Bilesigeliji oglanjyk (hekaýa)

Myratlar şäherdäki köp gatly jaýda ýaşaýardy. Olaryň ýaşaýan jaýy töweregindäkilerden ep-esli beýigräkdi. Kiçijik Myrat örän bilesigelijidi. Emma onuň soraglaryna ejesidir kakasy o diýen üns bermeýärdi. Sowuk gyş günüdi. Myrat arassa howadan dem almak üçin balkona çykdy. Ol asmandaky Aýa seredip, öz içinden: „Käşgä menem Aý ýaly bolsamdym. Şonda nähili gowy bolardy. Dünýäniň ähli ýerini görüp, köp zatlary bilip bilerdim“ diýdi. Şol wagt onuň kakasy ýanyna gelip, näme pikir edýändigini sorady. Myrat:– Menem Aý ýaly asmanda bolup, bütin dünýäni göresim gelýär, köp zatlary bilesim gelýär – diýdi. Onda kakasy:– Oglum, onuň üçin asmana çykmak hökman däl. Bilesiň gelýän zatlary ululardan sorasaň, töweregiňi synlasaň, köpräk kitap okasaň has gowy bolar – diýdi.Myrat bolsa:– Kaka, men her gezek senden soramda işim bar, soň aýdaryn diýýäň. Ejemden sorasamam, nahar bişirip bolaýyn ýa-da öýi arassalap bolaýyn diýýär. Men bilesim gelýän zatlary başga kimden soraýyn?! – diýdi.Myradyň kakasy näme jogap berjegini bilmän, oýa batdy. Ol bir salym pikirlenensoň Myrada garap:– Dogry aýdýaň, oglum – diýdi.Şol wakadan soň ata-enesi Myradyň soraglaryny has üns bilen diňläp, jogabyny tapmaga çalyşdylar. Jogabyny bilmeseler, Myrat bilen bilelikde kitapdyr ensiklopediýalardan gözläp tapdylar. Myrat hem gaýdyp Aý ýaly asmanda bolmagy arzuw etmedi.