SARY BILBILIŇ RUBAGYLARY
AMANDURDY ANNADURDYÝEW /SARY BILBIL/
RUBAGYLAR
Gapydan kowdular, törden kowdular,
Öýläne-de goýman, irden kowdular,
”Sesiñ sesimize meñzänok” diýip,
Gargalar bilbili hordan kowdular.
Tanyşyn, bilişin, görenin satýar,
Haryt alyp, haryt berenin satýar,
Ol tirýek satardy Käbä gitmänkä,
Hajy bolup gelip, geroin satýar!
Çeýnäniñ, ýuwdanyñ gumana boldy,
Boldy, dili kelte Amana boldy,
Zyñan köwşüñ bilen kowan aýalyñ
Gözläp ýörmeli bir zamana boldy.
Eziz adam derman seniñ dyrnagyñ,
Ýöne hakykady gaty görmegin,
Dogry aýdýañ, türkmen dürtmeseñ duýmaz,
Ýöne duýandan soñ dürtüp ýörmegin.
Bu durmuşda adalat kän, göreş kän,
Ýöne muña adalatlyk ýaraşýar,
Deñziñ kenaryna zyñlan balyk men,
Bir tolkunyñ gelerine garaşýan.
- ”Eşegiñ kellesine tylladan taññyr,
Düñder” – diýip, biri aýdypdyr öñ bir,
Eýder-beýder bildir eşekligini,
Ýa gulagyn çykar, ýa elhenç aññyr.
Gurbagany uçýar diýip ýamanlar,
Pyşbagany gaçýar diýip ýamanlar,
Eger ol Hudaýyñ öýün tapaýsa,
Muhammedi içýär diýip ýamanlar.
Gepleşilýän ýerde gepe düşerler,
Düşünmedik ýañsa alar, üşerler,
Eşeklerem juda akmak saýmagyn,
Eşek bolsañ, arasyna goşarlar.
Ýüregim bir erbet bulandy bu gün,
Göwnüm gaýga batdy, elendi bu gün,
Ak bazarda esräp duran ak iner
Eşek bahasyna dilendi bu gün.
Her geçip gideni gazdyr öýüdýär,
Her şemal öwsende ýazdyr öýüdýär,
Bir gün depesinden birje hoz gaçdy,
Indi bar agajy hozdur öýüdýär.
Käte gyşym, käte mylaýymym bar,
Eden işlerine müñ kaýylym bar,
“Jan” diýsem, emgenmän janymy aljak,
Ştatdan daşary Ezraýylym bar.
“Gepleme” diýýärsiñ, men name malmy?
Öñräkden gelýändir hakykat ylmy,
Atlananlar atasyny tananok,
Atasam tananok: oglumy, dälmi…
Diýmäñ: ”Amana-ha uşaklaýandyr”,
Susak tapmadyklar kaşyklaýandyr,
Nesip bolsa, setir baryn tirkärin,
Galyñ düşmekçi gar uşaklaýandyr.
Bu durmuşda işiñ telek bolmaly,
Goçam bolsañ, kelläñ kelek bolmaly,
Künti seni öýne çagyrsyn diýseñ,
Ýediarkañda ýeke jelep bolmaly.
Gylygyna düşýär, oduna düşýär,
Köwsaryna düşýär, badyna düşýär,
Takwanyñ baru-ýok algy-bergisi,
Namaza duranda ýadyna düşýär.
Durmuş pelsepesi irizdi halys,
Indi ýakyn bolup görnenok alys,
Gapymyzda iki maşyn saklanýar,
Birisi tiz kömek, birisi polis.
Hany bir bakaýyn, göreýin çykýar,
Ajal hanjaryna gara gyn çykýar,
- ”Kurandan nur çykýar” diýýärsiñ, hajy,
Seniñ kitabyñdan geroin çykýar.
Göz alnymdan ençe gowulyk geçdi,
Gowulyk mydama öwülip geçdi,
Şir ýoluny pişik tutdy pezzerip,
Şir şirligin etdi – sowulyp geçdi.
Dünýe üçin tämiz ellerim taýýar,
Ýöne käte öñe geçäýýär haýýar,
Haly dokan gelin ýer dyrmap otyr,
Nas satan bazary göçürip barýar.
Gül arzysy gülzar gülde tapylsa,
Dil arzysy şeýda dilde tapylsa,
Telpek baryn tikdi telpek ussamyz,
Indi geýer ýaly kelle tapylsa.
Ynanmazdym muny biri aýytsa,
Göwnüm ýa-da şeýleräkdir öýütse,
Başyñ dikkä pişik bolup süýkenen
It bolup topulýar, işiñ gaýytsa.
Ýapyldy gapylar, unduldy törler,
Ýol-ýodalar ýitdi, sümsünşip ýörler,
Batyllar şährinde ýeke göz şady,
Onuñam gözüni çykardy körler.
Söwda häli-häzir entek goýberiñ,
Danany goýberiñ, tentek goýberiñ,
Aýal gitse, açylýandyr etegi,
Rysgy joşar ýaly erkek goýberiň.
Tüm deý tokaýlarda atyñ siz hallan,
Size berekedi berilen Allañ,
Goý, diýsinler geldi amatly pursat,
Eý, eziz maýmynlar, adam bir bolmañ!
Olañ täsin, uly hyýallary ýok,
Wah, o ýanlary ýok, bu ýanlary ýok,
Nämüçin aýallar uzak ýaşaýar?
Sebäbi olaryñ… aýallary ýok!
***
Bu señ öz ýeriñde goýuldygyñdyr,
Täleýden sypmarsyñ diýildigiñdir,
Semredilýän bolsañ, bilip goýgunyñ:
Eý goýun, jan goýun – soýuldygyñdyr!
Arşivin durumu
● Tam metin
● 9/9 yorum korunmuş
Yayımlandığı site: teswirler.com · Kaynak: Web Archive kopyası — ertir.com, 1 Ağustos 2012 · Orijinal sayfayı gör ↗
Yorumlar 9
Rubagylar gaty gowy eken... berekella
Täzeje agzadanam +1-i kabul et.
Betinden
tanaýan öýdýän amandurdy agany.
ol raýkomda dagy hem işläpmidi.
ol ýogalan bolmaly.
kitaby, başgada goşgular barmyka. suwsap gidipidirin bular yaly goşgulara
Amandurdy aga olupmi? Gynandym. menin hem tanyshlygym bardy.baran yeri berilsin. Imany hemra bolsun!
Bu rubagylaryn hemmesi ozal teswirlerde goyulypdy.
Eý, duruň, duruň, Amandurdy aga entek aýatda diri. Ölenok, aýagaldygyna rubagy ýazýar. Kim göreýin diýse, jygyllyga baryp göräýsin. Söwdajyk edýändir.
Bu rubagylaryň öň teswirlerde goýulanyny bilmändirin. Bilen bolsam, goýmazdym. Ötünç soraýan.
Bu rubagylary Guneshden alyp goyulypdy. Yone son agzalar kopeldi. Olaryn kabiri gozden sypyp okaman bolsalar sizin tazeden goymagynyz belki gowy bolandyr. Men shu rubagylary okap doymayan. sary bilbil olupdir diydi gara pishik. Hay yalanchy pishik.Ol bilbili iyesi gelayipdir oydyan.Olmese gowy.Uzak yashajakdyr onda.yazawersin biz hem okaly.