22-nji gyşky olimpiýa oýunlaryna badalga berildi.

Ine-de köp wagt bäri garaşylan 22-nji gyşky olimpiýa oýunlaryna badalga berildi. Mälim bolşy ýaly olimpiýa oýunlary Russiýanyň Soçi şäherinde geçirilýär. Açylyş dabaralarynyň başlanan wagty Moskwa wagty bilen 20 sagat 14 minut. Bu Russiýanyň taryhynda ilkinji gezek geçirilýän gyşky oýunlarynyň ýylyny alamatlandyrýar. Ýaryşa 88 ýurtdan 3 müňden gowrak türgen gatnaşýar. Olimpiýa oýunlarynyň açylyş dabaralary 40 müň orunlyk fisht stadionunda geçirildi. Bu stadion 2018-nji ýylda futbol boýunça dünýä çempionatyny kabul edýän stadionlaryň sanawyna girýär. Russiýa Federasiýasyna ýurtlaryň 83-siniň paýtagtlarynyň üsti bilen getirilen alaw älem giňişliginde, suw astynda, dag belentliklerinde boldy. Umumy uzynlygy 65 müň kilometre barabar bolan aralykda alaw göterijileriň 14 müňüsi Soçi şäherine çenli 123 günläp ýol geçdiler.