Magytmguly Pyragy - Bu Derdi

Bagtyýar Madrid· 9 ýanwar 2011 ý. 20:20 · 182 gezek okaldy· halanan: 1teswirler.com

Bu Derdi

Keşt eýledim, gezdim yşkyň dagynda,

Ne beladyr, kimse çeker bu derdi.

Yşk dagyn assalar gögüň boýnundan,

Gök titreýip, çeke bilmez bu derdi.

Yşk eser etmese, ýanmaz çyraglar,

Yşka düşse, guşlar eňrär, gurt aglar,

Egiler haýbatly, kuwwatly daglar,

Daşlar erip, çeke bilmez bu derdi.

Kimdir yşkyň ýükün çeken merdana,

Pelek gördi, gorkup düşdi gerdana,

Zemin jünbüş eýläp, geldi lerzana,

Çöller, düzler çeke bilmez bu derdi.

Behişt gaçyp çykmyş arşyň öýüne,

Tamug gorkup, inmiş ýeriň teýine,

Gaçdy derýa, adam aldy boýuna,

Tört ýüz ýyllap çeke bilmez bu derdi.

Magtymguly, çekseň derdi-dügünden,

Asy bolup, şikat etme bu günden,

Bu ölmek, aýrylmak galypdyr öňden,

Peder bize miras goýmuş bu derdi.

Arhiwiň ýagdaýy

● Doly tekst

● 3/3 teswir saklanypdyr

Ýazylan saýty: teswirler.com · Çeşme: Web Archive nusgasy — ertir.com, 30 iýul 2012 ý. · Asyl sahypany gör ↗

Teswirler 3

Define 10 ýanwar 2011 ý. 06:50 +1

Behişt gaçyp çykmyş arşyň öýüne,

Tamug gorkup, inmiş ýeriň teýine,
şu iki setiri hem liriki hem-de ylmy taýdan düşündiri; berjek bolaýyn.
Liriki taýdan:

Behişt - jennet, tamug - jähennem; Magtymguly gapma-garşy pikirleri gaty oňat ulanypdyr. Ylahy yşk mowzugundaky şygryň bu setirlerinde many taýyndan hem baýdyr.

Ylmy taýdan bolsa jennet ýedi gat arşda, ýagny asmanda, yşkdan gaçyp asmana gitmegi, jennetiň gökdedigini aňladýar.
Jähennem bolsa ýeriň astynda diýilýär. Alymlar her 33 metrden bir dereje gyzgynlygyň artýandygyny subut etdiler. Ýeriň teýi, ýagny aşagy hem ýalňyşmaýan bolsam 6666 dereje gyzgyndyr.
Meniň pikirim şeýledir.