Yene bir hadys

Pygamberimiz sallallahu aleyhi we sallam aydypdyrlar:
 
Allah tagala hazretinden gork! Iň kiçijik bir ýagşylygy hem pes hasap etme. Hat-da suw almakçy adamyň bedresini dolduryp bermek hem sogapdyr. Tekepbir we badyhowalykdan saklan, çünki Allah tagala beýle bendäni söýmez. Eger bir kişi sende bar bir aýyp bilen saňa sögse we masgara etse sen şonda bilýän aýyplaryň bilen oňa sögme, masgara etme, saňa sogap oňa günä ýazylar, hiç kime sögüji bolma.

Ýagşylyk bolsun, ýamanlyk bolsun ony ygtybar etmän (göz önüne tutman) hasapsyz galdyrmak elbetde ýagşy iş däl. Kuranyň aýdyşyna görä her kim zerräniň mysgaly ýaly haýyr ýa şer işlese, şonuň jesasyny görjekdir. Biriniň gabyna suw guýup bermek ýaly ujypsyz ýardamlar hem adamlaryň arasynda dostluga, agzybirlige sebäp bolýanlygy üçin Allah tagala ony hasanat (yagshylyk) depderine ýazar. Tekepbirlik, il aýbyny agtarmak, töhmet, gybat, şugulçylyk ýaly ýaramaz häsiýetler Adam oglunyň süňňi bozuklykdan gelip çykýandyr. Şonuň üçin beýle gylyklardan Allah tagala sygynmak lazymdyr (gerekdir). Bir kişi sizde bolan /ýa bolmadyk/ bir aýyp bilen size aýyplap ýörse, ýüzüňize gelip sözlese, siz onda bar aýyplary aýdyp ony masgara etmäň, “edişine” görä diýip ondan öç aljak bolmaň. Haram süýt emen çöp düýbüler bilen agzyňyzy deňäp öz mertebäňizi peseltmäň. Ine şonda siz sogaply bolup günäňiz oňa ýazylar. “Ýaman ada galdym, namysyma degdi” diýip arlanmaly däl. Akly pes, asly näpäk adamlaryň jogabyny berip ýola salyp bolmaz, olaryň jogaby jim durmakdyr. Nadanlaryň şyltagyna ähmiýet bermän öz belent maksatlary ýolunda hereket edip ýören bendeler hakykaty taparlar. Olara hemaýatçy (komekchi) boljak Perwerdigäri älemiň Özüdir, inşa Allahu.