DÜNÝÄ SYÝAHATÇYLYGYNYŇ MERJENI

DÜNÝÄ SYÝAHATÇYLYGYNYŇ MERJENI Ýurdumyzda ilkinji we ýeke-täk milli syýahatçylyk zolagynyň – «Awazanyň» ilkinji binalar toplumynyň açylmagy beýik galkynyşlar zamanamyzyň şanly taryhyna möhüm wakalaryň biri bolup ýazyldy. Bu waka ýurdumyzyň ykdysady, syýasy, medeni ösüşinde, raýatlarymyzyň bagtyýar durmuşynda täze bir belentlige göterilmegiň subutnamasy boldy. Syýahatçylyk pudagynda Türkmenistanyň öz mümkinçiliklerini şeýle ýokary derejede peýdalanmagy, dünýä möçberinde ägirt uly taslamalary durmuşa geçirmegi Hormatly Prezidentimiziň ýolbaşçylygyndaky assylly başlangyçlarymyzyň bütin adamzadyň eşretli ýaşaýşyna hyzmat etmegine ak ýol açdy. «Awaza» milli syýahatçylyk zolagynda gurlan ilkinji desgalaryň açylyş dabarasynda Hormatly Prezidentimiz bu syýahatçylyk zolagynda ýakyn wagtda täze gurulmaly desgalaryň ýene-de köp sanlysynyň gurluşygyna badalga berdi. Hormatly Prezidentimiziň hut ilkinji gurlan binalaryň açylyş dabarasynda gol çeken kararlaryna we buýruklaryna laýyklykda, gurluşyklaryň nobatdaky tapgyrynda bu ýerde teatrlaşdyrylan interaktiw deňiz çüwdürimler toplumyny, amfiteatry, çagalaryň attraksionly oýun meýdançalaryny, kafeleri, awtoduralgany, gök zolaklary, tehniki desgalary öz içine alýan seýilgäh, 250 orunlyk otelli dynç alyş merkezi, köp sanly dynç alyş öýleri, ýokary derejeli myhmanhana, lyžaly sport toplumy, yşyklandyryş we abadanlaşdyryş bilen bagly desgalaryň giden toplumy gurlar. Hormatly Prezidentimiz döwlet baştutany wezipesine girişen ilkinji günlerinden başlap, Hazar deňziniň türkmen kenaryny, onuň syýahatçylyk üçin iň amatly ýeri bolan Awazany dünýä syýahatçylygynyň merjenine öwürmek baradaky başlangyçlara badalga berdi. 2007-nji ýylyň 24-nji iýulynda Hormatly Prezidentimiz «Awaza» milli syýahatçylyk zolagy hakynda karara gol çekdi. Hormatly Prezidentimiziň bu karary syýahatçylyk hyzmatlarynyň, şol sanda myhmanhana hyzmatlarynyň we işiň oňa ugurdaş görnüşleriniň hilini ýokarlandyrmak baradaky wezipeleri toplumlaýyn çözmekde, syýahatçylar we maýadarlar üçin dürli amatlyklary üpjün etmekde uly ähmiýete eýe boldy. Şondan bäri geçen iki ýylyň dowamynda, ýurdumyzda «Awaza» milli syýahatçylyk zolagy baradaky habarlar dünýä doldy. Dünýäniň köp ýurtlaryndan iri maýadarlar bu zolakda uly syýahatçylyk maksatly desgalaryň gurluşygynda hyzmatdaşlyk etmäge höwes bildirdiler. Birnäçe halkara kompaniýalarynyň hut öz hasabyna bu ýerde iri sport we syýahatçylyk merkezlerini gurmaga taýýardyklary Hazaryň kenaryndaky zolakda gurlan ilkinji desgalaryň açylyş dabarasynda hem öz aýdyň beýanyny tapdy. Milli syýahatçylyk zolagyny döretmek boýunça gurluşyklaryň ikinji tapgyrynda milli kärhanalarymyz bilen bir hatarda dünýäniň ösen döwletlerinden iri maýadarlar gatnaşýarlar. Türkiýe Respublikasynyň, Birleşen Arap Emirlikleriniň, Russiýa Federasiýasynyň, şol sanda Tatarystan Respublikasynyň maýadarlary eýýäm işjeň hyzmatdaşlyklara girişdiler. Awazada desgalary gurmagyň öňde duran tapgyrynda daşary ýurt maýadarlary, döwlet pudak edaralary, ýurdumyzyň telekeçileri tarapyndan aýry-aýry desgalaryň gurluşygynyň bir wagtyň özünde amala aşyrylmagy umumy taslamanyň nobatdaky tapgyrynyň gysga wagtyň dowamynda durmuşa geçirilmegine şert döredýär. Hormatly Prezidentimiziň gol çeken degişli kararyna laýyklykda, gurluşygy döwletimiz tarapyndan maliýeleşdirilýän binalar we desgalar toplumynyň ikisini 2010-njy ýylyň iýun aýynda, birini bolsa 2011-nji ýylyň ýanwar aýynda ulanmaga tabşyrmak bellenildi. Şol bir wagtyň özünde, kärendesine bölünip berlen ýer böleklerinde hem daşary ýurtly maýadarlaryň we ýurdumyzyň telekeçiler birleşmesiniň serişdeleriniň hasabyna desgalaryň gurluşygy alnyp barlar. Syýahatçylyk zolagynda gurulmagy bellenen desgalaryň hatarynda teatrlaşdyrylan interaktiw deňiz çüwdürimler toplumyny, amfiteatry, çagalaryň attraksionly oýun meýdançalaryny, kafeleri, awtoduralgany, gök zolaklary, tehniki desgalary öz içine alýan umumy meýdany 83600 inedördül metr bolan seýilgäh «Awaza» milli syýahatçylyk zolagy baradaky komitetiň buýrujy bolup çykyş etmeginde, baş potratçy «Türkmennebitgazgurluşyk» döwlet konserni tarapyndan gurlar. Şunda gurluşygyň bir bölegi bolan seýilgähiň taslamasyny düzmek we interaktiw deňiz çüwdürimler toplumynyň gurluşyk-gurnama işlerini ýerine ýetirmek kömekçi potratçy hökmünde Birleşen Arap Emirlikleriniň «Fountains International Trading LLC» kompaniýasyna ynanylar. Mundan başga-da Türkiýäniň «Sehil Inşaat» kompaniýasy tarapyndan «Awaza» syýahatçylyk zolagynda awtomobil ýolunyň köprüsi gurlar, köçeleriň gök zolaklarynda agaç nahallaryny we dürli ösümlikleri ekmek hem-de suwaryş ulgamyny gurmak, köçeleri yşyklandyryş ulgamy bilen enjamlaşdyrmak we abadablaşdyrmak işleri ýerine ýetiriler. Bular bolsa, toplumlaýyn işleriň çäklerinde Awazanyň keşbiniň gysga wagtyň dowamynda düýpgöter özgermegine getirer. Bu görkezilen desgalaryň 2010-njy ýylyň iýun aýyna çenli, ýagny bary-ýogy bir ýylyň dowamynda gurlup ulanylmaga berilmegi bellenildi. Ýurdumyzyň dokma senagaty we söwda degişli ministrlikleriniň we pudak edaralarynyň adyndan Türkmenistanyň Söwda we daşary ykdysady aragatnaşyklar ministrliginiň buýurmagynda Türkiýäniň «Çizgi mühendislik» kompaniýasy tarapyndan guruljak 250 orunlyk otelli dynç alyş merkezi hem syýahatçylyk zolagyň dynç alyş desgalarynyň hatarynda öz mynasyp ornuny tapar. Bu kompaniýanyň wekili desgalaryň birinji tapgyrynyň açylyş dabarasynda desganyň hil taýdan ýokary derejede boljakdygy barada tüýs ýürekden ynandyrdy. «Awaza» milli syýahatçylyk zolagyny giňeltmek işinde ýurdumyzyň senagatçylarynyň we hususy telekeçileriniň hem goşant goşýandygy guwandyryjydyr. Senagatçylaryň we hususy telekeçileriň jemgyýetçilik birleşmesi hökmünde çykyş edýän Türkmenistanyň Senagatçylar we telekeçiler birleşmesi bu işde işjeňlik görkezip, öz meýilleşdirýän taslamasyny öňe sürdi. Taslamanyň oňlanmagy bilen, Hormatly Prezidentimiziň gol çeken buýrugynyň esasynda, birleşmä dynç alyş öýlerini gurmak üçin «Awaza» milli syýahatçylyk zolagynda 5 gektar ýer bölegi kärendä berildi. Ýurdumyzyň ilkinji we ýeke-täk syýahatçylyk zolagynda badalga berlen uly göwrümli maýa goýum işlerine daşary ýurt maýadarlarynyň öz serişdelerini gönükdirmekleri köpleriň ünsüni çekýär. Munuň özi, bu syýahatçylyk merkeziniň maýa goýum taýdan amatlydygyna, geljeginiň ulydygyna, dünýäniň çar künjünden syýahatçylary çekmek bilen, ýokary girdejileri gazanmaga mümkinçilik berjekdigine iri maýadarlaryň doly ynanýandyklarynyň güwäsi bolup durýar. Sebitiň tebigy syýahatçylyk mümkinçilikleri hem-de döwlet tarapyndan döredilýän şertler syýahatçylyk zolagynyň netijeli işlemegi, şol sanda daşary ýurt maýa goýumlaryny çekmek we syýahatçylar üçin amatly şertleri üpjün etmek babatda zerur mümkinçilikleri döredýär. «Awaza» milli syýahatçylyk zolagyny döretmek we giňeltmek bilen bagly alnyp barylýan işler Türkmenistan döwletimizde adam hakda edilýän uly aladalaryň bir bölegidigir. Hazaryň türkmen kenarynda ýokary derejeli syýahatçylyk zolagynyň döredilmegi daşary ýurt raýatlarynyň hem-de ýurdumyzyň öz raýatlarynyň medeniýetli dynç almagy, boş wagtlaryny netijeli geçirmekleri, sagdyn durmuş şertlerinden peýdalanmaklary üçin ähmiýete eýedir. Zolagyň ilkinji tapgyrynyň binalarynyň ilkinji müşderileri – daşary ýurt raýatlary bilen bir hatarda ýurdumyzyň öz raýatlary bu ýerde syýahatçylygyň häzirkizaman ösen derejelerine laýyk gelýän şertlerde dynç alarlar. ......