Dialog

Dialog

YKBAL:
Gijäniň ýarynda gapyny kakýan
Niçiksi adam sen? Telbemiň, nadan?

ŞAHYR:
Özüň bil, onçasyn aýdyp biljek däl.
Ýöne Seň ýanyňa geldim men, Ykbal...

YKBAL:
Görýärsiň ahbeti: dünýä garaňky.
Nädip wasp etjek Sen gara reňki?

ŞAHYR:
Isle ýagty bolsun, isle garaňky –
Meni gorkuzanok dünýäniň reňki.
Namutlyk diýen zat meniň üçin ýat.
Garaňkylykda-da bolup bilýän şat.
Dowzahyň içinden uçmaha bakýan.
Git diýme... şahyry kabul et, Ykbal...

YKBAL:
Men Saňa dözemok. Sen entek juwan.
Görjegiň öňüňde. Nirä howlugýaň?
Gaşlaryň bulut deý paralanyp dur,
Saçlaryň egniňde buýralanyp dur.
Nirden gelen bolsaň – yzyňa öwrül.
Seni çagyryp dur al-elwan bägül.

Älemgoşar kimin gülleň içinde,
Gür jeňňeliň, gök jülgeleň içinde
Gözelligi wasp et! Ýalňyşjak bolma!
Behişdi dowzaha çalyşjak bolma!

ŞAHYR:
Çeşmeler, bägüller, müşkler-atyrlar
Wasp edilmek üçin mynasypdyrlar.
Ýöne şo lezzetden känler mahrumkan,
Şahyryň ýüregi ynjalarmykan?
Dünýäden ýok bolup tümlük, nadanlyk,
Ýeriň ýüzün tutaýýança bossanlyk –
Şol hakda ýazaryn...

YKBAL:
Giriber, şahyr.
Seniň maksadyňa düşündim ahyr.
Ýöne saýlan ýoluň agyrdyr agyr.
Göreşler içinde bolarsyň ýagyr.

ŞAHYR:
Maňa şondan başga ykbal derkar däl.
– Gir, gir, gujaklaýyn!
Topuldy YKBAL.

Awtory: EDUARDAS MEŽELAÝTIS, Litwa şahyry
Terjime eden: KERIM GURBANNEPESOW