EURO 2012-ä gatnaşýan ýygyndylardan nämelere garaşýas?! (Angliýa we Çehiýa)

Bilýänsiňiz, EURO-2012-ä bir aýdan hem az wagt galdy. 2012-nji ýylyň iň esasy sport wakalarynyň biri bolup taryha geçjek ýaryş bu ýyl Ukraýina hem-de Polşada geçirilmeli we bu iki döwlet ýaryşy gurnamaga häzir doly taýýar ýagdaýda.

Menem EURO-2012-niň öň ýanynda bu ýaryşa gatnaşýan 16 ýygyndy bilen sizi azajyk hem bolsa tanyşdyrmagy hem-de olaryň çempionatyň öň ýanyndaky ýagdaýlary barada ýazmagy özüme makul bildim. Şu günden başlap her gün EURO-2012-ä gatnaşýan ýygyndylaryň ikisi barada gürrüň etmekçi.


ANGLIÝA
Baş tälimçi: Roy Hodgson
Milli ýygyndyň kapitany: Scott Parker
FIFA reýtingi: 7
Dünýä çempionaty: 1966ý (çempion)
Ýewropa çempionaty: 1968ý hem-de 1996ý (3-nji ýer)

Çempionata sanlyja aýlar galanda tejribeli tälimçi Fabio Capellonyň garaşylmadyk ýagdaýda ýygyndyň başyndan gitmegi, EURO-2012-iň öň ýanynda Angliýany näme-de bolsa kyn ýagdaýda goýdy. Şondan soň tälimçi gözlegine çykan iňlisler bu meseläni aprel aýynda çözdüler. Milli ýygyndyň başyna 13-nji maýda West Bromwich Albion bilen şertnamasy gutarýan Roy Hodgsony getirdiler.

Çempionata wagt az, Angliýadan garaşylýan netije bolsa uly. Şonuň üçin Hodgsona örän kyn we jogapkärçilikli bir iş döwri garaşýar. Soňky dünýä çempionatynda özünden garaşylan netijäni bermedik Angliýalylary öz oýun sistemasyna öwrenişdirmek we ýygyndy bilen öwrenişmek EURO-2012-ä galan sanaýmalyja günlerde Roy Hodgsona aňsat düşmese gerek.

Ukraýina, Fransiýa hem-de Şwesiýa bilen birlikde çempionatyň D toparçasynda çykyş etjek iňlislere iň uly garşydaş fransuzlar bolar. Soňky ýewropa çempionatynda toparçasyndan çykyp bilmedik we soňky dünýä çempionatyna gatnaşmadyk şwedler hem angilýalylar üçin gorkunç garşydaş bolup bilerler. Özüniň ýer eýesi hukugyndan peýdalanyp, toparçada çykmak isleýän Ukraýinler bilen oýnaljak oýun hem Angliýa üçin aňsat bolmaz.

Angliýa soňky ýyllarda sostawynyň güýçlidigine garamazda owadan oýun, ýagny, özünden garaşylýan oýny görkezip bilenok. Hodgson eger-de bu meseläni kadaly ýagdaýa getirip bilmese iňlisler Fransiýaly, Şwesiýaly, Ukraýinaly toparçadan 1/4 finala çykaýanlarynda hem uzak gidip bilmezlermikä diýýän.

EURO-2012-de Angliýanyň esasy umyt baglaýan futbolçylarynyň arasynda Rooney, Terry, Gerrard, Hart, Barry, Lampard hem-de A.Cole dagylar öňräkde görünýär.

Oýnaýan futboly bilen gelejegiň ýyldyzy hasap edilýän Arsenally Jack Wilshere bu ýaryşda şikesi sebäpli çykyş etmez. Rooney bolsa UEFA-dan alan 3 oýunlyk jezasy sebäpli toparçadaky oýunlarda ýygyndysyna kömek edip bilmez.

Umuman, 1966-njy ýyldan bäri halkara ýaryşlarynda özünden garaşylan netijäni görkezip bilmeýän Angliýalylaryň EURO-2012-däki baş maksady çempionlyk. Bu maksatlaryna ýetmek üçin bolsa, iňlislere örän kyn bir ýaryş garaşýar.


ÇEHIÝA
Baş tälimçi: Michal Bilek
Milli ýygyndyň kapitany: Tomas Rosicky
FIFA reýtingi: 26
Dünýä çempionaty: 1934ý we 1962ý (2-nji ýer - Çehslowakiýa)
Ýewropa çempionaty: 1976ý (çempion - Çehslowakiýa), 1996ý (2-nji ýer)
Konfederasiýa kubogy: 1997ý (3-nji ýer)

EURO-2012-iň saýlama oýunlarynda toparçasynda 2-nji ýer alyp, play-offda Garadagy ýeňip 16-lyga galmagy başaran Çehlere bu ýaryşda kyn duşuşyklar garaşýar.

Polşa, Rossiýa hem-de Gresiýa bilen birlikde çempionatyň A toparçasynda çykyş etjek Çehlere toparçaň ähli ýygyndysy hem deň derejede güýçli garşydaş bolup biler. Çehiýalylara 1/4 finala çykmak üçin saýlama oýunlarda toparçasynda 1-nji ýer alan Gresiýany, şeýle-de soňky ýewropa çempionatynyň bürünç medalynyň eýesi Rossiýany utmak aňsat düşmese gerek. Çempionatyň iň gowşak ýygyndysy hasaplanýan, emma ýer eýelik mümkinçiliginden peýdalanyp toparçadan çykmak isleýän Polşa hem Çehiýa üçin utmasy kyn garşydaş bolaýmagy mümkin.

Tejribeden ýüki ýetik Cech, Baros, Rosicky ýaly ýyldyzlar bilen bir hatarda Hübschman, Polak, Plasil, Kadlec dagylar hem Milli ýygyndyda öňe saýlanyp biljek futbolçylar hökmünde görünýär.

Galatasarayly Milan Barosyň soňky ýyllardaky pese düşüşi, CSKA-ly Tomas Necidiň tramwalykdan soň öňki formynda däldigi tälimçi Michal Bileke ýygyndyň hüjüm pozisiýasynda meseleler döredip biler.

Soňky 2 ýewropa çempionatynda oýnan owadan futboluny bu çempionatda hem gaýtalamak isleýän Çehleriň EURO-2012-däki esasy maksady soňky 8-lige galmak bolup durýar. Meň pikirimçe Çehler muny başararlar.

Tema barada sizem öz pikirleriňiz paýlaşsaňyz minnetdar bolardym. Indiki tema Daniýa we Fransiýa barada bolar.
Sag boluň.

EURO-2012-iň sýürpriz ýygyndysy haýsy bolar?

Polşa(16%, 1 adam)

Irlandiýa(0%, 0 adam)

Ukraýina(33%, 2 adam)

Daniýa(16%, 1 adam)

Gresiýa(0%, 0 adam)

Çehiýa(33%, 2 adam)