Türkmen Milli Dogramasy

Salam agzalar! 🙂 

Bu gun dograma taýýarlamany öwreneliň!

Gerekli önümler: 1 kg-dan biraz kemirak et, sogan, pomidor, ýag (köpümiz talyp bolamyzsoň hökman gowurdagymyz bardyr, gowurdakdan bölekler we gowurdagyň ýagyny goşsaňyz has tagamly bolar), 1 kg un we duz.

Dogramanyň taýýarlanylyşy şäherden-şähere-de däl-de, maşgaladan-maşgala üýtgeýändir. Biziň taýýarlajak dogramamyz kiçijek student maşgalamyzyň ýagdaýyna göra we öýden daş ýerdäki şertlere laýyklykda taýýarlanan.

Ilki bilen dogramanyň çorbasyny atarmaly. Ilki bilen ýagy gyzdyrmaly, gowurdagyň ýagy bolsa has gowy. Gyzan ýagda etleri biraz gowurmaly

.

Et taýýar bolýança sogan we pomidorlary dograşdyrmaly. Et taýýar bolandan soň ilki bilen dogralan sogany goşmaly. Sogan biraz bişiberenden soň dogralan pomidory goşmaly we gowurmaly. Bular biraz ýagda gowrulandan soň üstüne suw guýmaly, duzyny ýetirmeli-de çorbany gaýnamana goýmaly. Eti doly taýýar bolup, ýumşak bolýança gaýnatmaly. Haýalyrak otda gaýnatsaňyz has gowy bolar.

Çorbasy taýýar bolýança çöregini bişireliň. Çöregi biz-ä 3 sany bişirdik, şonuň üçin çöregiň duzuny 3 çöreklik edip aldyk. Duzy mukdarlanyňyzdan soň biraz sowuk suwda duzy eretmeli. Suwuň üstüne gyzgyn suw goşup, un guýjak suwymyz ýyly bolar ýaly etmeli. Uny goşup, bekje tutyp hamyryny taýýarlamaly.

Taýýar bolan hamyry 3 bölege bölüşdirmeli. Her bölegi aýratynlykda ýaýmaly. Ýukajyk uly tegelek edip ýaýylandan soňra otda gyzdyrylyp eredilen gowurdak ýagyny çalaja üstüne ýaýradyp, ýag çalyp çykmaly. Ýagy çalanyňyzdan soň hamyry togalamaly, we yaglanyp goýulan halynda 10 minut dynç bermeli. Hamyr ýag bilen alyşýança duhowkany 180-200 derejede gyzdyrmaly. Soňra her tegelegi aýratynlykda duhowkanyň protiwenine sygjak derejede ýaýmaly we wilka (Türkmenistanda bolunsa tikeç ulanylýar) bilen ýüzüni basyp çykmaly. Duhowka salmazdan ozal hamyryň ýüzüne hökmany çalarak suw çalmaly. Hamyr gyzaryberen mahaly hem ýene bir gezek suw çalmagy unutmaň.

Taýýar bolan çöregi gyzgynlygyna dogramaly. Ähli çörekleri dograp bolýançaňyz çorbanyň eti hem taýýar bolar. Dogralan çöregiň üstüne etleri owradyp çykmaly. Soňra 2-3 sany maýdajyk dogralan sogany hem goşmaly.

Çorbanyň ýüzüniň ýagyndan dogralyp taýýarlanan çörek, et we soganyň üstüne azajyk guýmaly we ählisini gowy garyşdyrmaly.

Taýýar bolan dogramany her adam başyna bir şakäsesine salmaly we üstüne et gaýnan çorbasyny guýmaly.

Talyp üçin çykdaýjysy uly bolmadyk tagamlaryň biri (elbetde etiň ýagdaýyna göra üýtgäp biler). Bu naharyň esasy talaby wagt. Ýöne käwagt şonça wagtyňy sarp edeniňe degýän Milli Türkmen tagamy.

Işdäňiz açyk bolsun! 

Hormatlamak bilen =AýBibiJemal= 🙂