Dürs jogap

   

Bir adam uzak ýollary söküp gelipdir we bir oba

ýetip gelipdir. Şol ýerdenem Pylan oba barmaly eken.Ýoluň gyrasynda melleginde işläp ýören bir

daýhana duş gelipdir. We ondan:

Agam, şu ýerden

Pylan oba çenli barmaly welin, näçe wagtlyk ýolka, aýdyp bilmermisiňiz? –

diýip, sorapdyr. Ol daýhan bolsa ýolagçynyň ýüzüne seredýär-de hiç hili jogap

bermezden, öz işi bilen gümra boluberýär. Ýolagçy bolsa, bu daýhandan jogap

alyp boljak däl öýdýän diýýär-de, öz ýoly bilen gidiberýär.

Az salymdan ýaňky

daýhan onuň yzyndan : “Inim ýaňky seniň soran obaň bardyr-a şu ýerden ýarym

sagatlyk ýoldur” – diýip, gygyrýar. Ol adamam geňirgenip: “Ýaňy ýanyňyzdakam

şony aýdyp bilmediňizmi?! Men ep-esli ädim ýol ýörämsoň, yzymdan gygyryp

aýdýarsynyz?” diýipdir.

Daýhan bolsa: “Men ilki seniň ädimleriňi synladym we

şeýdip saňa ädime görä anyklap, barjak ýoluň wagtyny kesgitläp berdim.” diýip,

jogap beripdir.