Aprel gijesi

Seniň arzuwlaň deý syrly bu gije,
Gündizleň şowhuny bireýýäm diňdi.
Uzyn menzillerden ýasap perenje,
Düýnler ýyldyzlaryň düýşüne siňdi.

Düşläp şahalarda usurgan ýeller,
Aý yşgyna ýuwulypdyr ýapylar.
Eger sen ynansaň ynam bererler,
Dilegime açylmadyk gapylar.

Ýat ýerlere ýerläp bilmän dolanan,
Ýatlamalar hanha çakyp dur çawuş.
Biz hyýal biz, ýorgutlara çolanan,
Galmarys günlere bolup nätanyş.

Diňläp gitdi yşga diýjeklerimi,
Birmahal melekler inip ýokardan.
Geňlemegil saňa mätäçligimi,
Men durmuşyň dilin ýatdan çykardym.

Barýar ynandyryp takdyr oýnuna,
Kem-kemden ýadyrgap başlan ýaşlygym.
Gitsem zyňyp, gözýetimleň goýnuna,
Obamy küýseden şäher düýşlerin.

Ýollaň ýüreginde goýup ädimlem,
Bagtyň erňeginden gördüm äňedip.
Gadym ertekileň çykyp ýadyndan,
Tanarmyň baraýsam başym sämedip.

Hanha söýgi otyr baglaň düýbünde,
Syrlaryn şem edip asmanda ýakan.
Gorkýan bir gün galmagyňdan müýnümde,
Bolup ýazgydymyň tersine akan.

Aprel. Gije. Seniň arzuwyň deýin,
Bar ýerde ýagşylyk hökümin sürýär.
Meň bolsa baryny unudyp şu dem,
Günleň düýbündäki ümsümligini,
Gysyp gysymyma,
Saňa bir zatlary aýdasym gelýär...