Magtymguly pyragydan goshgular.
Galar yaranlar
Gel, köňlüm, azm eýle baky dünýäýe,
kim pany dünýäde galar, ýaranlar,
bu dünýä mülkünde mülki-möwlaýa
ne käfirdir, müňkür bolar, ýaranlar.
kim galar ölmeýen ajal ýetensoň,
goýmazlar gezmäge ýaka tutansoň,
isa bilen mäti gelip, ötensoň,
ysrafyl bir saýha kylar, ýaranlar.
hakyň gudratyna baksyn gözleriň,
ýüzleri çöl galar dagyň, düzleriň,
uçaryň, ýöräriň, tili sözläriň,
ezraýyl janyny alar, ýaranlar.
ezraýyl gahr ile iner şeýtana,
şeýtan ajyzlaýyp, gaçar her ýana,
biler ki, gutulmaz gaçyp bir ýana,
serendipde baryp öler, ýaranlar.
ol günüň hasaby geçer ferdaýa,
asmany sust eýlär, zemini zaýa,
gazap donun geýip geler derýaýa
derýalar gorkuban, guryr, ýaranlar.
ýykylar, ýok bolar daglar, saraýlar,
ýyldyzlar döküler, dolar bu jaýlar,
gün şuglasyz dogar, tutular aýlar,
daglar gurşun kimin erir, ýaranlar.
adamyň nefsi dek ýagdyr barany,
ot kimin je’l edip, çykar ynsany,
ezraýyl hem berer amanat jany,
tört perişde täze dirler, ýaranlar.
ysrafyl sur çalar çygyryp her ýan,
ýok bolan jesedler, aýrylyşan jan,
kesilen damarlar, gury istihan,
asgyrşyp-asgyrşyp turyr, ýaranlar.
bir ýandan sorag bar, bir ýandan jowap,
bir ýandan ataş bar, bir ýandan azap,
bir ýandan mizan bar, bir ýandan hasap,
eden işiň bir-bir sorlar, ýaranlar.
dine güwä diýrler parzy, sünneti,
ýetmiş fyrka durur, görüň milleti.
on iki guruh bolup resul ymmaty,
her biri bir jynsda sürler, ýaranlar
golsuz gopar goňşa ýaman sananlar,
doňuz bolup sürler namaz goýanlar,
zekatsyzyň garny ýylan, içýanlar,
doluban, dag kimin bolar, ýaranlar.
erte görner bu gün gizlenen syrlar,
ýalandan güwälik beren ýeserler,
ýeňsesinden bogazna dek keserler,
otly gürzi bile urlar, ýaranlar.
jebir eden häkimler bolarlar gözsüz,
görüp, diýmeýenler galarlar tilsiz,
zynaçylar başy garnynda, golsuz,
aýagy başynda bolar, ýaranlar.
magşar halky bet ysyndan ýigrener,
günäleri ýerden göge direner,
süýthor içegesi ýerden süýrener,
garny dag dek otdan dolar, ýaranlar.
bu dünýäde “menem-menem” diýene,
jebir elin halk üstüne goýana,
bir ot bolur ýetim malyn iýene,
rusyýa-şermende bolar, ýaranlar.
çakyrhoruň gözi, bolmaz ornunda,
dişi sygyr şah dek durar burnunda,
dodak synasynda, dili garnynda,
iýdigi agzyndan geler, ýaranlar.
ata-ene agyrdanyň günleri,
içi-daşy otdan bolar donlary,
halka ryswa, ala bolar tenleri,
suw ýerine zäher berler, ýaranlar.
on ikinji guruh, görüňler, näder:
mesjid bugra bolup, münübän gider,
ymamlary surer, mu’azzen ider,
ýüzleri aý kimin durlar, ýaranlar.
bular ýyldyrym dek ýalpyldap geçer,
ýa hem ýüwrük at dek per baglap uçar,
egni ýetmiş donly hüýr gyzyn guçar,
hasret gidip, aşret geler, ýaranlar.
kelamda gördügin sözlär tilimiz,
ahyr ajal üstündedir ýolumyz,
magtymguly aýdar, biziň halymyz,
ýa reb, ol gün niçik bolar, ýaranlar.
Arhiwiň ýagdaýy
● Doly tekst
● 17/17 teswir saklanypdyr
Ýazylan saýty: teswirler.com · Çeşme: Web Archive nusgasy — ertir.com, 9 maý 2012 ý. · Asyl sahypany gör ↗
Teswirler 17
öýler görer sen
panydan bakyýa barmaly bolsaň,
tüýnüksiz, gapysyz öýler görer sen,
namaz kylmaý, bigam ýatmaly bolsaň,
tamug-dowzah atly jaýlar görer sen.
özüňe dost bilme pany dünýäni,
ýalançyda gazanmagyn günäni,
baş atyp, göz gypyp, etme zynany,
gabyr içinde çygyr, waýlar görer sen.
namaz bile bäş işiňi jaý etgin,
toprak bile öz köňlüňi taý etgin,
muhammet zamundyr, şunda waý etgin,
ajdarha, mar atly möýler görer sen.
terk eýlemäwergin bäş wagt namazyň,
gör içinde egsik bolmaz owazyň,
gyşyň eda bolup, tükenmez ýazyň,
aby-köwser atly suwlar görer sen.
ol iki çeşmiňi gözüňden akdyr,
ýoldaşyň imandyr, ýaradan hakdyr,
menziller yrakdyr, ýollar uzakdyr,
ýaşmaz günler, batmaz aýlar görer sen.
bir gün zaýa eýlär, asman, zemini,
derýalar gark eder suwda gämini,
iller, beýan etsek ýedi tamugny,
içinde zekatsyz baýlar görer sen.
säher turup, tiliň senalar sana,
açlara nan berip, ýalaňaç-dona,
rahym ýoldaş etse seni imana,
behişdiň içinde toýlar görer sen.
asly käri gazanyňda, aşyňda,
perişteler oýluşarlar daşyňda,
hüýri gyzlar gelip durmuş gaşyňda,
lagly-jöwharydan şaýlar görer sen.
bende, Magtymguly, çagyr allany,
azazyl şeýtana berme pelläni,
nesip etse jennet içre hülläni,
münseň, byrag atly taýlar görer sen.
dini biläni
bäş işi berjaý kyl, musulman bolsaň,
ýöri muhammediň dini biläni.
ýüz ýigrimi dört müň pygamber ötdi,
her biri bir ymmat sany biläni.
ryzwanlar giderler gapy köşgüne,
gijeler ýagtylar göwher yşygna,
aly, hatam başlar jennet işigne,
jomartlar geçerler nany biläni,
sap-sap gurup hüýr gyzlardan gözledip,
saýlap alar her birinden hezil edip,
byrag atyn çar tarapa hyzladyp,
şehidler geçerler gany biläni.
roza – hemdemiňdir, namazyň – çyrag,
zekat – hasabyňdyr, imanyň – ýarag,
bu gün bir at berseň, magşar gün – byrag,
çekerler gyzyldan zini biläni.
magtymguly mestan, yşk jamyn içer,
kim ajal elinden gutular, gaçar,
syrat köprüsinden salamat geçer,
haka gulluk eden jany biläni.
özi behişdiň
gökden ýokarydyr, arşdan aşakdyr,
eý ýaranlar, orny – özi behişdiň.
hezar müň nagmasy, ýüz müň mukamy,
daýym guruglydyr sazy behişdiň.
hyzyr ýaşyn rozy kylsa gezmäge,
dawut kätipligin berse ýazmaga,
gije-gündiz bolsam şahrin düzmäge,
müňden bir aýdylmaz sözi behişdiň.
derwiş düýşde görüp bolmuş aşygy,
gyzyldan gaýrylmyş ferşi, işigi,
älemi gark eýlär nurdan yşygy,
eger bir açylsa ýüzi behişdiň.
kelam içre okyp aýdar mollalar,
gullukçy-ryzwanlar, ençe şelleler,
murassag halkalar, näzik hülleler,
tükenmez nygmaty-nazy behişdiň.
şerhini aýtmaga agzym, dilim ýok,
hak özi häkimdir, jebir, zulum ýok,
gaýgy-gam ýok, garrylyk ýok, ölüm ýok,
aýrylmaz, sowulmaz ýazy behişdiň.
ýüz şerbetden mäjum bolup gatylan,
gara saçlar ak topukda çatylan,
guraban turaban täze ýetilen,
sypanar, sallanalar gyzy behişdiň.
münüp seýran üçin byrag atlary,
günbe-günden artar köňül şatlary,
lagly-ýakutdandyr bolan zatlary,
hiç bolmagaý gerdi-tozy behişdiň.
bişgeý elwan el degmeýin aşlary,
gudrat bilen birýan bolup göştleri,
taý geler dünýäge dirhem daşlary,
artykdyr her ýeten çizi behişdiň.
her nobat müň dürli şerap içilen,
almaz hünji, ýakut, dürler saçylan,
reňbe-reň bihasap güller açylan,
müşki-anbar kokar ysy behişdiň.
hak kabul eýleýip dostun, agýaryn,
hasyl edip, her ne maksadyn baryn,
görsedip ol günde halka didaryn,
budur mü’minlerge razy behişdiň.
magtymguly, waspy gelmez dillere,
dile gelse, beýan etsem illere,
ajyz bendelere, asy gullara,
ýa reb, özüň eýle rozy behişdiň.
alnyňda
nä günüňe şat bolar sen, adamzat,
sansyz hatar ahu-zarlar alnyňda.
niçik takat kylar bir muşt toprak,
ýedi dowzah atly narlar alnyňda.
biwepada bäş gün bolan şadyňa,
aldanmagyn, ol gün düşer ýadyňa,
taňla onda hiç kim ýetmez dadyňa,
gabyr, lahat diýen darlar alnyňda.
biler sen, biwepa, ygtybaryň ýok,
ýaman iş kylmakdan özge käriň ýok,
eý, bigaýrat, namysyň ýok, aryň ýok,
howpu-hatar bişumarlar alnyňda.
zerre-zerre bir-bir sorsalar hasap,
rusyýa, şermende, berer, sen jogap,
istär seni, bermek üçin gyýn, azap,
ýüz müň sansyz hyrydarlar alnyňda.
eşit bu dem eger bolsaň gaýratly,
halyň bolar günbe-günden haýhatly,
çakaýyn diýip oturypdyr haýhatly,
bugra kibi ulug marlar alnyňda.
gapyl bolup emri-magrup etmeseň,
bilip durup, dogry ýola gitmeseň,
ahyret ýaragyň munda tutmasaň,
peýdasyň puşeýman, zarlar alnyňda.
magtymguly neçün gapyl ýörer sen,
bibaka dünýäde tä ki durar sen,
niçe söwda bar başynda, biler sen,
syrat üzre intizarlar alnyňda.
atamyň
altmyş ýaşda, nowruz güni, luw ýyly,
turdy, ajal ýolun tusdy atamyň,
bu dünýäniň işi beýlemiş, beli,
ömrüniň tanapyn kesdi atamyň.
agyr döwletlere köňül goýmady,
bu jahanyň eşretini söýmedi,
eski şaldan artyk puşeş geýmedi,
ahret öýi boldy kasdy atamyň.
diýrdi: dünýä durmaz, ömre baky ýok,
gündiz roza, gije bolsa uky ýok.
müňkür bilmez, mahluslaryň şeki ýok,
pygamber destidir desti atamyň.
görmesem söýlemen, oý bile çenden,
maksadyna ýeter ýykylan çyndan,
ýarysy melekden, ýarysy jyndan,
müjewürsiz bolmaz üsti atamyň.
nukaba diýrler, üç ýüz eren ugraşdy,
çiltende atama nazarym düşdi,
nujeba barsam, heftenlere garyşdy,
abdallardyr çyn peýwesti atamyň.
älem içre adam galmaz, at gezer,
bu syrlardan jahan halky ýat gezer,
jany jennet içre, gökde şat gezer,
ýerde hoşwagt ýatar posty atamyň.
magtymguly, gizlin syryň bar içde,
kämil tapsaň, kyl gullugyn serişde,
magşar gün gaýgysyz girer behişde,
her kim çyndan bolsa dosty atamyň.
Talyplar comda okadym gowy goshgular eken sizing bilen paylashmagy makul bildim! Owreniji agzanyng(hadyslar) temasyndan.
Magtymguly pirin goshgularyny okamaga mumkincilik berenin ucin Allah razy bolsun.
teymir minnetdar! Gowy go$gularyny tapyp goyypsyñ.
Sizede okanyngyz uchin minnetdar
Magtymguly, sozle herne bilenin,Ozune kemlik bil aytman olenin,Taraslap saglatgyn konle gelenin,Senden sonkylara yadigar bolar.
Sagja bolun Teymir dayy. Owrenjinem tanayan gowja oglan.
Berekella koneleri yatlapsan olarsyz bizin geljegimizem bolmazdy tugeleme
Berekella we minnetdar yazanyn un!
Tuweleme. Goshgyny gowy yazypsyn.
haladym
Turkmenin diregidir!
TÜRKMENIŇ
Jeýhun
bilen bahry-Hazar arasy,
Çöl üstünden
öserýeli türkmeniň;
Gül-gunçasy –
gara gözüm garasy,
Gara dagdan
iner sili türkmeniň.
Hak
sylamyş bardyr onuň saýasy,
Çyrpynşar çölünde neri,
maýasy,
Reňbe-reň gül açar
ýaşyl ýaýlasy,
Gark bolmuş reýhana
çöli türkmeniň.
Al-ýaşyl bürenip
çykar perisi,
Kükeýip bark urar
anbaryň ysy,
Beg, töre, aksakal
ýurduň eýesi,
Küren tutar gözel ili
türkmeniň.
Ol merdiň ogludyr,
mertdir pederi,
Görogly gardaşy, serhoşdyr
seri,
Dagda, düzde kowsa,
saýýatlar diri
Ala bilmez, ýolbars
ogly türkmeniň.
Köňüller,
ýürekler bir bolup başlar,
Tartsa ýygyn, erär
topraklar-daşlar,
Bir suprada
taýýar kylynsa aşlar,
Göteriler ol ykbaly türkmeniň.
Köňül howalanar ata
çykanda,
Daglar lagla döner
gyýa bakanda,
Bal getirer, joşup
derýa akanda,
Bent tutdurmaz, gelse sili
türkmeniň.
Gapyl galmaz, döwüş güni har
olmaz,
Gargyşa, nazara giriftar
olmaz,
Bilbilden aýrylyp,
solup, saralmaz,
Daýym anbar saçar
güli türkmeniň.
Tireler gardaşdyr, urug
ýarydyr,
Ykballar ters gelmez
hakyň nurudyr,
Mertler ata çyksa, söweş
sarydyr,
Ýow üstüne
ýörär ýoly türkmeniň.
Serhoş bolup çykar, jiger
daglanmaz,
Daşlary syndyrar,
ýoly baglanmaz,
Gözüm gaýra düşmez köňül
eglenmez,
Magtymguly – sözlär tili
türkmeniň.