Söýgi sistemasy 2

Hindi Bolly we Amerikan Holly studiýalarynyň düşinje dünýämize eksport edýän söýgi pelsepesiniň absurdizm usluby bilen ýazylan romantik, fantastik we dramatik hekaýasynyň dowamy.

Şol mylaýym duýgylary barha guýçlenip barýan we “perehodnoý” ýaşyň ähli psihiki üýtgeşmelerini ýaşaýan “ajdarha”nyň köşginde tussag saklanýan şagyzymyz. Ak şazadany garaşyp geçirilýän günlerden bir güni -Kuoşiýentiň diýşi ýalak- Gara şazada gara atynda çykyp gelýär we şagyzyny tussagdan halas edýär. Gara şazada “biparh”ist häsiýeti bilen mert görünip şagyzynyň ynamyny gazanýar. Şagyzynyň entäk daşardaky dünýäden habary bolmansoň, adam tanamansoň ,“men garaşýan şazada şu bolmaly” diýp, geljek baradaky guran arzuw hyýallarynyň baş gahrymany hökmünde seredýär, her hili planlar gurnap başlaýar.

Emma aradan bir näçe aý geçýär. Gara şazada gün geçdigiçe öňkije mähirliligini indi görkezmän başlaýar.
Elbetde gyzjagaz muňa düşinenok, sebäbi daşarydaky bu tokaý kanunlaryndan habarsyz, dünýäde hemmeni özi ýaly päk ýüreklidir öýdüp aldanýanyny bilmän özüçe manylar beren bolýar. Keýpi ýokdur, belki ýaramaýandyr belki aladalary bardyr öýdüp geçirýär.

Ýöne, bir gün elinde “bagyşla men seniň ak şazadaň däl ekenim, sistemaň hatasy, biz hiç bir birimize mynasyp däl, sen menden has gowusyna mynasyp” ýazylgy hatjagaz bilen tokaýyň ortasynda ýekeje özi galýar. Aslynda çipde bellenen käbir häsiýetler deň gelýärdi, ýöne näme üçin beýle bolandygyna düşinip bilenokdy şagyzy.

Gara şazada üçin bu bir oýundy, gyzyklydy onuň üçin, herkimiň ilkinjisi, iň köp ynam duýylýan söýgülisi bolmak, biriniň duýgylaryny gazanmak onuň üçin bir “azart” oýundy.

Gyz aglamak isledi, başga hili bolup bilmezdi aglady. Öz özi bilen gürleşip oturanyny hem duýman galýardy, dälireýän ýalydy. Indi näme etsin bu gyzjagaz, hiç kimi ýokdy. Oňa düşinip biljek ýekeje adam ýokdy dünýäsinde. Tokaý diýseň howpludy. Ýöne depressiýada, umydyny ýitiren gyz, tokaý içinde ýeke özi näme eder?

Belki bir ýagtylyk taparyn pikri bilen ýol ugry ýöräp başlady. Tokaýdaky her bir ses, her bir kölege gaty gorkunçdy. Uzakdan bir yşyk göründi. Yşyk görünýän tarapa ylgap başlady. Golaýlaşdykça bir gala görünýärdi. Gala uly dewarlar bilen gurşalan, yşyk bolsa derwezeniň ýokarsynda ýanyp durdy. Ilki oýlandy, ýöne arkasynda gorkunç we näbelli bir tokaý, näbelli bu gala girmekden başga alajy ýokdy.

Derwezeni kakdy. Hiç bir ses gelmedi. Ýene bir gezek gatyrak kakdy. Derwezeniň arkasyndan bir ses eşidildi, “kim?” diýp soraýardy. Şagyzy näme diýp jogap berjegini hem bilenokdy. “Men kim? Özümem bilemok” diýp oýlandy. Ýöne ikinji gezek “kim sen?” diýp soralan soň “Men tokaýda ýalňyz galdym, gidip biljek ýerim ýok.” diýp jogap berdi. Derweze ýuwaşlyk bilen açyldy... Aňyrysynda bir topar aýallar durdy. “Gel, geliber. Sen ilkinjisi däl. Soňkysy hem bolmarsyň.” diýildi. Şagyzy düşinmedim manysynda kellesini çaýkady.

“Biz hem sen ýaly. Şazadalar tarapyndan aldanyp, umydyny ýitiren ýagdaýda geldik bu gala. Ýöne bu gala biz üçin bir umyt boldy. Ýalňyzdyk ýöne bizi düşinip biljek dostlarymyzyň galasy boldy. Bu galanyň ady Zenanistan. Biz zenanistler. Bu galada erkek ýok. Diňe aýal gyzlar. Bu aýal gyzlar gara şazadalar tarapyndan aldanan we olara garşy agzybirlik bilen göreşýär. Biz erkekler bilen deň hukuk we deň şertler isleýäs. Käbirleri erkekleriň guly ýaly bolup ýaşamakdan bizar. Käbirleri bir mata ýaly bolup erkekleriň keýpu sapasyna hyzmat edýän gul ýaly bolmakdan bizar bolup geldiler. Seniň hekaýaň nämegy?”

Şagyzy nahar iýp otyrka hekaýasyny aýdyp berdi. Yzyndan zenanistleriň lideri:
“Ajdarhanyň köşginde tussag oturmakmy, ýogsam tokaýa eýe çykmakmy. Gara şazadalar mertlik görkezip edenini edip ýörkä Ak şazadalar nirdedi? Öýlerinde garyn çişirip ýatybersinler. Tokaýa olar eýe çykmasa biz çykars. Erkek erkek bolmasa erkeklik bize düşdi. Tokaýy Gara şazadalardan, bu namys garagçylaryndan arassalars. Hukugymyzy talap eders. Biziň erkeklerden kemçiligimiz ýok. Olar bilen maşgala gurnamalyň, bizsiz bir durmuş nähili kyndygyny görsünler. Ýaşasyn deňlik, ýaşasyn adalat...” diýp gürrüňdeşlik geçdi. Hemmesi turyp “ýaşasyn deňlik” diýp gygyryp alkyşladylar.

Şagyzy bolsa käbir sözleri bilen ylalaşsa da käbir sözleri bilen ylalaşyp bilmedi. “Azajyk galaýyn soň gitjek bärden. Ak şazadamy barybyr taparyn. O meni tapmasa men ony taparyn. Men söýgä barybyr ynanjak. Dünýäde men üçin ýaradylan biri gezip ýör.” diýp pikir etdi.

Heniz öňünde näbelli galalar, daglar köp. Ýöne näme diýýär “hakykat ýanymyzda”. Ýanyndaky hazynany tapmak üçin daga çykyp seretmeli bolýarda.

Ýöne barybyr, Edisonyň kösenip, müň gezek tejribe edip tapan lampasyny täzeden tapmagam absurdlyk dälmi?