Çopan we onuñ agajy

Ýaşuly çopan sürüsini otly meýdana çykaryp, özi şol ýerde bir alma agajynyñ aşagynda dem dynjyny alar eken. eger miweleriñ bişen möwsümi bolsa, agajyna ýuzlenip şeyle diyer eken: “hany goreli balam, bu gojaña bir alma ber indi”.
Şol bada onuñ öñüne bir alma gaçan. Özem iñ owadany, in süýji bişeni. Ýaşuly çopan ýanyndaky çakgysyny çykaryp, almany böleklere bölüp gatyk we çöregi bilen iýenden soñ, kakasyndan galan Gurhanyny okamaga başlar eken.
Çopan bu agajy ýigrimi ýyl ozal ekeninden bäri ýygy ýygydan suwlar eken. özem bir ulyrak künnükde doldurlan suwa abdest alyp, içinde galanyny hem şöl agaça guýar eken. belki hem şonuñ üçindir bu suwlara alma agajynyñ kökleri berkleşip, gysga wagtda-da miwe bermäge başlapdyr. Çopan ol wagtlar ýaş bolansoñ elini has ýokary uzadybam almany özi alyp biler eken. Emma aradan ençeme ýyl geçensoñ bili bükülip, çopanyñ boýu hem kiçelen ýaly bolup galypdyr. Agaç bolsa bir boýy çynar kimin uzanyp göýa asmana ýetäýjek bolupdyr. ýöne boýy nähilem bolsa, ol henizem çopanyñ balasy dälmi eýsem? Ony edil cagasy ýaly sereden bu çopan bagyny öpüp bu gezegem:
“Ber balam, iber maña bu günki nesibämi.” diýipdir.
We şolbada bir alma gaçypdyr. Birnäce ýyllar bäri şeýle ýagdaý dowam edip gelipdir. Ýaşulynyñ ondan göwni galan güni bolmandyr. Obañ adamlary daşdan seredip bu hadysa geñ galmak bilen dilden dile ol ýaşuly çopana weli bir zatdyr diýip gürruñem yaýradypdyrlar.
Ýaşuly bir gün şol ýerde irdenki namazyny okandan soñ, ýene almasyny isläpdir. Emma şonça köp almalardan birem gaçmandyr. Yaşuly gaýta gaýta ýuzlenip garaşsa-da bu gezek netijesiz bolupdyr. Çagasy ýaly görýän agajy ilki miwe berip başlan gününden bäri birinji gezek onuñ islegini terk edipdir. Gojanyñ gözünde gözýaş peýda bolup, gynanyp agajynyñ ýanyndan täze bolan guzularynyñ ýanyna gidipdir. Gojanyñ ol günler garrylyk haly hasam agyrlaşyp, bili öñküden-de beter bükülipdir, aýaklarynda durmasy kynlaşypdyr. Mallaryny üýşürip oba tarap gelýärka, obañ çetindäki metjitde adaty bolşy ýaly nurana minaralaryndan azanyñ sesi gelipdir. Ony eşiden çopan täzeden dogan yaly bolupdyr-da we bir zerur zat ýadyna düşüpdir.
Çaga kimin begenip alma agajynyñ ýanyna howlugyp baranda, oña mähir bilen: “balam” diýip gözýaşyny saklap bilmän agysy tutupdyr, “meniñ ýalñyzym. Bu huşuny ýitiren gojañyñ göwñüne degmänkäñ, näme üçin öñünden duýdurmadyñ bu günüñ Remezanyñ ilkinji günidigini?”