Ýürekde beslenen arzuw

Paýtagtymyzdaky Baş drama teatrynyň us­sat artisti Ogulbike Garýagdyýewa bilen söhbetdeşlik:

– Ogulbike, söhbetdeşligimiziň başynda oky­jylarymyzy özüňiz bilen içgin tanyşdyraýsa­ňyz?

– Men Lebap welaýatynyň Atamyrat etraby­nyň Tutlygyzylaýak obasynda 1955-nji ýyl­da eneden boldum.

– Orta bilimi nirede we näçenji ýyl aldyňyz?

Orta bilimi almak üçin obamyzdaky 20-nji orta mekdepde 1964-1974-nji ýyllar araly­gynda okadym.

– Sizi teatr sungatyna ugrukdyran zat nä­me?

Elbetde, mekdep ýyllaryny ýatlamaly bolsa, ýatlara zat kän. Mekdebimizde drama gur­nagy hereket edýärdi. Oňa bolsa ussat mu­gallym Myrat Çöliýew ýolbaşçylyk edýärdi. 4-nji synpdan başlap, menem drama gurna­gyna gatnap başladym. Men esasan hem aýdym aýtmaga höwesekdim. Şol döwürler oňat görüp diňleýän aýdymym Gurban Gummanowyň aýdýan “Boýlaryňa” diýen aý­dymydy. Şol ýyllarda mawy ekranda meş­hur kinorežissýor we aktýor Alty Garlyýe­wiň “Aýgytly ädim” atly çeper filmi görkezi­lerdi. Meni bolsa şol filmdäki Aýnanyň keşbi halys özüne maýyl edipdi. Bizi şol wagtlar pagta ýygmaga äkiderdiler. Men bolsa gü­norta arakesmä çykylýan wagty elime gur­jak alyp, Aýnanyň çagasyny bagryna ba­syp, tokaýyň içinde duşmanlardan gaçýan pursadyny jan edip, joýalaryň içi bilen yl­gap, boýdaşlaryma, deň-duşlaryma görke­zerdim.

– Ogulbike, sizde, elbetde, artistçilik ugrun­dan ýokary bilim alşyňyz dogrusynda-da aý­dara zat kän bolsa gerek?

– Elbetde, men diňe artist bolmagy arzuw etdim. Hasam Smelýanskaýanyň Aýnasyny görenimden soň göwün beren kärime okap, işläp ýetesim gelýärdi. Şol wagtlar meniň daýzamyň gyzy Aşgabatda, uniwersitetde okaýardy. Men bir gün ejeme şony göresi­miň gelýänini duýdurdym. Ejem meniň Aş­gabada gitmegime garşy bolmady. Men paý­tagtdan daýzamyň gyzyny tapyp, oňa ähli zady bolşy ýaly gürrüň berdim. Ol meni diň­länden soň maňa Medeni aň-bilim tehniku­mynyň aktýorlary taýýarlaýan bölümine gir­megimi teklip etdi. Biz tehnikuma bardyk. Emma täze okuwa alynyşygyna çenli wagt bar eken. Meni tehnikumyň ýolbaşçysy az wagtlyk işe aldy. Şol ýylam Medeniýet mi­nistrliginde Moskwanyň Lunaçarskiý adynda­ky ýokary teatral okuw mekdebine bäsdeş­lik esasynda okuwa alynyşlyk başlandy. Bäs­leşikde menem bagtymy synap görmegi ma­kul bildim. Oňa jemi 37 sany gyz gatnaşýan eken. Men “Ykbal” romanyndan Uzugyň mo­nologyny ýerine ýetirdim. Monolog aýdýar­kam, kakam bilen öýe gitmänim ýadyma dü­şüp, aglapdyryn. Synagyň başlygy, mugal­lym Ýewgeniýa Kozerewa meniň monolog aýdyşym diýseň ýaran bolmaly, ol elini çar­pyp “Brawo, brawo, molodes” diýip, meň elimi gysdy. Şeýdip, men 1974-nji ýylda Moskwa okuwa gitdim.

– Talyplyk ýyllaryňyzy hem ýatlaýsaňyz?

– Ýokary okuw mekdebinde bizi gaty gowy garşy aldylar. Gowja-da okatdylar. Biziň to­par ýolbaşçymyz bolsa Ý. Kozerewa boldy. Bäş ýyl duýdansyz geçip gitdi. Diplom işi üçin iki sany spektakly sahnalaşdyrdyk. Ost­rowskiniň “Tupan” dramasy boýunça goýlan bu oýunda maňa baş keşp bolan Katerina­nyň keşbini ynandylar. Ikinji spektaklymyz bolsa “Jennet”, munda-da maňa baş keşbi-Jennetiň keşbini ynandylar. “Tupan” spek­taklynda meniň “söýmeli” ýigidim Boris atly ýaş ýigitdi. Borisiň keşbinde kursdaşym Mül­kaman Orazow çykyş etdi. Biziň bu çykyşy­myzy görmäge gelen sungat ussatlary Sona Myradowa, Aman Hojagulyýew, ýazyjylar Atajan Tagan, Aşyr Mämiliýew dagy biziň işi­mize oňat baha berip gitdiler. Men şol wagt Moskwanyň Çaýkowskiý adyndaky konser­watoriýasynyň talyby Atageldi Garýagdy­ýew bilen hem tanşypdym. Soňra biziň ta­nyşlygymyz çyn söýgä ýazdy oturyberdi. Şeýlelik-de biz okuwymyzyň dowamynda Atageldi bilen durmuş toýuny tutduk. He­mem okuwymyzy oňat bahalar bilen tamam­lap, dogduk diýara dolandyk.

– Okuwyňyzy tamamlanyňyzdan soňky pur­satlar barada aýdaýsaňyz?

– 1979-njy ýylda okuwymyzy tamamlap ge­lenimizden soň bizi toparymyz bilen Lebabyň Seýitnazar Seýdi adyndaky sazly drama teatryna işe ugratdylar. 1980-nji ýyl­da men öňki işlän ýerime-Aşgabadyň Mede­ni aň-bilim tehnikumyna işe geldim. Esteti­kadan ýaşlara sapak berýärdim hemem teh­nikumyň halk teatrynda oýun goýujy režiss­ýordym. Soňra meni aktrisa bolup teatryň sahnasynda keşp janlandyrmak höwesi gur­şap aldy. Şol höwes hem meni 1983-nji ýyl­da Mollanepes adyndaky akademiki drama teatryna alyp geldi. Teatryň şol wagtky ýol­başçysy, Türkmenistanyň halk artisti Sona Myradowa meni güler ýüz, uly höwes bilen işe kabul etdi. Indi men teatrda halypa ar­tistler bilen bir hatarda sahna çykyp, keşp janlandyryp başladym. Men özümi örän bagtly duýýardym. Çünki, men çagalykda ýüregimde orun tutan arzuwyma ýetipdim ahyry.

– Teatrda işläp başlan ilkinji günleriňizden şu günki güne çenli çykyş eden spektaklla­ryňyzam ýatlap geçäýseňiz?

– Türkmen teatrynyň sahnasynda ýaş hü­närmen, ýaş artist hökmünde, ilkinji spek­taklym “Çatrykda” diýlip atlandyrylýar. Ma­ňa bu sahna eserinde urşa giden ýanýolda­şynyň ýoluna garap oturan gelniň keşbini ynandylar. Şondan soňra maňa teatryň re­žissýorlary yzly-yzyna keşp ynanyp başlady­lar. Olardan: “Petigarada” kätip gyzyň, “Mol­lanepesde” Bossantäjiň, “Lukmanda” Doýdu­gyň, “Söýüň gara gözlerimde” Aždarhanyň, “Ilkinji serpaýda” goňşy aýalyň, “Ýar gara gözleriň bendiwany mende” goňşy gelniň, “Medeýada” esasy keşpleriň biriniň, “Bernar­da Albanyň öýünde” hyzmatkär aýalyň, “Ro­meo we Julettada” Julettanyň enekesiniň we beýleki ençeme oýunlarda zenan maşga­lanyň keşplerini janlandyrdym

– Teatryň sahnasyndan boşrak bolýan pur­satlaryňyzy siz nämä sarp edýäňiz?

– Kino sungaty bilen aragatnaşyk saklap durýan. Men kinorežissýor Orazmyrat Gum­madowyň “Keminäniň söýgüsi” atly filmin­de, Keminäniň aýaly Gurbanbagtyň keşbin­de çykyş etdim. Şeýle-de “Türkmenfilm” studiýasy bilen aragatnaşyk saklaýaryn. “Çynarly oba” atly teleserialda çykyş etmek miýesser etdi.

– Ogulbike, teatryň sahnasynda bile işleşen halypa artistleriňiz barada-da aýdaýsaňyz?

– Halypa artistlerden Türkmenistanyň halk artistleri Sona Myradowa, Sabyr Ataýewa el­mydama maňa üns berip, meni goldap, ge­rek ýerinde öwüt-ündew etdiler. Şonuň ýa­ly-da halk artistler Orazgül Apbasowa, Ýeli­zaweta Garaýewa, Ýagşymyrat Akyýew, Berdi Aşyrow, Nurmyrat Annamyradow, Oguljeren Işangulyýewa dagylaryň sungaty­na men uly hormat goýýaryn.

– Mümkin bolsa maşgalaňyz bilenem tanyş­dyraýsaňyz?

– Hawa, meniň agzybir, döwletli maşgalam bar. Ýanýoldaşym Atageldi Garýagdyýew Magtymguly adyndaky milli sazly drama te­atrynda opera artisti bolup işleýär. Uly og­lum Perhat suratkeş, körpe oglum Şöhrat serkerde, gyzym Şirin bolsa mugallym bo­lup işleýär. Umuman biziň maşgalamyza dö­redijilik maşgalasy diýseňem bolýar. Hawa, pursatdan peýdalanyp, medeniýet, sungat we döredijilik işgärlerine uly sylag hormat goýýan, olara sylag-serpaý ýapýan mähri­ban Prezidentimiz Gurbanguly Berdimuhamedowa berk jan saglygyny, uzak ömür, il-gün bähbidli alyp barýan işle­rinde diňe rowaçlyk arzuw edesim gelýär.