DILEWAR SATYJY

Towuk almak üçin nobata duranlaryň sany barha artýardy. Satyjy Suwhan Çaňlyýewiň muňa köhi gelip, keýpi göterilýärdi.
- Çaltrak!... - Çaltrak!... – diýýän alyjylaryň arkasyna kakyp, hä beriberesi gelýärdi.
Ol pakete dolangy towuklary terezä bat bilen atýardy-da, hasyr-husyr yzyna alyp ýyrşarýardy.
-Dört kilo... Üç kilo... Bäş kilo... Noş bolsun!... Gramlaşyp, ownudyp durmak nämä gerek!.. Bu towuklary iýeniň göwni kosmosdan bärde eglenmez... Gel, bal ýaly towuga gel!..
Nobatyň orta gürpüräginde duran pensioner Myrat aga oňa gahar bilen garaýardy. Satyjynyň gep owadanlap, el oýnadyp ilaty çürkeýşine gojanyň jany ýanýardy.
Ahyry Myrat aga-da nobat ýetdi. Suwhan öňküdenem bäş beter möwç urdy. Ol arzuwly awy eline düşen ýaly boldy.
-Geregiň agzyňda eräpjik duran towuk bolsun, ýaşuly jan! Bilýämiň, bujagaz eýjejik towuklar nireden saňa iberilipdir, ä? Bujagazlaň näçesini çekeýin, atamjan?
Ýaşuly dişini gysyp gepledi.
-Dördüsini çek.
-Dördüsini çek diýseň, dördüsini çekerin, bäşisini çek diýseňem bäşisini çekerin, ýaşulym! Meniň ýanymda onuň onuň hiç gürrüňi bolmaz, agam jan!
Çaňlyýew paketdäki towuklary iki-ikiden terezä güşçüldedip atdy.
-Ine dört towugyň, ýaşulym! Kilo sanyň-a bäşden ötdi. Ynha büýem çekiň. Kassa bardajyk hasaplaşaýyň. Hezil edin. Iýip gönen, ýaşuly jan!..
Myrat aga ajy ýylgyrdy.
-Sag bol.
-Sag boluňy iýeňsoň aýdarsyň, ýaşulym!..
Goja beýle ýanynda süýjüdir köke satyp duran gelniň ýanyna bardy.
-Gyzym, şulary bir çekip göreli-le.
-Ýog-eý, atam! Men Suwhanyň çekenine baş goşup bilmerin-eý!.. Eger-eger...
Kimdir biri satyja dokumendini görkezdi.
-Çekiň!
Satyjy Myrat aganyň towuklaryny dessine terezä basdy.
-Barlagçy çek diýse çekmeli bor. Bagyşlaň,...
-Üç kilogram dokuz ýüz elli gram – diýip, barlagçy seslendi.
Myrat aga ýüzüni kürşertdi.
-Elhepus, onuň biynsapdygyny-how!
Barlagçy bilen Myrat aga ikisi Çaňlyýewi gyssap ugrady.
- Nädýaň-aýt, ýaşulym! – Satyjy ýalym-ýulym, dylym-dylym etdi. – Men saňa dört dälde bäş towuk çekip beren ýalydymla, ýaşulyjan. Hany bularyň bäşinjisi?.. Wah ötünç soraýan ýaşulym! Ine-laý, içigaryň bäşinjisi. Ýa walla, bu ýalňyşlyk bilen bu taýda galaýypdyr-aýt, ýaşuly jan.
Barlagçy dözümli aýtdy.
- Ýöne, Çaňlyýew, seniň özüň welin, ýalňyşlyk bilenem bu taýda galmarsyň!