Türkmenistanda häkimiýet we dolandyryş edaralarynyň ulgamy

Salam Hormatly Agzalar.

     Köpden bäri gyzyklanýan zadym - Türkmenistanyň Döwlet dolandyryş ulgamy. Näme üçin? Ýöne...gyzykly. Öz ýurdum hakynda hemme zatlary bilesim gelýär 🙂.
    Bilýän bolmagyňyzam mümkin (şu gyzam hemme kişiniň bilýän we iň bärkije biläýmeli zatlaryny aýdyp ýykdy diýäýmaň 🙂 ). Ýöne daşary ýurtda okap ýa ýaşap ýören ýaşlarymyz bilenok, öwrenmage mümkinçilik ýok bolmagy ahmal.
    Türkmenistanyň häkimiýeti we dolandyryş ulgamy dolulygyna Türkmenistanyň Konstitusiýasynda düşündirilen. Men şolary okap, size gyzgaça bellikleriň üsti bilen düşündiresim gelýar. Meniň özümä şeýleje edip ýazyp berseler gowy düşünjek 🙂:

===> Döwletiň we ýerine ýetiriji häkimiýetiň baştutany - TÜRKMENISTANYŇ PREZIDENTI. Türkmenistanyň iň ýokary wezipeli adamydyr. 

===> Türkmenistanyň kanun çykaryjy häkimiýetini amala aşyrýan iň ýokary wekilçilik edarasy - TÜRKMENISTANYŇ MEJLISI (Parlament). Ol kanunlary kabul edýär, Türkmenistanyň Konstitusiýasyna we kanunlara üýtgetmeler we goşmaçalar girizýär.  

===> Türkmenistanyň ýerine ýetiriji we serenjam beriji edarasy - MINISTRLER KABINETI (Hökümet). Türkmenistanyň Prezidenti Ministrler Kabinetiň başlygydyr. Ministrler Kabineti Türkmenistanyň kanunlarynyň, Türkmenistanyň Prezidentiniň we Türkmenistanyň Mejlisiniň namalaryny ýerine ýetirilmegini guraýar. 

===> Raýatlaryň hukuklaryny we azatlyklaryny kanun arkaly goraýan hem jemgyýetçilik bähbitlerini goramaga niýetlenen häkimiýet - TÜRKMENISTANYŇ ÝOKARY KAZYÝETI. Türkmenistanda kazyýet häkimiýeti diňe kazyýetlere degişlidir. Kazylar garaşsyzdyrlar, olar diňe kanuna tabyndyrlar we özleriniň içki ynam-ygtykadyna (şu sözüňem anyk manysyny bilemmok 🙂 ) gollanýalar. 

===> Türkmenistanyň kanunlarynyň, Türkmenistanyň Prezidentiniň, Türkmenistanyň Ministrler Kabinetiniň namalarynyň, Türkmenistanyň mejlisiniň kararlarynyň takyk we birmeňzeş berjaý edilişine gözegçilik Türkmenistanyň Baş Prokuroryna we oňa tabyn prokurorlara ýüklenilýär. Prokuratura operatiw-agtaryş işiniň kanunlygyna hem-de jenaýat işleriniň derňelşine gözegçilik etýär. 

Ine gysgaça bizin Watanymyzyň döwlet edaralarynyň ierarhiýasy (hierarchy) we gysgaça olaryň ýerine ýetirýän wezipeleri barada maglumat. 

Araňyzda doly we jikme-jik okajak diýeniňiz bolsa Türkmenistanyň Konstitusiýasynda hemmesi bardygyny ýatladaýyn 🙂

Hormatlamak bilen, Bibijan 🙂