Nädip ýaşap bilerdiň?

Nädip ýaşap bilerdiň?
(IOHANNES SEMPER, Eston şahyry)

Her ullakan, her kiçijik bagtyňda
Dostuň goldamadyk bolsa wagtynda,
Uçut gaýalara çykyp barýarkaň,
Orta ýoldan gaýdan bolsaň çiň-arkan –
                             Nädip ýaşap bilerdiň?

Söýgüliň bolmadyk bolsa öýüňde,
"Äkitjek däl" diýse "Äkit" diýeňde,
"Getirjek däl" diýse diýeňde "Getir",
"Oturjak däl" diýse diýeňde "Otur",
Seniň geçen ýoluň geçmedik bolsa,
Ajyny, süýjini içmedik bolsa,
Dymanyňda ýa-da dürler seçeňde
Diňe ýalňyz bolsaň öýüň içinde, –
                             Nädip ýaşap bilerdiň?

Jeň gününde ot içinde barýarkaň,
Ýeňiş diýip diňe öňe garýarkaň,
Ynanmadyk bolsaň ýeňjekdigiňe,
Ýa ýeňiljekdigiňe ynanan bolsaň,
Ýa ynanan bolsaň öljekdigiňe,
Ýa ýöwselläp, bir dem sagynan bolsaň,
Ýagtyň garaňkyny ýeňjekdigine
Şübhelenen bolsaň ýekeje minut,
Ýa ynanyp biweç geçjekdigiňe,
Dem salymlyk bolsaň dünýäden namut,
Öňe gitmek üçin uzak, uzak, uzak,
Öwrenmedik bolsaň halkyňdan sapak, –
                             Ýeri, nädip, nädip ýaşap bilerdiň?

Terjime eden: KERIM GURBANNEPESOW