Tamakinçilikli ýagşylyk

Garry ýaş ýigidiň
jübsüne birzatlar saldy-da:

-         
Alla
senden razy bolsun, oglum – diýdi.  – Men
garryny dünýä täzeden inen ýaly begendirdiň. Şu kiçijek sowgadymy alsaň, has-da
begendirersiň.

Ýaş ýigit eden
işiniň serpaý bilen soňlanjagyny başda hem aňypdy. Ol ýol ugrunda dört-bäş ýaşlaryndaky
çaganyň azaşandygyny görüp, onuň nireden gelendigini soraşdyrandan soňra, maşyn
tutup, ony öýüne getiripdi. Ýöne gözlan öýüni tapanda lapykeç boldy. Ony
ýolboýy göz öňüne getiren giň holwy, kaşaň öýüniň deregine horaşaja öý garşy
alypdy. Üstesine, gapyny hem çaganyň ýaşy bir çene baran atsy açypdy we
agtygyny bagryna basandan soňra, ýigide alkyş baryny okap, jübsüne birnäçe
teňňe salypdy.

 Ýaşuly agtyjagynyň ejesiniň we kakasynyň ýol
heläkçiliginde uçrap aran çykandygyny ýaş ýigide gürrüň berdi. Ýigit ýaşulyny
diňleýän wagty jübüsine salnan zady eli bien barlap ýetişdi. Bary-ýogy dört-bäş
sany teňňe. Bu nähili beýle bolýar!? Bar, ýagdaýy ýok diýeli, ýöne ýaşuly şu
uly ýagşylyk üçin, hiç bolmanda, onuň ýol puluny berip bilmezdimi!?

  Ýigidiň hyýallary puç bolupdy. Ol içinden “Heý-de
adam beýle gysganç bolup bilermi?!” diýip oýlandy. Soňra bolsa ýaşula gowuja
sapak bermek maksady bilen, oňa ulumsylyk bilen bakdy-da, jübsündäki teňňeleri
çagajygyň öňüne oklady:

-         
Bar ,jigim,
bu pula oýmawaç alyn. Belki, ulalaňda, jomartlygyň nämedigni bilersiň...

Çagajyk ýere eglip, teňňeleri çöpläp başlanda, ýigidiň gözleri tas
hanasyndan çykypdy. Görse, çaganyň elinde dört-bäş sany altyn teňňe
lowurdaýardy.