Witrina

Witrina

Howanyň sowuklygy adamlaryň mähirli bakyşlary bilen ýylanýan gyş gününiň birinde, peýwagtyna gezmelemegi gowy görýän. Şeýle bir gün şäheriň belli-başly bazarynyň bir çetinden baryp, dükanlaryň hataryna ýetdim. Ädimlerimi haýalladyp, otlyň wagonlary ýaly yzygider seplenen dükanlaryň witrinalaryna göz gezdirdim.
Ynha-da, ýasama adamjyklara şu gyşyň modasy diýlip “karar alnan” eşikleriň üýtgeşikleri geýdirilipdir. Dükanyň içine girip, möwsümiň gyşlyklary bilen tanyşdym. Içindäkiler hiç neneň däldi. Satyjylar özleriçe haýsyny oňat hasaplasalar, şony hem witrinadaky modaçylara geýdirýärler. Şeýlelikde, ähli möwsümiň ilkinji moda eşiklerini adamlardan öň bular geýýärler.
Dükanlary bir hatar gezip boldum. Daşaryk çykyp, elimi kän bir ýylatmasa-da, geýenim üçin göwnümi ýyladýan elliklerimi çykardym-da, şarfymy soňky moda görä dakdym. Öz eşiklerimiň ýagdaýyna seretdim. Entek ýene bir gyşy sowarlykdy. Bu eşikler meniň witrinamyň witrinasydyr.
Meniň witrinamyň witrinasy... Meniň witrinam bolanda näme bolýarka?! Hakyky meni mahabatlandyrýan zat nämekä? Bu eşiklermi ýa-da menmi?
Menem bir zadyň witrinasymykam? Men nämäni sergileýän? Meniň bedenim, ruhumyň witrinasydyr. Eger beýle bolsa, bedenim ruhumy açyk, aýdyň, dogry görkezip bilýärmikä? Maňa bir zat bolsa, ruhuma näme bolýarka? Dükana her gelýän täze harytlaryň çalşyrylşy ýaly, beden bilen ruhy hem şoňa meňzedip, biri-birine bagly edip saklap bolarmyka?
Seredip otursam, duýgularyň hem witrinasy bolýan eken. Mysal üçin meniň goşgularym içki dünýämiň witrinasy, suratlar nakgaşyň, sazlar kompozitoryň, hüwdiler eneleriň, romanlar ýazyjylaryň, duralgadaky bildirişler şereketleriň, beýni akylyň, gözler ýüregiň, panylyk bakylygyň...
Synaglardan alýan bahalarym derse taýýarlygymdan nyşan bolsa, güler ýüzli bolmagym nämäni aňladýarka?!
Diýmek, göze görünýän hemme zat, bir zadyň witrinasy bolmaly. Görýän zatlarymyz görünmeýänleri, görmeýän zatlarymyz görünýänleri görkezýär. Diýmek, dünýädäki ähli zadyň ýaradylyşy dereksiz däldir. Şeýle tersliklere has köp gabat gelýäs: haýyr bilýänimizde şer, şer bilýänimizde haýyr bardyr...
Pikirlerimi jemläp ýetişmänkäm, bazara depeden göz aýladym. Agzynyň howurlary bilen ellerini ýyladyp duran satyjylaryň öňündäki Müsüriň piramidalaryny ýatladýan göz gamaşdyryjy miweler hem bir zatlar diýjek ýaly. Ol miweler baglaryň, baglar hem jennetiň aýnasy. Bu miweler şeýle süýji bolsa, jennetiň miweleri nähilikä?
Bazardan çykyp, duralga ýöneldim. Adamlar gelip-geçip durlar, edil bu dünýä ýaly. Dünýäň duralgasynda edil awtobusa garaşylşy ýaly, kimiň awtobusynyň haçan geljegi belli däl. Ýöne gelende her kim gezekli-gezegine münüp, hoşlaşyp ýetişmän daşlaşýarlar. Hawa, duralga, bu dünýäň witrinasy.
Beýle bolýan bolsa, bu dünýä nämäniň witrinasyka?!...
01.2010