilim we medeniýet işgärleriniň bilelikde guralýan çärelere, halkara ylmy maslahatlara, sergilere, döredijilik festiwallaryna we duşuşyklara gatnaşmagy asylly däbe öwrüldi. 

Mälim bolşy ýaly, Sankt-Peterburgda Dünýä türkmenleriniň ynsanperwer birleşiginiň bölümi hereket edýär we jemgyýetçilik gurama bolan “Mekan” türkmen medeniýet jemgyýeti netijeli işleýär. Olar diňe bir daşary ýurtlardaky watandaşlarymyzy we Sankt-Peterburgyň ýokary okuw mekdeplerinde okaýan türkmen talyplaryny bir ýere jemlemek bilen çäklenmän, eýsem türkmenistanyň baý taryhy we medeni mirasy hem-de onuň häzirki ýagdaýy bilen gyzyklanýan adamlary hem özüne birikdirýär. 

Ertir baýramçylyk dabaralarynyň çäklerinde “Sankt-Peterburg” myhmanhanalar toplumynyň maslahatlar zalynda türkmen artistleriniň gatnaşmagynda uly konsert bolar. 

Baýramçylyk günlerinde Sankt-Peterburga gelen türkmen wekiliýetiniň agzalary üçin giň medeni maksatnama düzülipdir. Olar maksatnamanyň çäklerinde Russiýanyň demirgazyk paýtagty hasaplanýan şäheriň iri muzeýlerine baryp görerler we onuň ajaýyp ýerleri bilen tanşarlar.

tema baha

gowy(66%, 2 adam)

erbet(33%, 1 adam)