BAGYŞLA! GEL, YARAŞALY! GITMESENE!

BAGYŞLA

Şo gün seň gelerňe garaşyp durkam,
Bir gözel gyz bilen sen gidip barýaň.
Ynan, şonda şeýle begendim, bilseň,
Tebigat saklanyp bilmedi, arman...

Şo gün ähli baglar ýapragyn dökdi,
Ähli guşlar gyrdy birden ganatyn.
Ýalan sözläp nämedeýin, özüm-ä,
Ýanyňdaky gözel gyzy haladym.

“Ony edil meň söýşüm deý söý” diýip,
“Edil men deý aýa” diýip, hut şo gün,
Seň owadan gözleň saýlan gyzyna,
Sogrup ýüregimi beresim geldi,
Arman...
Arman, ony öz ýerinden tapmadym,
Bagyşla...

GEL, ÝARAŞALY!

Enşalla,
Şu gün uzynly gün ýanyňda boljak,
Ähli işleriňi goýup gel senem.
Maňa ilki bilen şo-ol öňkiň ýaly ,
Günüň dogşy hakda gürrüň bersene.

Gürrüň ber baglaryň oýanşy hakda,
Hem oýarşy hakda ýazlaryň bizi.
Kä gürrüňleň dagy sygmasyn akla,
Nämemiş, jadyly saçaga, hakyt,
Äkidýämişinler ýalbaryp bizi.

Gowy, hä,
Şol köne ýol bilen düýşleň gelişi,
Ýadyňa düşýämi öýkeläp gidip,
Soňam ýene öz-özümiň gelişim.

Aýtsana, bilýäň-ä, garlawaçlaryň,
Çagalarna aýdan ertekisini,
Gürlesene, dymma, göresim gelýär,
Men düýnki, şu günki, ertirki Seni.

Awtory Laçyn Pürjäýewa.