Pygamberlere iman

Ýaradan Allah, biz ýagny adamlar bolsa ýaradylan. Şonuň üçin adamyň tebigatyny, häsiýetlerini Allahdan gowy bilýän hiç kim ýok. Bolup bilmez. Gizlin we açyk, bilinýän we bilinmeýän, içki we daşky ähli hususyýetlerimizi bilýär. Biz bolsa, diňeje bize bildirilen zady öwrenip bilers. Ylmymyz çäkli. Näçe müň ýyl geçdi we henizem adamy gowy öwrenip bilmedik.

Özüni bilmeýän, özüni tanamakdan ejiz bolan ynsan, bir iki sany kanunlary keşbetmek bilen näçe buýsansada, aslyýetinde öňünde entek bilinmeýän zulmatly dünýä dur. Käte bu bilinmeýän kanunlara gara madda, gara parça, gara ýyldyz, gara planeta diýp adlandyrmakdan başgada çäre tapyp bilenok. Fizikanyň gözü ýetmeýän ýerlerine meta-fizika diýýär. Fizikanyň çäkli kanunlary bilen düşindirip bilmedik hadysalaryna para-normal diýýär. Adam psihologiýasynyň çäkli maglumatlary bilen düşindirip bilmedik häsiýetlerine para-psihologiýa diýýär. Çünki adam ejiz. Çünki adam nadan. Çünki adam ýatdan çykarýar. Çünki adam zalym. Häli geçen ýaňy ýakyndaky bolup geçen tebigy apatlaryň garşysyndaky ejizligini bilmejek derejede nadan we muny ýatdan çykarýar. We doganlaryna we tebigata we özüne garşy zalym.

Öz nebsine zulum edýän adamy, nadan bolan adamy, Ýaradanyny ýatdan çykarýan adamy Allah gowy tanaýar. Şonuň üçin Allah, adama Özüni tanatmak we bildirmek üçin, ynsana ahyretini gazanyp ebedi bagta ýetmegi üçin, hem bu dünýäsini abat etmegi üçin, ýol görkezjek pygamberler ugratdy. Adamlaryň içinden saýlanyp ugradylan bu pygamberler gelmesedi, adamlar, dogan doganynyň etini iýjek derejede haýwanlardanam beter ýagdaýda ýaşaýardy. Taryh, muňa we mundan hem beterlerine şaýatdyr!

Pygamberler bu zulmatly dünýäni, wahy diýlen nurly habarlary bilen aýdyňladypdyr. Medeniýetleriň esasy pygamberler bilen gurnalypdyr. Ylmy ösüşleriň esasy bolan hakykat yşkyny pygamberleriň beýanlary oýandyrypdyr. Sebäbi, nebsine garşy duryp biljek erke eýe bolmadyk, nebsine söz diňledip bilmeýän adamlaryň medeniýet gurmaklary mümkin däl. Durmuşyny egoizmiň penjesinde ýaşaýan, günini gün etmek üçin keýpu-sapadan, rahatdan başga zat islemeýän adamlaryň ylmy ösüş görkezmeklerini garaşyp bolmaz. Ýogsam, nebis we wyjdan diýlen içki mehanizmlary hem pygamberlerden öwrenmedikmi?

Erbetlige we zyýana eltjek islegleriň terbiýe edilmedik nebisden gelýändigini pygamberlerden öwrenmedikmi? Bu dünýäniň bir synag dünýäsi ekenini, durmuşyň manysyny, ölümiň soň däldigini, ölümden soň bu dünýädeki durmuşymyz üçin jogap bermelidigimizi, şonuň üçin ahlakly ýaşamak gerekdigini, ahlakyň nämedigini, ahlakyň kesgitlemelerini, dogruny we ýalňyşy, wyjdanyň hemme wagt dogrulyk tarapyny görkezýänini, dinimizi, Allaha we Onuň birligine iman etmegiň zerurdygyny pygamberlerden öwrenmedikmi?!

Bulary pygamberlerden öwrendik! Çünki biz diňe bize öwredileni bilýäris.

Galany, sadaja aklyň oýlap tapan şübheli toslamalaryndan ybarat.

Onda geliň, ýene bir gezek iman edeliň, Allahyň ugradan ähli pygamberlerine iman edeliň, çünki olar şübhesiz hak sözüň habary bilen geldiler...