Kerim Gurbannepesow

BÄGÜLLI ÝIGIT

Bazardan gelýärin. Elimde sebet,
Sebedimiň içi – pamidor, kelem,
Kartoşka, badamjan.. Duralga çenli
Gurady aýaklam
Guruşdy ellem.

Şonda-da dyrjaşyp bar güýjim bilen
Bazardan çykýan-da duralga ýetýän.
Duralgaň öň ýanda – kijijik dukan,
Kiçijigem bolsa – içinde et kän.

Ondanam bir budy sebede atýan…
Awtobusa münýän. Sagynýan sakga.
Keýwany “bir düzüm gyzyl burç getir!”
Diýipdi ahbetin. – Haý, şofýor, sakla!
Awtobusy sakla! – Näme, ýaşuly?
- Aý, neme… gyzyl burç çykypdyr ýatdan…
Näme diýýänimi aňşyrmasa-da,
Gowy ýigit eken. Geçdi-de ýapdan,
Maşyny togtatdy. Açyldy işik,
Menem derrew bökdüm. Aslyşdy sebet.
Bir aýal yzymdan gygyryp galdy:
“Bu şlýapaň bolup ýörşüne seret!
Bir gün unaşyňy burçsyz içeňde
Geçmez öýtdüňmi sen bokurdagyňdan?!”

Awtobusyň içi sarsdy-da gitdi 
Burç söýmez adamlaň pykyrdysyndan.
Menem hüňürdedim: “Gülüpler geçiň,
Öýe gyzyl burçsyz barmajagym hak.
Keýwanyň buýrugy – meň üçin kanun:
Burç getir diýdimi – burç alyp barjak,
Zäk getir diýdimi – zäk alyp barjak,
Ol meniň öz işim. Size bagly däl.
Onsoňam men siziň äriňiz ýaly,
Ýa oglyňyz ýaly ejemogly däl!…”

Şeýdip öz-özüme teselli berip,
Bazaryň çetinden ätledim ýene.
Şeýle bir burçlar bar, köz ýaly burçlar!
- Essalawmaleýkim, burç satýan ene!
Burçuňyz ajymy?
- Datdajyk göräý.
Edil zirk ýalydyr.
- Sagja bol, mama.
Ozalam ot ýaly agzymyň içi.
Keýwanyňkam ýetik. Wah, seňki näme!

… Kelemli, käşirli, soganly, burçly
Bir putluk sebede kertdirip elim,
Bazardan saýlandym, giň köçä çykdym.
Köçe durşy bile gyz bilen gelin.

Garşymdan gyssanyp bir ýigit gelýär
Garagyýçak ýigit, dogumly ýigit.
Bir maralyň ýanna howlygyp barýar
Gujagy bir harman bägülli ýigit.

Şeýe bir, şeýe bir gyssanýar ýigit,
Onda-da şeýlebir gyssanyp gelýär.
Göýä bägülüne bakýanlardanam
Bägülüniň ysyn gysganyp gelýär.

Wah, nämä gyssanýaň, bägülli ýigit?
Wah, beýle gyssanmak nämäňe gerek?
Ýa-da eliňdäki bägüle derek
Sebediňi kartoşkadan dolduryp,
Gyzyl burçdan (we başgadan) dolduryp
Gitmeli günüňe gyssanýarmyň sen? 
Wah, nämä gyssanýaň, 
Bägülli ýigit?