Kime we nädip arza-şikaýat bilen ýüz tutmaly?

Salam, hormatly ildeşler!

Durmuşymyzda, gynansak-da, şunuň ýaly ýagdaýlar bolup durýar. Ýagny, haýsydyr bir ýagdaý şeýle bir beýniňize düşer, eliňiziň nädip kagyza ýetenini duýman galarsyňyz. Goşgy ýa bolmasa söýgi hakda däl - ARZA ýazmak üçin.

Bu gün men size arza ýazmak bilen bagly birnäçe maslahatlar bermekçi, belki-de käbirleri ýadyňyzda galar we peýdasy deger.

Arza – bu polisiýa berilýän görkezme däldir. Muny çaltlyk bilen, "gyzgyn yzlar ýitmänkä", gahardan ýaňa gözümiz garaňkylap, içimizde ot lowlaýarka, aýtjak sözlemlerimiziň bolsa 70%-mi duýgylarymyzy aňladýan sözler boljak wagty ýazmak ýalňyşdyr. Dörän ýagdaý hakda gowuja pikir ýöretmäge hem-de kimiň we nädip sizi şunuň ýaly derejä ýetirendiginden baş çykarmaga, bu ýagdaýyň döremeginiň öňüni almak üçin siziň we onuň näme etmeli ekendigine, häzirki pursatda nähili çykalganyň iň amatlysy boljakdygyna düşünmäge wagt goýuň.

Pikirlendiňizmi? Onda elimize kagyzy we ruçkany (Has gowusy – kompýuter we printer) alýarys hem-de ýazmaga başlaýarys.

Sagdaky ýokarky burçda ýüz tutmagy ýüregmize düwen edaramyzyň adyny ýazýarys. Eger-de size ol edaranyň ýolbaşçysynyň ady, familiýasy we atasynyň ady 100% belli bolsa, oňa ýetesi zat ýok, göni ýazyň. Eger-de at barada ikirjiňlenýän bolsaňyz, "Berdiýewmikä ýa Durdyýewmikä” diýip, onda gowusy ýolbaşçynyň adyny ýazmaň. Ýalňyş ýüzleneniňden ýüzlenmäniň gowumyka diýýärin.

Indiki setirden arzanyň kimdendigini ýazmaly. Mysal üçin, "Aşgabat şäheriniň Alyşir Nowaýy köçesiniň 5-nji jaýynyň 2-nji kwartirasynyň ýaşaýjysy Myrat Myradowdan (Tel.: XX-XX-XX)". Telefon belgisini görkezmek örän peýdaly. Sebäbi, gürrüňdeşligiň dowamynda köp soraglara jogap tapylyp bilner, hatda ýazmadygyňyzy dilden düşündirseňiz, işiňize seredýän adamyň işi ýeňläp biler.

Indi bolsa täze setirden etjek şikaýatymyzyň mazmunyny ýerleşdirýäris. Bu ýerde biraz kelle işletmegimiz zerurdyr. Birinjiden, giňişleýin gürrüň bermeli, ikinjiden, gaty uzyn bolmaly däl. Arzanyň umumy uzynlygy 1-2 sahypadan köp bolmaly däldir. "Durmuşdan umumy zeýrenmeleri" aradan aýyryň. Sebäbi, "öň gowuçylykdy, indi hemme zat erbetleşdi" diýen ýaly zatlary okamak bilen başlyk adam ýurduň syýasy gurluşy ýa-da siziň ýaşyňyz oňa bagly däl diýip pikir eder we kömek edip bilmez.

Iň gowusy haýsydyr bir siziň hukuklaryňyzy we ruhy taýdan rahatlygyňyzy bozýan anyk faktlary beýan etmeli. Bularyň ikinjisi örän wajypdyr. Sebäbi, "ruh" bilen bagly şikaýatlar iň duýgusyz diýen çinowniklerimizi hem tolgundyryp biler. Olaryň özleri-de adam, olaram käwagt şonuň ýaly ruhy ejirleriň ezýetini çekmeli bolýarlar. Şeýle hem, mümkin boldugyndan köpräk faktlary getiriň. Şeýle bolanda, olar siziň problemaňyzy has aňsatlyk bilen göz öňüne getirip bilerler we çykalga taparlar.

Täze setirden siziň gaýgylaryňyzyň günäkärini esasly görkezmeli. Günäkär adam-da bolup biler, haýsydyr bir ýagdaý-da bolup biler. Ony anyk görkeziň, nämä garaşandygyňyzy we nähili ýagdaý döränini düşündiriň.

Soňundan bolsa nähili netijä garaşýandygyňyzy aýdyň. "Dünýäde parahatçylyk bolsun" diýen ýaly abstrakt adalatyň gürrüňini etmäň, anyk talaplaryňyzy görkeziň: jogapkär adamyň ötünç soramagy, belli bir enjamyň çalşylmagy, çekilen zyýanyň tölenmegi, ahlak taýdan çekilen zyýan üçin kompensasiýa we ş.m.

Iň soňunda işewür görnüşde "Siziň jogabyňyza sabyrsyzlyk bilen garaşýaryn" diýip ýazyň. Aşakdan – sene, gol. Indi hatyňyzy gerekli ýerine iberiň ýa-da äkidiň we jogabyna garaşyň. Kanun boýunça arzaňyz bir aýyň dowamynda jogaplanmaly.

Ine, şunlukda bu işimiz hem bir ýanly boldy. Ýöne, munuň ýene-de birnäçe inçe ýerleri bar. Mysal üçin, ýüz tutanyňyzda, problema sebäp bolan günäkärden 1-2 dereje ýokarda oturan adama ýüz tutuň. Ýagny, eger slesar siziň göwnüňize degen bolsa, onda sehiň başlygyna ýa-da etrap häkimligine ýüz tutuň. Köp adamlar göni Prezidente ýa ministre ýazýarlar – munuň peýdasy köp däldir. Sebäbi, siziň arzaňyz aýlanyp sehiň başlygyna geler, ýöne ep-eslije wagtam sarp bolar.

Ýöne, elbetde, kiçiräk başlyklardan problemanyň çözgüdine derek ýönekeýje hatjagaz almagyňyzam mümkin. Ine, bu ýagdaýda gelen jogap hatynyň kopiýasyny birikdirmek bilen ýene-de 1-2 dereje ýokary ýüz tutuň. Indi siziň işiňize has ulyrak başlyk sereder we, belki-de, meseläni parasatly we adalatly çözer.

Şu ýerde bir zady aýtmagy makul bildim. Köp ýagdaýlarda arzalara seredilýärem, problemalaram çözülýär. Ýöne, beýle diýmek bilen siziň meseläňiz hem hökman adalatly çözüler diýip bolmaz. Maslahatym: eger-de gürrüň bir adamyň jany hakda gitmeýän bolsa, bu zatlary ýüregiňize gaty golaý eltmäň. Käwagt adamlar özleriniň närzaçylygyny şeýle bir çişirýärler welin bu olar üçin "ar almak" derejesine ýetýär, olaryň nerwleri üýtgäp başlaýar we kesellemegine getirýär.

Bir zady ýatda saklamaly – durmuş mydama adalatly däl, ýöne şonda-da gowy. Golaýlaryňyzyň we daşlaryňyzyň günäsini bagyşlamak olardan ar aljak bolmakdan has gowy, has aňsat. Köp problemalary bolsa özüň çözeniň, başga biriniň kömegi bilen çözeniňden gowy. "Çykyp duran ýiti zadyň gapdalyndan aýlanyp geçmek ony endamyňy pers-ala edip küteltjek bolmakdan gowudyr".

Onsoňam bilmedim, meniň edýän pikirim dogrymy, nädogrymy, ýöne, özümiň-ä köp meselelerimi çözmekde resmi adamlaryň kömeginden dostlarymyň, tanyşlarymyň kömegi has köp degdi.

Işiňizde üstünlikler!

Saglygyňyz!