Türkmen futbolçylary ýene-de AFK-nyň Çagyryşynyň kubogy ugrundaky ýaryşyň finalyna çykdy

Türkmenistanyň ýygyndy toparynyň futbolçylary Nepalyň paýtagty Katmandu şäherinde geçirilýän AFK-nyň Çagyryşynyň kubogy ugrundaky dördünji ýaryşynyň finalyna çykyp, iki ýyl mundan öň gazanan üstünligini gaýtaladylar. Bu ajaýyp üstünligi Türkmenistanyň at gazanan tälimçisi Ýazguly Hojageldiýewiň şägirtleri ýarym finalda Filippinleriň toparyny 2:1 hasaby bilen ýeňip, gazanmagy başardylar.Oýnuň birinji ýarymynda toparlaryň ikisiniň hem pökgileri derwezä salmaga mümkinçilikleri boldy, emma üstünlik filippinlilere ýaran boldy. Olar oýnuň 25-nji minutynda hasaby açdylar – 1:0.Arakesmeden soň türkmen futbolçylary birnäçe oýunçylaryny çalşyp, bäsdeşiniň derwezesine tarap hüjümi güýçtlendirdiler we oýnuň 80-nji minutynda hasaby deňlediler – 1:1. Bu pökgüni Turkmenistanyn 2011-nji yylyn in okde futbolcysy bolan Arslanmyrat Amanow derwezäniň aşaky burçuna gönükdirmegi başardy. Oýnuň esasy wagtynyň ahyryna çenli dört minut galanda bolsa oýnuň ikinji ýarymynda oýna giren Guwanc Abylow bäsdeşinden pökgüni alyp, takyk urgy bilen Gahrymanberi Çonkaýewe geçirdi, ol öz gezeginde Türkmenistanyň topary üçin ýeňiş pökgüsini derwezä salmagy başardy – 2:1.“Filippinlileriň toparynda dürli ýurtlarda uly tejribe toplan futbolçylar bar. Şonuň üçin bu ýeňiş biz üçin has-da gymmatlydyr” diýip, Türkmenistanyň ýygyndy toparynyň baş tälimçisi oýundan soň geçirilen metbugat maslahatynda aýtdy.Final oýnunda türkmenistanlylar KHDR-yň ýygyndy topary bilen duşuşar, ol beýleki ýarym finalda Palestinanyň toparyny 2:0 hasaby bilen ýeňdi. Iki ýyl mundan öň Türkmenistanyň we KHDR-yň futbolçylary bu kontinental ýaryşyň finalynda duşuşypdylar. Şonda oýnuň esasy wagty deňme-deň – 1:1 hasaby bilen tamamlanypdy. 11 metrlik jerime urgularynda bolsa ýeňiş KHDR-iň toparyna nesip etdi – 5:4. 
AFK-2012 Çagyryşynyň Kubogynyň eýesi 2015-nji ýylda Awstraliýada geçiriljek Aziýanyň Kubogynyň final böleginde çykyş etmäge hukuk gazanar.